Talily Soa Nisorate i Lioka 21:1-38
21 Naho fa nagnente ty Jesosy, le nahatrea o mpagnarivò nampipoke vola fagnomezagne tamy i fampipoham-bolay ao.
2 Nahatrea ze ampela vantotse mahantra nampipoke vola roe* tena kidikidy rezay reke naho fa niavy eo.
3 Le hoe ty Jesosy: “Volagneko ama’areo,* fa o ampela vantotse mahantra iohoe ty nagnomey bey ambone iareo iaby.
4 Ty anto’e, iareo iaby nampipoke vola tao rey, le ze sisasisa’e fa tsy lany iareo ty napò iareo ao. Fa o ampela iohoe ndra tie mahantra aza, le napò’e iaby i vola mba ho niveloma’ey.”
5 Tafara izay, naho fa nisy nirehake tama’e miomba i tempolỳ naho ty hasoasoa ty vato namboaragne aze vaho ty raha natokagne ho an’Andrianagnahare tao,
6 le hoe reke: “Hai’areo o raha trea’areo amy izao reo, ho avy ty andro handrotsahagne aze, le tsy hisy vato hifanongoa ndra raike ty ama’e eo.”
7 Le nagnontane aze iareo tie: “O Mpagnanatse, ombia ty hisehoa ze raha rezay? Le ino ty ho famantaragne tie fa hiseho ze raha rezay?”
8 Le hoe reke: “Mitaoa nareo mba tsy ho voafitake, satria ho maro ty ho avy amy ty agnarako, le hirehake tie: ‘Izaho o Kristio’, naho tihoe: ‘Fa marine i fotoagne fa tinondroy.’ Ko magnorike iareo.
9 Ankoatse izay, naho fa maharey aly naho korontagne nareo, le ko matahotse. Ty anto’e, tsy maintsy hiseho hey o raha rehoe faie tsy le avy le ho avy i fara’ey.”
10 Hoe ka reke tamy iareo: “Hisy firenena hanafike firenena, le hisy fanjakagne hialy amy ty fanjakagne.
11 Hisy horohoron-tane mahery ka, le hisy hakeré naho arete-manjamagne amy ty toeragne sambe hafa. Hahatrea raha mampatahotse naho famantaragne amy i lagnitsey ey ka o ndatio.
12 “Faie aloha ty hisehoa o raha rehoe, le hotsepahe o ndatio naho henjehe iareo nareo, sady hoente iareo amo o sinagogao agne naho hogadrae iareo. Hoente iareo amo o mpanjakao agne naho amo o governorao agne ka nareo noho ty agnarako.
13 Faie afake ty ho vavolombeloko agnatreha iareo eo nareo amy izay.
14 Izao areke ty raha anò am-po’areo ao: Ko eretseretegne mialoha tie akore ty fomba hiarova’areo ty tegna’areo.
15 Ty anto’e, homeako rehake naho fahendreagne tsy hay o fahavalo’areò resegne naho toheregne nareo.
16 Ankoatse izay, ndra ty rae aman-drene’areo naho ty rahalahi’areo naho ty longo’areo vaho ty nama’areo aza, le hanolotse anareo amo o zizio, sady hisy ama’areo hovonoegne.
17 Hoheje ze kila ndaty iaby ka nareo noho ty agnarako.
18 Faie ndra ty raike amy ty volo’areo aza tsy hisy hiombotse.
19 Naho miaretse nareo, le ho voavonje.
20 “Faie naho fa trea’areo tie, misy maramila mitobe magnodidigne i Jerosalema, le fantaro’areo tie fa marine ty handravagne aze.
21 Ao areke ze a Jodia ao, hilay am-bohitse agne. Ze a Jerosalema ao, hiala ty ao, le ze ambanevohitse agne tsy hiheregne a Jerosalema ao sasa,
22 satria ho sazean’Andrianagnahare o ndatio amo o andro rehoe, amy izay hotanterake ze raha iaby voasoratse amy i Soratse Masigney ao.
23 Loza ty hanjò ze ampela mivesatse naho ze mampinono amy ze andro zay! Ty anto’e, hisy haoream-bey ty amy i taney ao amy ze fotoagne zay sady hanoro ty havignera’e amy ty ndaty ao ty Andrianagnahare.
24 Hovonoegne amy ty mesabey naho hoentegne ho ndevo amy ty firenena hafa* agne iareo. Holiàlià o firenena hafao ka ty Jerosalema, amparake ty hitampera ty fotoagne fa tinondro hoahy o firenena hafao.
25 “Hisy famantaragne ka ty amy i masoandroy ey naho amy i volagney ey vaho amo o vasiagneo ey. Hotakenanan-tsahogne ty ndaty ambone tane etoa, satria tsy hay iareo ty raha hatao noho ty fidobo i riakey mafe naho ty fivalitaboa’e.
26 Hotonta noho ty taho’e naho ty fandignisagne ty raha hiseho ambone tane etoy o ndatio, satria hoezegnezegnegne ty hery i lagnitsey.
27 Afara izay, le hotrea iareo ho avy amy ty heri’e naho ty voninahi’e lahibey amy i rahogney ey i Ana o ndatỳ.
28 Faie naho fa manomboke miseho o raha rehoe, le mitsangana naho miandrà nareo satria fa marine ty fagnavotagne anareo.”
29 Izao ka ty raha nirehafe’e tamy iareo naho fa niavy eo: “Dineho’areo o fihamio* naho ty hatae hafa.
30 Naho fa misy rave’e mitiry ty ama’e ey, le hai’areo tie fa ho avy i asaray.
31 Hoe izay ka fa naho fa trea’areo miseho o raha rehoe, le fantaro’areo tie fa marine i Fanjakàn’Andrianagnaharey.
32 Volagneko ama’areo, fa tsy ho foagne ty taranake toy, amparake ty hisehoa o raha rehoe.
33 Hofoagne i lagnitsey naho ty tane toy, fa ty raha rehafeko tsy ombia hofoagne.
34 “Faie mitaoa nareo mba tsy hihinagne maro loatse naho hinon-toake losotse vaho hinekoneko miomba ty raha paliae’areo. Tsy mone tsy hampoize’areo ty hiavia ze andro zay,
35 manahake o biby voafandrikeo. Ty anto’e, tsy hisy afake hilay o andro iohoe ze kila ndaty ambone tane etoy.
36 Miambena lognandro areke, le mihalalea avao ka, amy izay hovita’areo ty hilay ze raha tsy maintsy hiseho rezay naho ty hitsangagne agnatreha i Ana o ndatỳ eo.”
37 Naho fa handro ty Jesosy, le mampianatse amy i tempolỳ ao. Fa naho fa halegne reke miala i tanàgney, le mandeha amy i Vohitse Olivay agne.
38 Mbe maraindray bey, le fa avy amy i tempolỳ ao o ndatio mba hitsanogne aze.
Fagnamarehagne ambane peje
^ Grike: “leptona roe.”
^ Abt: “Volagneko ama’areo to vata’e.”
^ Abt: “iaby.”
^ Ndra: “aviavio.”
