Talily Soa Nisorate i Marka 9:1-50
-
Niova ty tarehe i Jesosy (1-13)
-
Nisitragne i ajaja lahilahy nisy demoniay (14-29)
-
Tsy misy raha tsy hovita ty ndaty manam-pinoagne (23)
-
-
Nirehafe i Jesosy indraike tie hovonoegne reke (30-32)
-
Nialy hevetse i mpianatse rey tie ia ty ambone amy iareo (33-37)
-
Manohagne antikagne ze tsy manohetse antika (38-41)
-
Raha mampiala amy ty finoagne (42-48)
-
“Manàgna sira agnate’areo ao” (49, 50)
9 Hoe ka reke tamy iareo: “Volagneko ama’areo,* fa misy ama’areo magnatreke etò tsy homate, amparake ty ahatreava iareo tie fa minday i Fanjakàn’Andrianagnaharey.”
2 Ie enegne andro tafara izay, le nindese i Jesosy tamy ze vohitse abo bey zay agne ty Petera naho i Jakoba vaho i Jaona. Le niova tagnatreha iareo eo ty tarehe i Jesosy.
3 Nanjare foty bey i akanjo’ey. Tsy nisy mpanasa lamba nahavita nampalio lamba manahake izay ty ambone tane etoy.
4 Nahatrea i Elia naho i Mosesy nifampirehake tamy i Jesosy ka iareo.
5 Le hoe ty Petera tamy i Jesosy: “O Raby,* soa ho antika ty mitoboke eto. Engao zahay hanangagne tragnolay telo. Ty raike ho azo, ty raike hoahy i Mosesy, le ty raike hoahy i Elia.”
6 Tsy nihai’e ty raha ho nirehafegne satria tena natahotse iareo.
7 Nisy rahogne niforogne ty tambone iareo eo, le nisy fiaragnanagne ty boake amy i rahogney ao nanao tihoe: “Io i Anak’isokoy. Tsanogno’areo reke.”
8 Le nagnente ty magnodidigne aze iareo, faie tampoke teo, le tsy nahatrea ndra ia ndra ia iareo naho tsy i Jesosy avao.
9 Tamy iareo nizotso boake am-bohitse eỳ, le rinara i Jesosy mafe iareo mba tsy hitantara ndra amy ia ndra amy ia i raha nitrea iareoy, amparake ty amelomagne amy ty mate i Ana o ndatỳ.
10 Le nazily iareo am-po i reha’ey* faie nifampirehake ka iareo tie: ‘Ino ty tea’e horehafegne amy tihoe hovelomegne amy ty mate reke?’
11 Nagnontenea iareo ty Jesosy tie: “Nagnino o mpampianatse lalànao ro mirehake tie, tsy maintsy ho avy aloha i Kristy hey ty Elia?”
12 Le hoe reke tamy iareo: “Tsy maintsy ho avy vata’e hey ty Elia, le hagneregne indraike ze raha iaby amy ty toe’e. Faie nagnino areke ty Soratse Masigne ro nirehake tie tsy maintsy hampijaléjalégne hey naho tsy hisiagne dika’e i Ana o ndatỳ?
13 Faie rehafeko ama’areo, fa niavy ty Elia naho ty maregne, le natao iareo tama’e ze raha nitea iareo hatao, arake ty fa nisorategne miomba aze.”
14 Naho fa nandeha mbamy i mpianatse ila’e rey mbeo iareo, le nitrea iareo tie nisy ndaty maro nagnodidigne iareo. Nisy mpampianatse lalàna nialy hevetse tamy iareo ka ty teo.
15 Faie naho vaho nitrea i ndaty maroy ty Jesosy, le nigaga iareo. Nilay mbama’e mbeo areke iareo sady nanalama aze.
16 Le hoe reke tamy i ndaty rey: “Ino o raha ialia’areo hevetse amy iareò?”
17 Le hoe ty raike tamy i ndaty rey: “O Mpagnanatse, nenteko ama’o atoy i ana-dahikoy, satria misy demonia mahamoagne.
18 Naho fa mitrobo aze i demoniay, le foréforé’e an-tane eo reke, le mamore ty vava’e, sady mihily ka ty vaza’e, le manjare maleme reke amy ty fara’e. Fa nangatake o mpiana’o reo raho mba handroake i demoniay faie tsy nivita iareo ty nandroake aze.”
19 Le hoe ty navale i Jesosy iareo: “Ry taranake tsy manam-pinoagne, hatrake ombia ty tsy maintsy hijanognako ama’areo eto? Hatrake ombia ty tsy maintsy handeferako ama’areo? Indeso’areo mbetoa i ajajay.”
20 Nindese iareo mbama’e mbeo areke i ajaja lahilahỳ, faie naho vaho nahatrea aze reke, le natao i demoniay nifanitotsintogne, le avy eo nitonta an-tane eo. Tafara izay, le nakopokopo’e i ajajay, le namore ty vava’e.
21 Hoe ty Jesosy tamy i rae i ajajaỳ: “Nanomboke ombia ty nahazoa o raha io aze?” Le hoe reke: “Amparake ty naha ajaja aze.
22 Mateteke reke ro atora i demoniay agnate afo ao naho agnate rano ao mba hamonoa’e aze. Faie naho mba misy raha azo’o atao, le iferegneso zahay sady ampeo.”
23 Le hoe ty Jesosy tama’e: “Naho ‘misy azo’o atao, hoe rehe’! Tsisy raha tsy hovita ty ndaty manam-pinoagne anio.”
24 Le avy le namale mafe i rae i ajajay tie: “Manam-pinoagne raho! Ampeo raho amy ze mbe tsy ampe amy ty finoako!”*
25 Naho fa nitrea i Jesosy tie nifanisike mbama’e mbeo i vahoakey, le niroahe’e i demoniay tie: “O demonia mahamoagne naho mahakaregnegne, mandily azo raho mba hiakatse boake amo o ajajao ao sady tsy hiheregne ao sasa!”
26 Le niakatse i demoniay naho fa boake nampikorakorahe’e naho natao’e nifanitotsintogne i ajajay. Tafara izay, le nanahake o ndaty mateo i ajajay. Nirehake areke ty ankamaroa i ndaty teo rey tie: “Mate reke!”
27 Faie nirambese i Jesosy i tagna’ey, le nampitsangane’e reke, le nitsangagne.
28 Naho fa nizilike tamy ze tragno raike zay iareo, le nagnontane aze i mpiana’e rey tie: “Nagnino igne ro tsy nivita’ay ty nandroake aze?”
29 Le hoe reke tamy iareo: “Tsy mete miala i karazan-demonia teoy naho tsy amy ty alala ty vavake.”
30 Niala ty eo iareo, le nandeha a Galelia agne. Faie tsy nitea’e ho fanta o ndatio tie ho aia reke.
31 Ty anto’e, te hampianatse i mpiana’e rey reke. Hoe reke tamy iareo: “Hisy hifotetse i Ana o ndatỳ, le hatolo’e an-tagna o ndatio eo mba hovonoe iareo. Faie ndra tie mate aza reke, le hovelogne naho fa afake telo andro.”
32 Tsy niazo iareo ty tea’e horehafegne, faie natahotse ka iareo ty hagnontane aze.
33 Le niavy ta Kapernaomy ao iareo. Naho fa nizilike tan-tragno ao iareo, le nagnontenea’e i mpiana’e rey tie: “Ino o raha nialia’areo hevetse tan-dalagne eio?”
34 Faie nitsìgne avao iareo satria o raha nialia iareo hevetseo le tihoe, ia ty fara’e ambone amy iareo.
35 Nitoboke areke ty Jesosy, le nitokave’e i 12 lahy rey sady hoe reke tamy iareo: “Ze te ho voaloha’e, le tsy maintsy ho fara’e sady hanompo anareo iaby.”
36 Le nangalake ajaja ty Jesosy sady natao’e agnivo iareo eo. Natao’e an-tsoro i ajajay eo i tagna’ey sady hoe reke tamy iareo:
37 “Ze mandrambe ty ajaja hoe itoy amy ty agnarako, le mandrambe ahy ka. Le ze mandrambe ahy, le tsy iraho avao ro rambese’e fa i nagnirake ahỳ ka.”
38 Le hoe ty Jaona tama’e: “O Mpagnanatse, nahatrea ndaty nandroake demonia amy ty agnara’o zahay, le rinara’ay reke satria tsy miarake amantika.”
39 Faie hoe ty Jesosy: “Ko raragne reke, satria tsy hisy ndaty hanao fahagagagne amy ty agnarako, faie tampotampoke eo, le avy le hirehake raha raty miomba ahy.
40 Fa ze tsy manohetse antika, le manohagne antika.
41 Ndra ia ndra ia ka magnomey rano kope raike anareo, noho inareo manonjohy i Kristy, le volagneko ama’areo fa tsy maintsy mahazo ty valesoa’e reke.
42 Fa ndra ia ndra ia manao ze hahavy ty raike amy i kidikidy rey tsy hanam-pinoagne sasa, le soa hoahy ze ndaty zay ty agnatognagne vato figosam-bare* ty ambozo’e eo, le atorake an-driake agne.
43 “Naho ty tagna’o ro mahavy azo hanota, le tapaho. Fa ndra aleo’e rehe do-tagnagne, faie hahazo i fiaignagney, ta tie managne tagnagne roe faie hatorake amy i Gehena agne, amy i afo tsy mete matey agne.
44 ——
45 Naho ty tombo’o ka ro mahavy azo hanota, le tapaho. Fa ndra aleo’e rehe do-tomboke faie mahazo i fiaignagney ta tie managne tomboke roe faie hatorake amy i Gehena agne.
46 ——
47 Naho ty maso’o ka ro mahavy azo hanota, le ario lavitse azo. Fa ndra aleo’e rehe toka-maso faie hizilike amy i Fanjakàn’Andrianagnaharey ao ta tie managne maso roe faie hatorake amy i Gehena agne.
48 Ty anto’e, tsy mba mate ty oletse agne, le tsy mete mate ka ty afo agne.
49 “Fa hararake amo o ndatio manahake ty andrarahagne o sirao am-po o hanegneo ao i afoy.
50 Soa o sirao, faie naho o sirao ro manjare matsatso, le akore ty hagneregnagne i tsiro’ey? Managna sira agnate’areo ao areke nareo, le milongoa amy ty hafa lognandro.”
Fagnamarehagne ambane peje
^ Abt: “Volagneko ama’areo to vata’e.”
^ Agnaram-boninahitse nirehafagne ty Mpampianatse jiosy.
^ Ndra va’e: “tsy nirehadrehafe iareo i raha nitrea iareoy.”
^ Abt: “Ampeo raho amy ty tsy fahampeam-pinoako!”
^ Vato bey ahody o birìkeo mba higosagne vare o vato iohoe.
