NDRA mamaky boke rehe, ndra magnente telé, ndra mitsanogne radio, le sambe misy loza mampiriatse holitse naho aly vaho fandreberebeagne avao ty agnate’e ao. Mba dineho ka ty hasahiragne manjò azo, va’e ho aretegne zay ndra nisy longo’o maifitse azo nimate. Va’e ‘hijale mafe’ manahake ty ndaty soa atao tihoe Joba rehe.—Joba 10:15.

Dineho tie:

• Izao vao ty nisafirien’Andrianagnahare ho ahy naho hoahy ze kila ndaty?

• Aia ty hahatreavako fagnampeagne amy ze hasahiragne manjò ahy?

• Mbe mitamà vao tikagne fa hisy fiadanagne ty an-tane etoy indraike andro agne?

Mahafa-po ty vale’e mey ty Baiboly miomba o fagnonteneagne rehoe.

“Le hofafa’e ze ranomaso amy ty maso iareo, fa tsy hisy sasa ty fate, ty fahaferenaigne ndra ty toreo ndra ty fangirifiriagne, fa tsy ho eo iaby ty raha taloha.”—Apokalypsy 21:4

“Hahay manganike vohitse manahake o tràtràkeo ty kepeke.”—Isaia 35:6

“Hampagnentégne ty maso ze goa.” —Isaia 35:5

 ‘Ho avy ty andro hiakara ze an-kibory ao.’—Jaona 5:28, 29

“Tsy hisy sasa ty ndaty hanao tihoe tie: Marare raho.” —Isaia 33:24

“Hahavokatse [hanegne] ty tane toy.”—Salamo 72:16

Ko le avy le mieretseretse rehe tie nofy avao i raha rinehake tamy peje taloha teo rey. Andrianagnahare ty nampitamà fa hanao izay sady hazavae ty Baiboly ty hampahavia’e izay.

Mahasoa amy ze kila raha ty Baiboly. Io ty magnampe azo ho fale amy ty fiaignagne manomboke amy hinane zao. Mba dineho hey ty raha mampinekoneko azo naho ty hasahiragne mahazo azo! Va’e ho tsy fanagnan-drala zay, ndra keleiagne tsy mifankahay, ndra aretegne, ndra longo maifitse nimate. Hagnampe azo amy ty hasahiragne manjò azo amy izao ty Baiboly. Mahavelombolo ka ty raha rehafe’e fa valea’e ty fagnonteneagne retoagne:

• Nagnino itikagne mijaleo?

• Akore ty hiatrehagne ze raha mampinekoneko amy ty fiaignagne?

• Inogne ty raha toko’e hataontikagne mba hahasambatse ty keleiantikagne?

• Manao akore tikagne naho fa mate?

• Mbe ho treantikagne indraike vao o longontikagne nimateo?

• Akore ty atokisantikagne fa hagnatò ze raha nampitamae’e ty Andrianagnahare?

 Te hahafantatse ze raha ampianare ty Baiboly rehe kanao mamaky ty boke toy. Hagnampe azo ty boke toy. Misy fagnonteneagne ty peje ambane ey, le agnate i fehentsoratsey ao ty misy ty vale’e. An-tapetrisa’e ty ndaty mikezake mamale o fagnonteneagne rehoe, naho fa miharo fianatse Baiboly amy ty Vavaolombelo i Jehovah. Mahafale iareo ty manao izay. Lonike abey mba hahafale azo ka. Ho fale rehe naho fa hianatse tie inogne vata’e ty raha ampianare ty Baiboly. Lonike abey rehe mba ho tahien’Andrianagnahare naho fa mianatse ty miomba izay!