Talily Soa Nisorate i Lioka 13:1-35
-
Mibebake ndra hovonovonoegne (1-5)
-
Fagnoharagne miomba i fihamy tsy namokatsey (6-9)
-
Nisitragnegne tamy ty andro Sabata i ampela vokokey (10-17)
-
Fagnoharagne miomba i voan-tsinapỳ naho i lalivaỳ (18-21)
-
Mila mikezake mafe mba hizilike amy i lalagne maifitsey (22-30)
-
Heroda, i “amboahakoy” (31-33)
-
Nalahelo i Jerosalema ty Jesosy (34, 35)
13 Tamy ze fotoagne zay, le nisy tamy i ndaty teo rey nitalily tamy i Jesosy miomba i ndaty boake a Galelia agne nivonoe i Pilato rey. Naharo’e tamy ty sorogne hatao i ndaty rey ty lio iareo.
2 Le hoe ty navale’e iareo: “Mieretseretse vao nareo tie o ndaty te Galelia rehoe ro tena mpanota mandikoatse ze ndaty te Galelia iaby, satria izay ty raha nanjò iareo?
3 Oho’o, tsy izay. Rehafeko ama’areo, fa naho tsy mibebake nareo, le hovonoegne manahake iareo ka.
4 A i ndaty 18 nimate nitontà ty tragno abo ta Siloama agney, mieretseretse vao nareo tie iareo ro tena bey hakeo naho ampitahaegne amy ty ndaty mipetrake a Jerosalema ao?
5 Oho’o, tsy izay. Rehafeko ama’areo, fa naho tsy mibebake nareo, le hovonoegne manahake iareo ka.”
6 Nirehake fagnoharagne tamy iareo reke naho fa niavy eo. Hoe reke: “Nisy lahilahy raike nambole fihamy* tamy ty teteke fambolea’e voaloboke. Ie tafara tatoy, le nimbeo reke mba hipay voa’e ama’e faie tsy nahatrea ndra raike.
7 Le hoe reke tamy i mpambole voalobo’ey: ‘Fa telo taogne zay raho ty niherekeregne mbetoa mba hipay voa’e tamy ty fihamy tia faie mbe tsy nahatrea ndra raike ama’e. Firao agne io fa mibahan-toeragne avao!’
8 Le hoe ty navale i mpamboley aze: ‘O Ragnandria, engao eo tao’e raike hey reke. Le agnate ze tao’e raike zay hohalieko ty magnodidigne i foto’ey sady hisiako zezeke. Le mbe hotrea eo tie hanao akore reke afara izay.
9 Naho mamoa reke, le soa zay. Fa naho tsy mamoa, le hofiraentikagne amy izay.’”
10 Nampianatse tamy ze sinagoga zay ao reke tie indraike Sabata zay.
11 Nisy ampela raike nisy demonia mampaleme zay ty tao. Fa tagnate ty 18 taogne ty nihova i demoniay tama’e tao. Nanjare vokoke i ampelay, le tsy afake nitsangagne mahitsy.
12 Naho fa nahatrea aze ty Jesosy, le nimbama’e mbeo sady nirehake tama’e tihoe: “O rakemba, votsotse amo o arete’ò rehe.”
13 Nitsapae i Jesosy reke naho fa niavy eo, le teo naho eo avao le avy le nahitsy i lambosi’ey. Nagnomey voninahitse an’Andrianagnahare reke tafara izay.
14 Faie niboseke i mpifehe sinagogay satria nagnasitragne tamy ty andro Sabata ty Jesosy. Le hoe reke tamy i vahoakey: “Enegne andro ty natokagne hiasagne, le amo o andro rehoe areke nareo ro mbetoa mba hositragnegne fa tsy naho fa andro Sabata.”
15 Faie hoe ty navale i Tompo aze: “Ry mpanao soa miatreke, naho fa Sabata moa nareo tsy magnaha ty agnombe’areo ndra ty birike’areo, le magnomey rano aze?
16 A ty ampela tarana i Abrahama narohy i Satana tagnate ty 18 taogne tia vao tsy toko’e ho hahagne amy ty andro Sabata?”
17 Nimegnatse i mpanohetse aze rey naho fa naharey izay, fa i vahoake rey nifale noho ty raha mahagaga natao’e.
18 Hoe ka reke naho fa niavy eo: “Mitovy amy ty ino i Fanjakàn’Andrianagnaharey? Le akore ty fomba hagnazavako aze?
19 Mitovy amy ty voan-tsinapy* raike nambolé ty lahilahy tan-tete’e ao. Naho fa nitiry reke, le nanjare hatae jabajaba, hafarà o vorogneo namboatse tragno amy i sampa’ey ey.”
20 Hoe indraike reke: “Ino ka ty hampitovieko amy i Fanjakàn’Andrianagnaharey?
21 Mitovy amy ty lalivay nalae ty ampela, le nafangaro’e amy ty lafarina intelo o fagnaragnagne beio, amparake ty itomboa i kobay iaby.”
22 Tamy ie tan-dalagne ho a Jerosalema agney, le nampianatse ty ndaty tamy ty rova naho tamy ty tanàgne ambanevohitse nandalova’e.
23 Le nisy lahilahy raike zay nirehake tama’e tie: “O Tompo, ho tsy ampe avao vao ty ho voavonje?” Le hoe reke tamy iareo:
24 “Mikezaha mafe nareo mba hizilike amy i lalagne maifitsey eo. Ambarako anareo, fa maro ty te hizilike faie tsy ho tafilitse.
25 Naho fa mitsangagne mba hagnily i lalagney i tompon-tragnoy, le amy izay nareo ro hampinkonkogne an-dalagneo sady hanao tihoe: ‘O Tompo, mba vohao zahay.’ Faie hoe ty havale’e anareo: ‘Tsy fantako tie ndaty hirike aia nareo.’
26 Le hirehake nareo tie: ‘Izahay anio niarake nihinagne naho ninogne divay tama’o sady nampianatse tagn’arabei’ay ey ka rehe.’
27 Faie hoe ty havale’e anareo: ‘Tsy haiko tie ndaty hirike aia nareo. Misintaha agne* nareo ty ndaty tsy maregne retoa!’
28 Hangoihoy ty tagny naho ho romotse* nareo naho fa hahatrea i Abrahama, i Isaka, i Jakoba, naho o mpaminanio iaby amy i Fanjakàn’Andrianagnaharey ao, faie hatorake ivela’e agne nareo.
29 Ankoatse izay, le hisy ndaty boake atignanagne naho ahandrefagne, boake avaratse naho atimo, hiarake hihinagne an-databatse amy i Fanjakàn’Andrianagnaharey ao.
30 Misy amo o fara’eo areke ty hanjare voaloha’e, le misy amo o voaloha’eo ty hanjare fara’e.”
31 Nisy Fariseo nimbama’e mbeo tamy izay, le nirehake tie: “Mialà ty eto rehe, le mandehana agne satria te hamono azo ty Heroda.”
32 Le hoe ty Jesosy tamy iareo: “Akia atalilio’areo i amboahako igne tie: ‘Mandroake demonia naho magnasitragne ndaty raho ty androany naho hamaray, faie hovita zay naho herone.’
33 Faie ndra inogn’ino raha hiseho, le tsy maintsy hanohy i asakoy hey raho ty androany naho hamaray aman-kerone. Afara izay raho tsy maintsy mandeha satria tsy azo atao ty mamono mpaminany ivela i Jerosalema agne.
34 O Jerosalema, Jerosalema, i mpamono mpaminany naho mpitorake vato ze ndaty irahegne ho ama’e aoy. Fagnimpireko zay ty te hamory o ana’ò manahake ty atao o akoho mamory ty ana’e ambane ela’e aò! Faie tsy nimete rehe.
35 Hengan’Andrianagnahare eo areke i tempoli’areoy.* Rehafeko ama’areo, fa tsy hahatrea ahy sasa nareo amparake ty hirehafa’areo tie: ‘Hotahiegne abey i avy amy ty tahina i Jehovah-y!’”
Fagnamarehagne ambane peje
^ Ndra: “aviavy.”
^ O voan-tsinapy zao, le raha mitiry faie kidikidy ty voa’e, le a Palestina agne ty misy aze. Dime mentatse ty haabo’e.
^ Abt: “Misintaha ahy.”
^ Abt: “Hagnily vazagne.”
^ Abt: “anjomba’areoy.”
