Talily Soa Nisorate i Lioka 16:1-31
16 Hoe ka reke tamy i mpiana’e rey: “Nisy lahilahy raike mpagnarivo zay nanagne mpanompo. Tinendre’e mba hiandraikitse ty fanagna’e iaby o mpanompo’e iohoe. Faie nisy nanao kitomboke o mpanompo iohoe tie nao nilanilanie’e avao i fanagna i tompo’eỳ.
2 Nitokave’e areke i mpanompo’ey, le hoe reke tama’e: ‘Manao akore ze raha rehafe o ndatio miomba azo zao? Meo ahy atoy iaby ze taratasy miomba ty nampiasà’o i volako rey, satria tsy hiandraikitse o fanagnakò sasa rehe manomboke androany.’
3 Le hoe i mpanompoy tagn’eretsere’e agne: ‘Inogne koahe ty hataoko fa hafaha i tompokoy amy i asakoy raho? Hambole, iraho amy izao tsy mahatam-pangaly. Ty hangatake mahamegnatse ahy.
4 Einnn ein! Mahatrea hevetse raho mba hahavy o ndatio handrambe ahy naho fa afaha i tompokoy amako i asakoy.’
5 Le nitokave’e tsikiraidraike ze ndaty nanagna i tompo’ey trosa. Hoe reke tamy i ndaty voaloha’ey: ‘Ino ty raha nitrosae’o tamy i tompokoy?’
6 Le hoe ty navale i ndatỳ: ‘Menake oliva 100 bata.’* Le hoe i mpanompoy tamy i ndatỳ: ‘Akia alao malaky i taratasy fifagnarahagne ama’o agney, le 50 ty sorato eo.’
7 Hoe ka i mpanompoy tamy ty ndaty nagnarake: ‘A irehe, inogne ka ty trosa i tompokoy ama’o?’ Le hoe i ndatỳ: ‘Varembazaha 100 kora.’* Le hoe i mpanompoy: ‘Alao i taratasy fifagnarahagne ama’o agney, le 80 ty sorato eo.’
8 Le niderae i tompo’ey i mpanompoy, satria nanao raha taman-kilala reke ndra tie nanao ty tsy maregne aza. Tena mahihitse areke ty ana ty ndaty amy ty tontolo toy naho fa mifandrambe amy iareo sambe iareo naho ampitahaegne amy ty ana o mazavao.
9 “Izao ka ty raha rehafeko ama’areo: Anò ze hahazoagne namagne amy ty alala ty harena tsy maregne. Amy izay naho fa lany i fanagnagney, le horambese iareo amy i toeragne nainai’ey agne nareo.
10 Ze atokisagne amy ty raha kedekede, le ho azo atokisagne ka amy ty raha bey. Fa ze tsy azo atokisagne amy ty raha kedekede, le tsy ho azo atokisagne amy ty raha bey.
11 Naho tsy azo atokisagne areke nareo amy ty harena tsy maregne, le ia ty hagnankigne ama’areo i tena harenay?
12 Naho tsy azo atokisagne amy ty vara o ndaty nankinegne tama’o ka rehe, le ia ty hagnomey valesoa azo?
13 Tsy misy mpanompo mahavita manompo tompo roe. Fa ty raike tsy maintsy hoheje’e, le ty raike hotea’e. Ndra ty raike hipiteha’e, le ty raike hambanémbané’e. Tsy hovita’areo ty hanompo an’Andrianagnahare naho o Harenao.”
14 Naho fa naharey izay o Fariseo tea volao, le nitsikihe iareo ty Jesosy sady nambanémbané iareo.
15 Le hoe reke tamy iareo: “Inareo misehoseho amo o ndatio tie ndaty maregne. Faie hain’Andrianagnahare ty am-po’areo ao. Ty anto’e, ty raha hevere o ndatio ho raha lahibey, le tsy misy dika’e aman’Agnahare.
16 “I Lalànay naho ty raha nisorate o Mpaminanio ro nambara amparake ty niavia i Jaona. Faie nanomboke tamy i Jaona teo, le i Fanjakàn’Andrianagnaharey ty talily soa tseizegne amo o ndatio sady nisisike mbeo ty karaza o ndatio iaby.
17 Ndra mbe moramora ka ty hahafoagne i lagnitsey naho ty tane toy, ta tie ty hahafoagne ty rambo ty renen-tsoratse raike amy i Lalànay ao amparake ty ahatanteraha’e.
18 “Ze lahilahy misarake amy ty vali’e sady manambaly ampela hafa, le magnitsakitsa-baly. Le ze manambaly i ampela nisaraha ty vali’ey, le magnitsakitsa-baly ka.
19 “Nisy lahilahy raike mpagnarivo zay lava nagnisy akanjo voloparasy naho lamba vita tamy ty rongony tena fanjaka. Niaigne agnolegnagne* naho nifalefale isan’andro o lahilahy iohoe.
20 Faie nisy lahilahy raike mpangatake feno baebae zay mateteke atobò o ndatio tam-bavahadi’e eo. I Lazarosy ty agnara’e.
21 Nagniry mafe hihinagne ty pote-kanegne mipoke boake ambone lataba i lahilahy mpagnarivoy eo reke. Misy amboa ka aza mandeha mbama’e mbeo, le mitselatsela i bae’e rey.
22 Naho fa nandeha ty fotoagne, le nimate i mpangatakey, le nente o anjelio tagnila i Abrahama eo.*
“Nimate ka i lahilahy mpagnarivoy, le nalevegne.
23 Niandra reke tamy ireke nijalejale tamy i Kiborỳ aoy, le nahatalake i Abrahama naho i Lazarosy tagnila’e teo.
24 Le nitoka i lahilahỳ tie: ‘O Abrahama raeko, mba iferegneso raho, le rehafo ty Lazarosy handogne ty loha i rambotagna’ey agnate rano ao mba hampanintsinintsigne ty lelako fa mijale raho agnate ty afo mirearea toy ato.’
25 Faie hoe ty Abrahama tama’e: ‘O anake, tsiarovo fa nanagne ze kila raha rehe tamy ihe mbe nivelogney. Fa amy izao, le ireke ka ty miadagne fa irehe mijale.
26 Ankoatse izay, le misy hantsagne bey ty mampisarake anay ama’areo, amy izay ze ama’ay atoy tsy afake mandeha mbama’areo mbeo ndra tie te hanao izay aza, le ze ndaty ama’areo agne ka tsy afake mandeha mbama’ay mbetoa.’
27 Le hoe i lahilahỳ tamy i Abrahama: ‘Naho izay areke, le mangatake ama’o raho baba, mba hagnirake i Lazarosy ho an-tragnon-draeko agne,
28 satria managne rahalahy dime raho. Amy izay reke hampitao* iareo mba tsy hahavy iareo ho avy amy ty toeragne mampijale toy atoy.’
29 Faie hoe ty navale i Abrahama aze: ‘Managne i Mosesy naho o Mpaminanio iareo. Toko’e hotsanogna iareo reo.’
30 Le hoe i lahilahỳ tama’e: ‘Oho’o, tsy hotsanogna iareo zao reo Abrahama raeko. Fa naho ndaty vinelogne amy ty mate ro mandeha mbamy iareo mbeo, le hibebake iareo.’
31 Faie hoe ty Abrahama tama’e: ‘Naho tsy mitsanogne i Mosesy naho o Mpaminanio iareo, le ndra tie hisy ndaty vinelogne amy ty mate aza handeha mbamy iareo mbeo, le tsy hotsanogna* iareo ka.’”
Fagnamarehagne ambane peje
^ 22 Litatse ty bata raike.
^ 170 kilò ty kora raike.
^ Ndra: “Tsy nisy raha nahaore.”
^ Abt: “tan-tratra i Abrahama eo.”
^ Ndra: “hampahafantatse.”
^ Abt: “tsy haharese lahatse.”
