Talily Soa Nisorate i Matio 8:1-34
-
Lahilahy raike nivoa ty habokagne nisitragnegne (1-4)
-
Maramila manam-boninahitse nanam-pinoagne (5-13)
-
Nagnasitragne marare maro ta Kapernaomy tao ty Jesosy (14-17)
-
Ty toko’e hatao ze te hagnorike ty lia i Jesosy (18-22)
-
Nampijanogne tiobey ty Jesosy (23-27)
-
Nenga i Jesosy hizilike amy i lambo rey ao i demonia rey (28-34)
8 Naho fa nizotso boake am-bohitse ey reke, le nisy ndaty maro nagnorike aze.
2 Nisy lahilahy nivoa ty habokagne* zay nimbama’e mbeo, le nitongaleke taloha’e teo sady nirehake tie: “O Tompo, vita’o ty magnalio ahy, le mba liovo raho naho zoto’o.”
3 Le nitsapae i Jesosy i lahilahỳ, sady hoe reke: “Zotoko zay! Maliova rehe.” Teo naho eo avao, le avy le niafake tamy i lahilahỳ i habokagne nahazo azey.
4 Le hoe ty reha i Jesosy tama’e: “Ao rehe tsy hirehadrehake ama o ndaty! Akia mandehana amo o mpisorogneo agne, le atoloro i fagnomezagne nandilia i Mosesỳ, soa tie hotrea iareo tie fa sitragne vata’e rehe.”
5 Naho fa nilitse ta Kapernaomy tao ty Jesosy, le nisy maramila manam-boninahitse zay nimbama’e mbeo sady nihalale ama’e.
6 Hoe i maramila manam-boninahitsey: “O aba, maleme am-pandreagne an-tragnoko ao avao ze mpanompoko lahilahy zay sady mijale mafe.”
7 Le hoe ty Jesosy tama’e: “Hositragneko reke naho fa avy agne raho.”
8 Faie izao ty navale i maramila manam-boninahitsey: “O aba, tsy fagnevako ty handrambe azo an-tragnoko agne fa mirehafa avao rehe, le hositragne i mpanompokoy.
9 Satria ndra izaho ka managne ndaty afake mikomandy ahy hoe izay, sady managne maramila afake komandieko hoe izay ka. Le naho fa mirehake amy ty raike raho tie: ‘Mandehana!’ le mandeha reke, le amy ty raike ka tie: ‘Avia!’ le avy reke. Naho rehafeko ka o mpanompokò tie: ‘Anò toy!’ le anoe’e i raha ampanoeko azey.”
10 Nilatsa ty Jesosy naho fa naharey izay, le nirehake tamy i ndaty nagnorike aze rey tie: “Volagneko ama’areo,* fa mbe tsy nahatrea ndaty tena nanam-pinoagne hoe izay raho tamo o Israelio eo.
11 Faie rehafeko ama’areo, fa ho maro ty ndaty boake atignanagne naho ahandrefagne hiarake hihinagne an-databatse amy i Abrahama naho i Isaka vaho i Jakoba amy i Fanjakà i lagnitsey ao.
12 Fa ze ana i Fanjakagney hatorake amy i iegne ambalike agney. Agne iareo ro hangoihoy ty tagny naho ho romotse.”*
13 Le hoe ty reha i Jesosy tamy i maramila manam-boninahitsey: “Mandehana areke! Satria rehe manam-pinoagne le ho avy eo vata’e i raha nangatahe’oy.” Le nisitragne tamy i lera igne avao i mpanompo’ey.
14 Naho fa niavy tan-tragno i Petera ao ty Jesosy, le nitrea’e nandre am-pandreagne eo i rafoza i Petera ampelay satria niazo ty tazogne.
15 Nitsapae i Jesosy areke i tagna’ey, le avy le nisitragne i arete’ey. Nifoha reke tafara izay, le nanomboke nikarakara hanegne hoahy iareo.
16 Ie nihariva i androy, le maro ty ndaty nisy demonia nente o ndatio tama’e eo. Nirehafe i Jesosy avao i demonia rey, le avy le niala tamy i ndaty rey. Nisitragne’e iaby ka ze ndaty narare teo.
17 Nanao izay reke, amy izay tanterake i raha nirehafegne tamy ty alala i Isaia mpaminany tihoey tie: “Hagnafake* ty arete’ay naho ty raha mampanaintaigne anay reke.”
18 Naho fa nitrea i Jesosy i ndaty maro nagnodidigne azey, le hoe reke tamy i mpiana’e rey: “Andao tika hifindra a moro’e raike eroy.”
19 Le nisy mpampianatse lalàna raike zay nimbama’e mbeo sady nirehake tie: “O Mpagnanatse, hagnorike azo raho ndra aia ndra aia omba’o.”
20 Faie hoe ty reha i Jesosy tama’e: “O amboahakò manan-davake hitoboha’e, le o vorogneo managne ty tragno’e, fa i Ana o ndatỳ ndra ty hasia’e ty loha’e aza tsy misy.”
21 Tafara izay, le nisy mpianatse nirehake tamy i Jesosy tie: “O Tompo, engao hey raho handeha handevegne an-draeko.”
22 Le hoe ty navale i Jesosy aze: “Magnoriha ahy avao rehe fa engao agne ty mate handevegne ty mate.”
23 Naho fa nijogne tagnate lakagne tao ty Jesosy, le nijogne reketse aze ka i mpiana’e rey, le nandeha iareo naho fa niavy eo.
24 Ie tafara izay, le nisy tiobey tampoke ty tan-driake ey sady nagnonja bey i riakey, le hafarà i lakagney nifeno rano sady fa ho nilenteke. Faie niroro ty Jesosy tamy izay.
25 Le nimbama’e mbeo iareo sady namoha aze. Hoe iareo: “O Tompo, rombaho tika fa homate!”
26 Faie hoe reke tamy iareo: “Nagnino nareo ro matahotse ry kele finoagne?” Le nifoha reke sady nikomandie’e i tiokey naho i riakey mba himpendregne, le nimpendregne vata’e.
27 Le nigaga i mpianatse rey naho fa nahatrea izay, le hoe iareo: “Ty ndaty manao akore loatse itoio rikiahe? Aia ndra o tiokeo naho o riakeo magnorike ty raha rehafe’e.”
28 Ie iareo niavy a moro’e raike ey, le nitoly amy ty faritse raike atao tihoe Gadareana. Nisy lahilahy roe nisy demonia boake an-kibory ey zay nifanampe tamy i Jesosy. Tena naozatse sady nampatahotse iareo, le tsy nisy ndaty nahavany nandeha tamy i toeragne nisy iareoy tey.
29 Le hoe iareo tamy i Jesosy: “O anak’Andrianagnahare, ino ty idira’o amy ty afera’ay? Hagnasaze anay aloha i fotoagne voatondroy vao niavia’o ama’ay etoao?”
30 Nisy lambo maromaro narazegne ty narinerine iareo tey.
31 Naho fa nahatrea i lambo rey i demonia rey, le nihalale tamy i Jesosy tie: “Naho handroake anay rehe, le engao zahay hizilike amy ty lambo rey ronegne ey.”
32 Le hoe reke tamy iareo: “Mandehana areke!” Le avy le niakatse boake amy i lahilahy roe rey tao i demonia rey, le nizilike amy i lambo rey tao. Le nirifatse ty lay i lambo rey, le nipoke tamy ty hantsagne, le nimatemate tan-driake agne.
33 Naho fa nahatrea izay i mpiara-dambo rey, le nandeha nilay an-tanàgne agne. Ie iareo niavy agne, le nitantarae iareo ze raha niseho, agnisa izay ty miomba i lahilahy roe nisy demonia rey.
34 Le niboake iaby ze ndaty tamy i tanàgney ao mba hagnente i Jesosy. Naho fa nahatrea i Jesosy iareo, le nirehafe iareo reke mba hiala i faritse misy iareoy.
Fagnamarehagne ambane peje
^ Ndra: “angamae.”
^ Abt: “Volagneko ama’areo to vata’e.”
^ Abt: “hagnily vazagne.”
^ Ndra: “Hinday.”
