Talily Soa Nisorate i Marka 11:1-33
11 Naho fa niavy tamy i Vohitse Olivay eo iareo, i misy i Betifaga naho i Betaniay, le nagnirake roe lahy tamy i mpiana’e rey ty Jesosy. Marine i Jerosalema o toeragne iohoe.
2 Hoe reke tamy i mpiana’e rey: “Mandehana amy ty tanàgne roy ey nareo. Naho vaho mizilike ao nareo, le hahatrea anam-birìke mirohy. Mbe tsy nitingira o ndaty o anam-birìke iohoe. Hahao’areo reke, le indeso’areo mbetoa.
3 Naho misy ndaty mirehake anareo tie: ‘Hatao’areo ino iò?’ Le rehafo’areo tie: ‘Paliae i Tompo, faie mbe haheregne eto avao naho fa avy eo.’”
4 Nandeha areke iareo, le nahatrea anam-birìke nirohy tan-dala ze tragno narine i arabeỳ zay. Le nihahà iareo i anam-birìkey.
5 Faie ty ila’e amy ty ndaty teo nirehake tamy iareo tie: “Hatao’areo inogne o anam-birìkeo ie hahà’areò?”
6 Le nirehafe iareo i raha nampirehafe i Jesosy iareoy, le nenga i ndaty rey hindese iareo i anam-birìkey.
7 Nindese iareo mbamy i Jesosy mbeo i anam-birìkey, le natao iareo ambone’ey i akanjobey iareoy, le nitoboke ambone’e eo ty Jesosy.
8 Maro ka ty ndaty nandafike ty akanjobei’e tagn’arabey ey, fa ty ila’e nanapake ran-katae misy rave’e boake an-teteke ey.
9 Ty ila’e amy i ndaty rey nandeha taloha i Jesosy ao fa ty ila’e tafara’e ao. Nikorakorake iareo tie: “O Andrianagnahare, mba rombaho reke! Hotahiegne abey i avy amy ty tahina i Jehovah-y!
10 Hotahiegne abey i Fanjakagne ho avy, ahy i Davida razambeintikagney! Mba rombaho reke, ihe miambesatse an-dindìgne ao!”
11 Naho fa niavy ta Jerosalema ao reke, le nandeha tamy i tempolỳ agne sady nagnente ze raha tagne. Faie fa ho nihariva i androy, le nandeha ta Betania agne reke naho i 12 lahy rey.
12 Ie nihamaray igne, tamy iareo niala ta Betania agney, le nikeré ty Jesosy.
13 Nahatalake fihamy* nitiry zay reke, le nandeha mbeo mba hagnente tie kera misy voa’e. Faie ie reke niavy ey, le tsy nahatrea voa’e ndra raike fa rave’e avao, satria mbe tsy fotoagne famoa o fihamio tamy izay.
14 Le hoe ty Jesosy tamy i fihamỳ: “Lelia’e tsy hamoa sasa rehe.” Nirey i mpiana’e rey ze reha’e zay.
15 Naho fa niavy ta Jerosalema agne iareo, le nizilike tamy i tempolỳ ao ty Jesosy, le niroahe’e iaby i ndaty mpamarotse naho mpivily raha amy i tempolỳ ao rey. Natonta’e ka ty lataba o ndaty mpanakalo volao naho ty seza o mpamarotse voromahilalao,
16 sady tsy nisy ndaty nenga’e hinday raha amy i tempolỳ ao.
17 Nampianatse reke sady nirehake tihoe: “Tsy voasoratse* vao tie: ‘Ty tragnoko hatao tragno fivavahagne hoahy ze hene ndaty? Faie inareo manao aze ho lakato fietaha o malasò.’”
18 Naho fa naharey izay o lahibey ty mpisorogneo naho o mpampianatse lalànao, le nanomboke nipay hevetse mba hamonoagne aze. Ty anto’e, natahotse aze iareo satria nigaga noho ty fampianara’e o ndatio.
19 Ie naho fa nihariva i androy, le niala i tanàgney iareo.
20 Faie ie nimaraindray, le nitrea iareo tamy iareo nandeha an-dalagne eỳ tie fa nimate reketse ty vaha’e i fihamỳ.
21 Nitsiaro i Petera i raha nisehoy, le hoe reke: “O Raby,* henhenke fa nimate i fihamy nozogne’oy.”
22 Le hoe ty navale i Jesosy iareo: “Minoa an’Agnahare.
23 Volagneko ama’areo,* fa ndra ia ndra ia mirehake amy ty vohitse roy tie: ‘Miongaha, le mitontà an-driake agne’, sady tsy misalasala am-po’e ao reke fa tena mino tie hiseho zay, le hiseho vata’e.
24 Izay ty mahavy ahy mirehake ama’areo tie ze raha angatahe’areo amy ty vavake, le hoazo’areo vata’e naho mino nareo tie fa azo’areo.
25 Naho fa mitsangagne mba hivavake nareo, le mamelà ty helo ze ndaty nanao hadisoagne tama’areo, amy izay hamela ty hadisoa’areo ka i Rae’areo an-dagnitse agney.”
26 ——
27 Le niavy ta Jerosalema agne indraike iareo. Naho fa nandeha tamy i tempolỳ ao reke, le nandeha mbama’e mbeo o lahibey ty mpisorogneo naho o mpampianatse lalànao vaho o mpitarike jiosio,
28 le hoe iareo tama’e: “Fahefagne boake aia ty anoa’o o raha rehoe? Ndra, ia ty nagnomey azo fahefagne hanao o raha rehoe?”
29 Le hoe ty Jesosy tamy iareo: “Hagnontane raha raike anareo ka raho. Naho valea’areo raho, le horehafeko ama’areo ka tie fahefagne boake aia ty anoako o raha rehoe.
30 Boake an-dagnitse agne sa boake ama o ndaty ty nahazoa i Jaona fahefagne hanao badisa? Valeo’areo raho.”
31 Le nifampirehake iareo tie: “Naho mirehake tika tie: ‘Boake an-dagnitse agne’, le hirehake reke tie: ‘A nagnino ie tsy inoa’areò?’
32 Faie itika ka anio tsy hahavany hirehake tie: ‘Boake ama o ndaty!’” Ty anto’e, natahotse i vahoakey iareo satria nino i vahoakey tie mpaminany ty Jaona.
33 Hoe areke ty navale iareo i Jesosy: “Tsy fanta’ay.” Le hoe ty Jesosy tamy iareo: “Tsy horehafeko ama’areo ka areke tie fahefagne boake aia ty anoako o raha rehoe.”
Fagnamarehagne ambane peje
^ Ndra: “aviavy.”
^ Ndra: “Rehafe ty Soratse Masigne.”
^ Agnaram-boninahitse nirehafagne ty Mpampianatse jiosy.
^ Abt: “Volagneko ama’areo to vata’e.”
