Talily Soa Nisorate i Lioka 18:1-43
18 Nirehake fagnoharagne tamy iareo reke naho fa niavy eo mba hagnampeagne iareo hahatakatse tie tena ilaegne ty mivavake lognandro sady tsy kivy naho fa manao izay.
2 Hoe reke: “Nisy zizy tsy matahotse an’Agnahare naho tsy megna-maso ndaty zay ty tamy ty tanàgne raike.
3 Nisy ampela vantotse raike zay ka ty tamo o tanàgne iohoe ao. Lava nandeha mbamy i zizỳ mbeo avao reke sady nirehake tihoe: ‘Anò ze hahazoako rare’e amy i ndaty mialy amako amo o fitsaragneo eỳ.’
4 Tsy nite hanao izay hey i zizỳ tamy ty voaloha’e, faie nieretseretse reke naho fa tafara tatoy tie: ‘Ndra tie tsy matahotse an’Agnahare naho tsy megna-maso ndaty aza raho,
5 le homeako rare’e ty ampela tiagne satria hejeko ty fiherenkere’e mbamako mbetoa isan’andro isan’andro sady manosotse ahy ka ty maharey ty fitaraintarai’e lava.’”
6 Le hoe ty Tompo: “Tsanogno’areo ze raha nirehafe i zizỳ zay ndra tie ndaty tsy maregne aza reke.
7 Azo antoke areke fa hagnomey rare’e o ndaty jinobo’e mitaraigne ama’e handro halegneo ty Andrianagnahare, ndra tie manam-paharetagne amy iareo aza.
8 Rehafeko ama’areo, fa hatao’e ze hahazoa iareo rare’e malaky. Faie naho fa ho avy i Ana o ndatỳ, hahatrea ndaty manam-pinoagne hoe izay an-tane etoy vao reke?”
9 Nirehake ty fagnoharagne toy tamo o ndaty nihevetse ty vata’e ho maregne naho nihevetse ty hafa ho tsy misy dika’eo ka reke:
10 “Nisy ndaty roe lahy nandeha tamy i tempolỳ agne mba hivavake. Ty raike Fariseo, le ty raike mpitake hetra.
11 Nitsangagne i Fariseoy, le nanomboke nivavake tam-po’e ao tihoe: ‘O Andrianagnahare, misaotse azo raho satria tsy mba manahake o ndaty mpitavagneo, o ndaty tsy maregneo, o mpagnitsakitsa-balio, ndra manahake ty mpitake hetra tiagne.
12 Mifaly hanegne indroe isan-keregnandro ka raho, sady magnomey ty am-pahafolo ze raha anagnako.’
13 Fa i mpitake hetray nitsangagne lavidavitse aze. Tsy nivani’e ndra ty ho niandra i lagnitsey fa le fa nijerajera ty aragna’e avao reke ro sady nirehake tihoe: ‘O Andrianagnahare, mba amindrao fo raho fa mpanota.’
14 Rehafeko ama’areo, fa naho fa noly an-tragno’e agne o lahilahy iohoe, le ireke ro tena trea tie maregne naho ampitahaegne amy i Fariseoy. Ty anto’e, ze magnambone tegna le haetre, fa ze miambane ro hasondrotse.”
15 Nisy ndaty ka ninday ty ana iareo mbama’e mbeo mba hotsapae’e. Naho fa nitrea i mpiana i Jesosy rey zay, le nendaha iareo i ndaty rey.
16 Faie nitokave i Jesosy i ajaja rey, sady hoe reke: “Engao’areo ho mbamako mbetoa o ajaja reo fa ko sakana’areo. Ty anto’e, hoahy ze ndaty manahake iareo i Fanjakàn’Andrianagnaharey.
17 Volagneko ama’areo,* fa ndra ia ndra ia tsy mitsikombe o ajajao naho fa mandrambe i Fanjakàn’Andrianagnaharey, le tsy hizilike ao.”
18 Nisy manam-pahefagne raike zay ka nagnontane i Jesosy tihoe: “O Mpagnanatse soa, inogne ty raha tsy maintsy ataoko mba hahazoako* i havelogne nainai’ey?”
19 Le hoe ty Jesosy tama’e: “Nagnino raho ro tokave’o tihoe soa? Tsy misy soa, naho tsy Andrianagnahare raike avao.
20 Hai’o sa tsy hai’o i lily manao tihoey tie: ‘Ko magnitsakitsa-baly, ko mamono ndaty, ko mangalatse, ko mitsangagne ho vavolombelogne mavande, sady hajao ty rae’o naho ty rene’o’?”
21 Le hoe reke: “Fa noriheko amparake ty naha ajaja ahy o lily rehoe.”
22 Naho fa naharey izay ty Jesosy, le hoe reke tama’e: “Misy raha raike toy mbe tsy ampe ama’o: Avaroto iaby ze raha anagna’o, le zarao amo o mahantrao ty vili’e, amy izay rehe hanagne harena an-dagnitse agne. Andao ka hagnorike ty liako.”
23 Tena nalahelo i lahilahỳ naho fa naharey izay, satria mpagnarivo bey reke.
24 Nagnente aze ty Jesosy sady nirehake tie: “Tena ho sarotse amo o ndaty mpagnarivò ty hizilike amy i Fanjakàn’Andrianagnaharey ao.
25 Naho ty maregne aza, le ndra mbe moramora ka ty hidira o ramevao amo o lava-pinjaitseo ta ty hiziliha o mpagnarivò amy i Fanjakàn’Andrianagnaharey ao.”
26 Le hoe ze naharey izay: “Hisy ho voavonje avao koahe naho izay?”
27 Le hoe reke: “Ty raha tsy vita o ndatio, le vitan’Andrianagnahare.”
28 Faie hoe ty Petera: “Izahay fa nahafoe ty fanagna’ay iaby, le nagnorike azo.”
29 Hoe reke tamy iareo: “Volagneko ama’areo, fa tsy misy ndaty fa nahafoe tragno, ndra valy, ndra rahalahy, ndra rae aman-drene, ndra anake noho ty amy i Fanjakàn’Andrianagnaharey,
30 le tsy hahazo raha maro sady mbe mihoatse lavitse o raha nafoe’e rehoe ka reke amy izao, le amy ty hoavy reke hahazo i havelogne nainai’ey.”
31 Le nente’e nikisake kede i 12 lahy rey sady hoe reke tamy iareo: “Ho a Jerosalema agne itika hinane zao, le hotanterake iaby ze raha nisorate o mpaminanio miomba i Ana o ndatỳ.
32 Agnisa izay tihoe, hatolotse an-tagna o ndaty boake amy ty firenena hafao eo reke, hotsikihe iareo, hafaha iareo baraka naho handrorà iareo.
33 Naho fa boake karavasie iareo ka reke, le hovonoe iareo. Faie hovelogne indraike reke amy ty andro fahatelo.”
34 Tsy niazo iareo ndra raike ty dika o raha nirehafe’e rehoe, satria mbe naetake tamy iareo ty dika’e, amy izay tsy azo iareo ty raha tea’e horehafegne.
35 Naho fa narine i Jeriko ty Jesosy, le nisy lahilahy goa sady mpangatake zay nitoboke ta moron-dalagne eo.
36 Naharey ndaty maro nandalo reke, le nagnontane miomba ty raha miseho.
37 Le nirehafe iareo reke tie: “I Jesosy te Nazareta o mandriogneo.
38 Le nitoka mafe i lahilahy goay tie: “O Jesosy Ana i Davida, mba iferegneso raho.”
39 Le nendaha i ndaty taloha’e teo rey reke sady nampitsigne iareo ka, faie vao mainke nitoka mafe reke tie: “O Jesosy Ana i Davida, mba iferegneso raho.”
40 Le nijanogne ty Jesosy sady nampindese’e mbama’e mbeo i lahilahy goay. Naho fa narine aze i lahilahỳ, le nagnontenea’e tie:
41 “Inogne ty raha tea’o hataoko ama’o?” Le hoe reke: “O Tompo, mba ampahatreavo indraike o masokò.”
42 Le hoe ty Jesosy tama’e: “Mahatreava areke rehe. Ty finoa’o ro nahasitragne azo.”
43 Teo naho eo avao, le avy le nahatrea indraike reke sady nanomboke nagnorike aze naho nidera an’Agnahare. Nidera an’Agnahare ka ze ndaty nahatrea izay.
