Talily Soa Nisorate i Marka 14:1-72
-
Nipay fomba mba hamonoagne i Jesosy o mpisorogneo (1, 2)
-
Menake magnitse nailigne tamy i Jesosy (3-9)
-
Nifotetse i Jesosy ty Jodasy (10, 11)
-
I Pasake fara’ey (12-21)
-
Mahakama Hariva i Tompo voaloha’e (22-26)
-
Nirehake ty Jesosy tie handietse aze ty Petera (27-31)
-
Nivavake ta Getsemane ao ty Jesosy (32-42)
-
Nitsepahegne ty Jesosy (43-52)
-
Nitsaraegne tamo o Fitsaragne Ambone Jiosio eo ty Jesosy (53-65)
-
Nandietse i Jesosy ty Petera (66-72)
14 Roe andro ty sisa, le ho avy i Pasakey naho i Fete ty Mofo Tsy Misy Lalivaỳ.* Le nipay fomba hanoagne kitomboke i Jesosy naho hitsepahagne aze o lahibey ty mpisorogneo naho o mpampianatse lalànao mba hamonoagne aze.
2 Faie hoe iareo: “Aleo tsy ataontikagne amo o andro feteo, amy izay tsy mikorontagne o vahoakeo.”
3 Tamy iareo nihinagne tan-tragno i Simona boka ta Betania aoy, le nisy ampela ninday menake magnitse tamy ty tavoangy kedekede zay nimbama’e mbeo. Narda tsy mitampoke o menake iohoe. Nisokafe i ampelay i tavoangỳ, le naili’e tan-doha i Jesosy eo i menakey.
4 Niboseke ty ila’e amy i mpianatse rey, le hoe iareo: “Nagnino i menake magnitsey ie ariariagne avao hoe igneo?
5 Naho navily zao i menake magnitsey, le ho nahazo mihoatse ty 300 denaria, le mba afake nimeagne o mahantrao ty vili’e.” Le nendakendaha iareo i ampelay.
6 Faie hoe ty Jesosy tamy iareo: “Engao’areo avao reke. Magnino reke ie rehadrehafe’areò? Fanjaka ty raha natao’e tamako.
7 Ty ama’areo eo lava hisy ndaty mahantra avao, le isake tie te hanao soa amy iareo nareo, le afake manao izay. Fa iraho tsy raha ho ama’areo eo avao.
8 Nanao ze niazo’e natao reke, le naili’e amy ty vatako i menake magnitsey mba ho fagnomanagne i fandevegnagne ahỳ.
9 Volagneko ama’areo,* fa ndra aia ndra aia itoriagne i talily soay amy ty tane toy iaby, le horehafegne ka i raha natao i ampelaỳ mba ho fahatsiarovagne aze.”
10 Le nandeha amo o lahibey ty mpisorogneo agne ty Jodasy Iskariota, raike amy i 12 lahy rey, mba hirehake amy iareo ty fomba hanolora’e i Jesosy iareo.
11 Tena nifale iareo naho fa naharey izay sady nampitamà i Jodasy tie hagnomey aze vola.* Nipay fotoagne mete areke reke mba hifoteragne i Jesosy.
12 Tamy ty andro voaloha’e amy i Fete ty Mofo Tsy Misy Lalivaỳ, amy i andro famonoagne biby hohanegne amy ty Pasakey, le hoe i mpiana’e rey tamy i Jesosy: “Aia ty tea’o hagnomana’ay i hanegne hariva amy i Pasakeỳ?”
13 Le hoe reke tamy i mpiana’e roe lahy hirahe’e rey: “Mandehana a Jerosalema agne fa hifanojo amy ty lahilahy minday rano amy ty siny tane nareo. Oriho’areo reke,
14 le midira amy ze tragno idira’e. Le rehafo’areo i tompon-tragnoy tie: ‘Izao ty nirehafe i Mpagnanatsey: “Aia ty tragno fandrambesagne ambahiny afake hihinanako i hanegne hariva amy i Pasakeỳ miarake amo o mpianakò?”’
15 Le hotoroa’e efetse malalake ambone amy i tragno’e etazey ao nareo. Fa voaomagne soa o tragno iohoe. Ao ty agnomano’areo i Pasakey ho antika.”
16 Nandeha areke i mpianatse rey, le nitrea iareo iaby i raha nirehafe’e tamy iareoy sady nomane iareo i Pasakey.
17 Naho fa ho nitsofotse i androy, le niavy ty Jesosy naho i mpiana’e 12 lahy rey.
18 Tamy iareo nandre nitso-kiho tamy i latabatsey eo mba hihinagney, le hoe ty Jesosy: “Volagneko ama’areo, fa hifotetse ahy ty raike ama’areo miarake mihinagne amako toa.”
19 Tena nalahelo iareo naho fa naharey izay, le nagnontane aze tsikiraidraike iareo tie: “Iraho vao zay?”
20 Le hoe reke tamy iareo: “Ty raike ama’areo 12 lahy, le ze miarake mandògne ty mofo’e reketse ahy agnate finga bole ao.
21 Homate i Ana o ndatỳ arake ty fa nirehafe ty Soratse Masigne, faie hoazon-doza ze ndaty mifotetse i Ana o ndatỳ! Soa aza naho tsy naterake ze ndaty zay.”
22 Tamy iareo mbe nihinagney, le nangalake mofo reke, le avy eo nivavake. Nitapahe’e i mofoy, le nimea’e i mpiana’e rey sady hoe reke tamy iareo: “Rambeso toy, le hano. Intoy ty vatako.”
23 Nirambese’e ka i kope misy divaỳ tafara izay. Naho fa boake nivavake reke, le natolo’e i mpiana’e rey. Le ninogne tamy i divaỳ i mpiana’e rey.
24 Le hoe reke tamy iareo: “Intoy ty lioko, le i ‘lio ty fifagnekeagne’, hatégne hoahy ty ndaty maroy.
25 Volagneko ama’areo, fa tsy hinogne divay sasa raho, amparake ty hiavia i andro hinomako divay vaovao amy i Fanjakàn’Andrianagnaharey aoy.”
26 Nandeha tamy i Vohitse Olivay agne iareo naho fa boake nanao hira fideragne an’Agnahare.
27 Le hoe ty Jesosy tamy iareo: “Hienga ahy iaby nareo, satria voasoratse tie: ‘Hovonoeko i mpiarakey, le hiparitake iaby i agnondri’ey.’
28 Faie afara ty hamelomagne ahy indraike amy ty mate, le hozoe’areo a Galelia agne raho.”
29 Faie hoe ty Petera tama’e: “Ndra tie hienga azo iaby aza iareo, iraho tsy mba hanao izay.”
30 Le hoe ty navale i Jesosy aze: “Volagneko ama’o, fa mbe tsy mikekeo fagnindroe’e i akohoy, le handietse ahy intelo rehe tie androany halegne.”
31 Faie nizizo ty Petera tie: “Ndra tie ho mate reketse azo aza raho, le tsy ombia handietse azo zao.” Le nirehake hoe izay ka i mpianatse ila’e rey.
32 Naho fa niavy tan-tonda Getsemane agne iareo, le hoe ty Jesosy tamy i mpiana’e rey: “Mitoboha etoa nareo fa handeha hivavake hey raho.”
33 Le nente’e niarake tama’e ty Petera, i Jakoba naho i Jaona. Nanomboke nalahelo naho ninekoneko mafe reke.
34 Le hoe reke tamy iareo: “Tsemboke mafe manahake o ndaty fa homateo raho. Mijanogna etoa nareo, le ko miroro fa miambena avao.”
35 Niala lavidavitse ty eo reke, le nitongaleke sady nivavake taman’Agnahare mba tsy hiatreha’e i fotoan-tsarotsey naho mete.
36 Le hoe reke: “O Baba, hai’o iaby ze kila raha. Afaho amako ty kope toy naho mete, faie tsy ze teako ro hatao fa ze tea’o.”
37 Naho fa nimpoly reke, le nitrea’e iareo tie niroro. Le hoe reke tamy i Petera: “O Simona, nagnino rehe ndra mirorò? Le tsy mba nahavita tsy niroro rehe ndra tie lera raike avao aza?
38 Miambena naho mivavaha lognandro nareo amy izay hahatohetse tsapa hevetse. Mazoto* avao i saigney faie i nofotsey ro maleme.”
39 Le nandeha nivavake indraike reke faie mbe i reha’e teoy avao ro nahere’e.
40 Le nimbamy iareo mbeo indraike reke, le nizoe’e niroro iareo satria navesatse ty maso iareo. Tsy nahatrea raha havale i Jesosy areke iareo.
41 Naho fa niheregne tamy iareo teo fagnintelo’e reke, le hoe reke tamy iareo: “Le mbe miroro naho mitofa avao vao nareo amy ty fotoagne hoe izao? Soa hinane zay! Fa avy i leray! Hatolotse an-tagna o mpanotao eo i Ana o ndatỳ.
42 Mitsangana, le andao tika handeha. Fa marine i mpifotetse ahỳ.”
43 Teo naho eo avao, tamy ireke mbe nirehakey, le niavy boake agne ty Jodasy, raike amy i apostoly 12 lahy rey. Nisy vahoake maro ninday mesabey naho doda ty niarake tama’e, nirahe o lahibey ty mpisorogneo naho o mpampianatse lalànao vaho o mpitarike jiosio.
44 Fa nirehake ty fomba hamantara i ndaty rey i Jesosy i mpifotetsey tie: “Ze orofako amy iareo ro ie, le tsepaho’areo reke sady ambeno’areo soa.”
45 Le avy le nagnitsy mbamy i Jesosy mbeo reke sady nirehake tie: “Akore Raby!”* Le norofa’e reke.
46 Nitsepahe i vahoake rey ty Jesosy sady nindese iareo.
47 Faie nisy raike tamy iareo nitsangagne teo rey nanarike i mesabei’ey, le nanapake ty sofy i mpanompo i mpisorombeỳ.
48 Le hoe ty Jesosy tamy iareo: “Minday doda naho mesabey manahake o ndaty hitsepake malasò vao nareo tie hitsepake ahy?
49 Nampianatse isan’andro isan’andro tamy i tempolỳ ao avao raho faie tsy nitsepahe’areo. Faie miseho zao, amy izay tanterake ty raha rehafe ty Soratse Masigne.”
50 Le nienga aze iaby i mpiana’e rey sady nilay.
51 Nisy ajalahy raike nagnisy akanjo vita tamy ty rongony tena fanjaka zay nagnorike aze.* Faie ho nitsepahe i vahoake rey reke,
52 le nenga’e eo i akanjo’ey, le nilay tsy nisikigne reke.
53 Nindese iareo mbamy i mpisorombeỳ mbeo ty Jesosy, satria fa nivory tao iaby o lahibey ty mpisorogneo naho o mpampianatse lalànao vaho o mpitarike jiosio.
54 Faie nagnorike i Jesosy lavidavitse tey avao ty Petera. Ie naho fa niavy tamy ty kiririsa i mpisorombeỳ tao reke, le niarake nitobotoboke tamy i mpanompo rey mba hamindro.
55 Nipay vavolombelogne hanao kitomboke i Jesosy o lahibey ty mpisorogneo naho o Fitsaragne Ambone Jiosio mba hamonoagne aze, faie tsy nahatrea raha hanoagne kitomboke aze ndra raike iareo.
56 Maro ty vavolombelogne nanao kitomboke aze faie nifanohetse ty raha nirehafe iareo.
57 Nisy vavolombelogne hafa ka nitsangagne teo, le nirehake raha vande miomba aze tie:
58 “Nirei’ay reke nirehake tie: ‘Horavako ty tempoly namboaregne tagnagne toy, le hamboatse tempoly tsy namboaren-tagnagne agnate ty telo andro raho.’”
59 Faie ndra izay aza, le mbe nifanohetse avao ty raha nirehafe i vavolombelogne rey.
60 Le nitsangagne tagnivo iareo eo i mpisorombeỳ sady nagnontane i Jesosy tie: “Nagnino ihe tsy mamaleo? Tsy rei’o vao o raha rehafe o lahireo miomba azo zao?”
61 Faie nitsìgne avao ty Jesosy fa tsy namale. Nagnontane aze indraike i mpisorombeỳ tie: “Ihe vao o Kristy Ana i Andrianagnahare Fara’e Masigney io?”
62 Le hoe ty Jesosy: “Eka iraho. Hotrea’o mitoboke ankavana i Fara’e Maherỳ eo i Ana o ndatỳ sady ho avy amy i rahogne amy i lagnitsey eỳ.”
63 Le nandriatse i akanjo’ey i mpisorombeỳ sady hoe reke: “Ino ka hinane zay ty mbe ipaliavantikagne vavolombelogne?
64 Ie rei’areo nanivetive an’Agnahare anianỳ. Akore areke ty heve’areo?” Le sambe nagneke iaby iareo tie fagneva ty hovonoegne reke.
65 Le nandrorà iareo ty tarehe i Jesosy. Nirakofa iareo lamba reke naho fa niavy eo, le nikomondroe iareo sady hoe iareo tama’e: “Naho toe mpaminany vata’e rehe, le rehafo ama’ay tie ia o nikomondro azò!” Naho fa boake nitakapihe iareo reke, le nente i mpiambegne rey.
66 Tamy i Petera mbe tamy i kiririsa ambane aoy, le nisy mpanompo i mpisorombeỳ ampela zay niavy teo.
67 Naho fa nahatrea i Petera namindroy reke, le nihentea’e maharetse ty Petera sady hoe reke: “Niarake tamy i Jesosy te Nazareta ka rehe.”
68 Faie nandietse hoe izao ty Petera: “Tsy fantako reke sady le morogn’ahy ka ze o raha rehafe’o zao.” Niala ty eo reke, le nandeha mbamy i vavahadỳ mbeo.
69 Nitrea i ampela mpanompo i mpisorombeỳ reke, le hoe indraike i ampelay tamy ze ndaty teo: “Nama iareo ka reke.”
70 Faie mbe nandietse indraike reke. Naho fa niavy eo, le hoe i ndaty nitsangagne teo rey tamy i Petera: “Nama’e vata’e rehe satria boake a Galelia agne.”
71 Faie niozogne naho nifanta ty Petera tie: “Tsy fantako ze o lahilahy rehafe’areo zao!”
72 Le avy le nisy akoho nikekeo fagnindroe’e tamy izay. Le nitsiaro i Petera i raha nirehafe i Jesosy tama’e tihoey tie: “Mbe tsy mikekeo fagnindroe’e i akohoy, le handietse ahy intelo rehe.” Tena nalahelo reke, le nitagny.
Fagnamarehagne ambane peje
^ Ndra: “Karibonaty.”
^ Abt: “Volagneko ama’areo to vata’e.”
^ Abt: “volafotsy.”
^ Ndra: “Vognogne.”
^ Agnaram-boninahitse nirehafagne o Mpampianatse jiosio.
^ Abt: “nagnorike aze marine.”
