TOKO 8

Akore ty Hahazoako Namagne Hendre?

“Mipay ndaty hitsanogne ahy raho naho fa boseke. Tena teako naho misy mampahery raho naho fa malahelo. Fa ndra tie fale aza raho, le mipay ndaty hiarake mifale amako. Tena ilaegne aloha ty managne namagne naho ty amako!”​—Ialy.

MISY ty mirehake tie ty hiarake hihisa ama’e ty paliave o ajajao, faie ty ahy o tanorao namagne. Tsy mitovy tihoe miarake mihisa naho tihoe mpinamagne.

Ajaja mba miarake ama’o mateteke avao tihoe mpiarake mihisa ama’o.

Mandikoatse izay ty ndaty nama’o, satria ze raha lahibey ama’o, le tea’e ka.

Rehafe ty Baiboly fa ‘tea lognandro ty ragnetse vata’e sady le hoe rahalahy natao hagnampe amy ty andro mahaore.’ (Ohabolana 17:17) Tsy mpiarake mihisa avao areke ty atao tihoe mpinamagne.

Mipay namagne soa rehe amy ihe fa bey zao. Ndaty manao akore areke ty toko’e ho nama’o?

1. Soa toetse

2. Mankatò ze rehafe ty Baiboly

3. Magnampe azo ho hendre

Hoe izay vao ty nama’o? Andao hodinehentikagne tsikiraidraike reo.

1. Soa Toetse

Fantaro zao: Tsy ze ndaty mirehake tie namagne le ho namagne vata’e. Rehafe ty Baiboly aza fa “misy mpiragnetse vognogne hifanimba.” (Ohabolana 18:24) Va’e hirehake rehe tie: ‘A le maregne zay?’ Faie eretsereto zao: Fa nisy ndaty vao somare nirehake ty vata’e ho nama’o faie nagnararaotse azo, ndra nitsiko azo, ndra nagnaraty azo? Azo antoke fa nanjare tsy natoky aze sasa rehe. * Ndra aleo areke namagne tsy ampe faie soa toetse, ta tie managne namagne maro faie raty toetse!

Ino ty toko’e hatao’o? Mifiliana namagne soa toetse mba ho modely ho azo.

“Misy namako zay ty agne, malaza ho soa toetse. Mba te hanahake aze ka raho. Tena teako zay.”​—Saholy, 17.

Anò retoagne:

1. Vakio ty Galatianina 5:22, 23.

2. Eretsereto zao: ‘Managne “vokatse ty fagnahy” vao ty namako?’

3. Sorato ambane eto ty agnara ze tena nama’o. Sorato antsisi’e eo ty toetse’e.

Agnaragne

․․․․․

Toetse

․․․․․

Soso-kevetse: Naho trea’o fa tsy soa ty toetse iareo, tsy aleo vao miova namagne?

2. Mankatò ze rehafe ty Baiboly

Fantaro zao: Va’e ho tendreke namagne raty rehe, naho meke ty hahazo namagne. Hoe ty Ohabolana 13:20: “Hahatrea loza ze miragnetse amy ty tsisy saigne.” Tsy tihoe ndaty tsy mahay ndra tsy misaigne ty teagne horehafegne eo, fa ze tsy midare torohevetse vaho manao raha raty avao. Ndra aleo tsy minamagne amy ty ndaty hoe izay!

Ino ty toko’e hatao’o? Ko meke ty hinamagne amo o ndatio, fa mahaia mifily. (Salamo 26:4) Faie tsy midika zay tie toko’e hagnavakavake rehe. Toko’e handineke soa rehe satria tsy voatere ho ‘maregne naho manompo an’Andrianagnahare’ iaby o ndatio. Misy ka ‘raty fagnahy sady tsy manompo aze.’​—Malakia 3:18.

“Fale raho fa nampea i baba’ay naho i rene’ay hahazo namagne tea manompo an’Andrianagnahare sady mitovy taogne amako.”​—Christophe, 13 taogne.

Valeo retoa:

Marikarike vao rehe naho fa miarake amy ty nama’o kera hampanoe’e raha raty?

□ Eka

□ Aha’a

Aeta’o ty rae aman-drene’o vao tie ia ty nama’o, satria rehe matahotse kera tsy ho tea iareo reke?

□ Eka

□ Aha’a

Soso-kevetse: Naho eka ty toin-dreha’o amy ireo, le mipaliava namagne mankatò ze raha rehafe ty Baiboly, ty dika izay Kristiana matotse.

3. Magnampe azo ho hendre

Fantaro zao: Rehafe ty Baiboly fa “manimba ty toetse soa ty naman-draty.” (1 Korintianina 15:33) Hoe ty Antsa: “Tsy tea o mpiara-mianatse amakò raho naho tsy manao ze raha rehafe’e. Tsy nanagne namagne raho, le ndra aleoko nagneke.” Faie nitrea i Antsa fa tsy mete ty magnorike avao ze raha rehafe o namagneo. Hoe atao iareo fihisagne rehe, satria ampanoe’e avao ze raha tea’e. Le hagneke hatao izay vao rehe?

Ino ty toko’e hatao’o? Ko minamagne sasa amy ze ajaja mamoresé azo hitovy ama’e. Ho tsy ampe ty nama’o faie tsy le harikarike sasa rehe. Hinamagne ama’o ka ze ajaja soa toetse, sady hagnampe azo ho hendre zay.​—Romanina 12:2.

“Misy namako zay ty agne, tena mahay mampahery satria matotse naho soa fagnahy.”​—Jason, 21 taogne.

Valeo retoa:

Te ho tea ty namako vao raho, le manjare marengerenge, manao akanjo tsy magneva ty Kristiana, ndra manao ty fireha iareo?

□ Eka

□ Aha’a

Matahotse o namakò vao raho, le magneke hiarake ama’e amy ty toeragne tsy toko’e handenako?

□ Eka

□ Aha’a

Soso-kevetse: Naho eka ty toin-dreha’o amy ireo, le mangataha torohevetse amy ty rae aman-drene’o, ndra ndaty bey matotse hafa. Mirehafa ka amy ty androanavi-pagnahy, naho Vavolombelo i Jehovah rehe. Agnonteneo reke tie, ia ty azo’o atao namagne, mba hagnampe azo ho hendre.

HENTEO TY BOKE MANONTANY NY TANORA, BOKY FAHA-2, TOKO 9, NAHO MIPAY FAGNAZAVAGNE FAGNAMPE’E REHE

AMY TY TOKO MAGNARAKE

Mitaogne azo hanao raha raty vao ty nama’o, sa tena irehe ro fa ho rese ty tsapa hevetse?

[Fagnamarehagne ambane peje]

ANDININ-TENY MAHASOA

“Misy ka ty ragnetse mipiteke mihoatse ty rahalahy.”​—Ohabolana 18:24.

SOSO-KEVETSE

Mikezaha lognandro hankatò ty raha rehafe ty Baiboly, le hinamagne ama’o ze ndaty hendre. Hotrea’o fa iareo ty tena namagne!

FANTA’O VAO... ?

Tsy magnavakavake ty Andrianagnahare, faie mifily soa ze tea’e ‘hiambahiny amy i tragnolai’ey ao’, ty dika izay ze ndaty atao’e namagne.​—Salamo 15:1-5.

TY RAHA ERETSERETEKO HATAO!

Te hahazo namagne hendre raho, le izao ty hataoko: ․․․․․

Teako ka naho minamagne amy ty ndaty fa zokeko raho. (Manorata agnaragne tsiampeampe.) Ohatse i ․․․․․

Izao ty hagnonteneako i Baba naho i Nene miomba ty raha nirehafegne tamy ty toko toy ato: ․․․․․

AKORE TY HEVE’O?

● Inogne iaby ty toetse tea’o hanagna ty nama’o? Ino ty anto’e?

● Inogne iaby ty toetse toko’e hikezaha’o hanagnagne, mba hahavy ty nama’o vao mainke ho tea azo?

[Rehake nalaegne]

“Nisy ajaja tsy nengà i baba’ay hiarahako. Faie nieretseretse raho tie: ‘A iraho tsy hiova namagne! Iareo avao ty teako.’ Tsapako naho fa tafara tatoy fa tsy mete vata’e ty minamagne amy iareo. Nandineke soa raho, le nahatsapa fa kay maro ty ajaja hendre azo iarahagne.’’​—Faly

[Efajoro]

Andramo Atao Retoagne:

Mirehafa amy ty rae aman-drene’o. Agnonteneo aze ty ajaja natao’e namagne, tamy tie reke nitovy taogne tama’o. Nanegnegne vao reke niarake tamy iareo? Naho eka, ino ty anto’e? Agnonteneo aze tie, ino ty azo’o atao, mba tsy ho tratse izay.

Atorò ty rae aman-drene’o ty nama’o. Naho misalasala rehe, le eretsereto tie: ‘Ino ty anto’e mahavy ahy tsy sahy?’ Matahotse vao rehe tie ke tsy ho azoazo i rae aman-drene’oy reke? Naho izay, le mila mahay mifily namagne soa rehe.

Tsanogno soa ty nama’o. Naho manao izay rehe, le ho fanta’o ty raha ilae’e naho ty raha manahiragne aze.​—Filipianina 2:4.

Mikezaha hamela heloke. Ko mieretseretse tie tena tsy hanao hadisoagne reke. “Fa sambe manao diso mateteke tikagne iaby.”​—Jakoba 3:2.

Ko seregne hiarake ama’o lognandro ty nama’o. Ko matahotse fa naho tena namagne reke, le ho eo avao naho fa mipay aze rehe.​—Mpitoriteny 4:9, 10.

[Sare]

Manjare ho fihisà ty nama’o rehe, naho magneke ampanoe’e ze raha tea’e avao