1-3. Ia ty fahavalo magneagne antikagne iaby, le nagnino ty fandinehagne ty fampianara ty Baiboly ro tsy mahalako tahotse antikagne?

DINEHO tie lomay fahavalo masiake rehe. Ie amy izao maozatse naho mahalay ambone’o. Fanta’o fa tsy mitsitsy reke sady fa nitrea’o namono ty longo’o. Ndra tie mikezake mafe lomay aze rehe, le mbe miharine azo avao reke. Tsy misy hivotsoragne rehe fa ho tra’e. Faie misy mpandrombake niavy tampotampoke. Maozatse ambone i fahavalo’oy reke sady mampitamà fa hagnampe azo. Mahatsiaro ho avotse rehe!

² Heagne o fahavalo iohoe rehe. Sambe heagne’e iaby tikagne. Nitreantikagne tamy ty toko taloha itoy fa atao ty Baiboly tihoe fahavalo o fateo. Tsy misy maharese aze tikagne. Maro amantikagne ty nahatrea aze namono ty longo tsy foe trontikagne. Faie ambone o fateo ty hery i Jehovah. Mpandrombake bey hatea reke sady fa natoro’e fa maharese o fateo. Mampitamà ka reke fa ho foagna’e o fahavalo iohoe. Hoe ty Baiboly: “Hafahagne o fateo, fa fahavalo fara’e.” (1 Korintianina 15:26) Talily soa vata’e zay!

³ Ho henteantikagne hey ty voka’e naho fa mamono o fahavalo iohoe. Vaho izay hazava soa amantikagne ty fampitamàgne raike hahasambatse antikagne. Mampitamà ty Jehovah  fa ho velogne indraike o ndaty nimateo. (Isaia 26:19) Izay ro mampitamà antikagne fa mbe ho velomegne indraike iareo.

4. a) Nanao akore ty Jesosy naho fa nisy mate, le manao akore ka ty arofo i Jehovah naho misy mate? b) Ia ty ragne i Jesosy naifitse aze?

⁴ Fa nisy longo’o nimate vao? Le hoe tsy ho tante ty fanahelo naho ty haoreagne avoka’e. Mahaferenaigne tikagne naho fa voa izay. Toko’e handineke ty Saontsin’Andrianagnahare tikagne naho fa izay ty mahazo antikagne amy izay mahazo fampionognagne. (Vakio 2 Korintianina 1:3, 4.) Atoro’e ao tie manao akore ty arofo i Jehovah naho i Jesosy naho fa misy ndaty mate. Tantarae’e ao fa nanahelo ty Jesosy naho nisy mate, fa nanahake an-dRae’e. (Jaona 14:9) Mahazatse i Jesosy ty nitilike i Lazarosy naho i Maria vaho i Marita nitoboke a Betania agne naho fa nandeha mba Jerosalema mbeo reke. Nanjary ragne’e maifitse aze iareo telo. Hoe ty Baiboly: “Niteà i Jesosy ty Marita naho i rahavave’ey vaho i Lazarosy.” (Jaona 11:5) Fa nianarantikagne taloha itoy fa nimate ty Lazarosy.

5, 6. a) Nanao akore ty Jesosy naho fa nahatrea tie nanahelo mafe, i longo i Lazarosy rey naho i ragne’e rey? b) Nagnino ty fahafantaragne tie nanahelo ty Jesosy ro mampionogne antikagne?

⁵ Nanao akore ty Jesosy naho fa nimate i ragne’ey? Mirehake ty Baiboly fa niharo haoreagne tamy ty longo i Lazarosy naho ty ragne’e reke. Nahalem-pò i Jesosy ty nahatrea ty fahaferenay iareo. “Nanahelo mafe tagnate fo’e ao” reke “vaho nioremégne”, le “nipò-dranomaso.” (Jaona 11:33, 35) Tsy nanan-draha tamaegne vao ty Jesosy kanao nitagny? Tsy maregne zay. Fanta’e fa hisy raha mahaveregne hiseho. (Jaona 11:3, 4) Ndra tie eo zay, le nanahelo naho nioremégne reke naho fa nisy mate.

⁶ Mampionogne antikagne ty mahafantatse tie nanahelo ty Jesosy. Ty dika izay sambe malaigne o fateo iareo aman-dRae’e Jehovah. Faie vita i Jehovah Andrianagnahare ty mialy amo o fahavalo iohoe sady maharese aze reke! Andao hey tikagne hagnente ty raha nivita i Jesosy amy ty hery nimeigne aze.

7, 8. Nagnino ty Lazarosy ro fa tsy nitamaegne sasa, faie inogne ty raha nanoe i Jesosy?

⁷ Nampagnafahe i Jesosy ty vato nagabegne ty lakato nandevegnagne i Lazarosy. Tsy nimete ty Marita fa efatse andro ty nahafate aze, le fa ho lo i fatey. (Jaona 11:39) Le hoe raha fa tsy nisy tamaegne sasa ty miomba aze.

⁸ Hafara’e nafahagne avao i vatoy sady nitoka ty Jesosy tie: “O Lazarosy, miakara!” Inogne ty raha niseho? “Le niakatse boake ao i lahilahy fa nimatey.” (Jaona 11:43, 44) Ho nanao akore hoe rehe ty nihafalea ze ndaty nahatrea izay! Sambe nahafantatse iaby ndra ty niharo troke ama’e ndra ty longo’e ndra ty ragne’e ndra ty mpiharo tanàgne ama’e, fa nimate ty Lazarosy. Faie nivelomegne tamy iareo eo indraike i ndaty niteà iareoy. Le hoe vande ty raha hoe izay. Va’e nimaro ty ndaty namihigne i Lazarosy. Rese vata’e i fatey tamy izay!

9, 10. a) Inogne ty magnamaregne fa tsy ty herim-bata i Jesosy ty nameloma’e i Lazarosy? b) Inogne ty soa rambesentikagne naho fa mamaky ty tantara ty ndaty nimate vinelogne rehafe ty Baiboly?

⁹ Tsy nirehake ty Jesosy tie ty herim-bata’e avao ty nahavità’e i raha mahaveregney. Nivavake hey ty Jesosy taloha ty nitokava’e i Lazarosy mba hiakatse. Ty dika izay i Jehovah ty namelogne aze. (Vakio Jaona 11:41, 42.) Tsy tamy izay avao ty nampiasà i Jehovah ty heri’e hamelomagne ty ndaty mate. Vaho raike amy ty ndaty sive nimate vinelogne rehafe ty Baiboly ty Lazarosy. * Fanjaka ty mamaky naho mandineke o tantara rehoe. Treantikagne amo o tantara rehoe fa tsy mifily volo ty Andrianagnahare fa ndra ajaja ndra antetse ndra lahilahy ndra ampela ndra Isiraelita ndra karazan-kafa, le sambe nivelome’e iaby. Nisy hafaleam-bey ka ty rehafegne amo o tantara rehoe ao! Naho fa nivelome i Jesosy ty somondrara raike, le “tsy nisy hoe’e ty nihafalean-drae’e naho  i rene’e naho fa nahatrea izay.” (Marka 5:42) Tsy hohaligno iareo sasa i raha mahafale nanoe i Jehovah hoahy iareo zay.

¹⁰ Faie le mbe nimate i ndaty nivelome i Jesosy rey. Tsy nisy dika’e vao ty namelomagne iareo? Tsy izay. Magnamafe ty hamarenagne lahibey ila’e agnate Baiboly ao o tantara rehoe sady mahavy antikagne hanan-draha tamaegne.

11. Nagnino ty tantara i Lazarosy ro magnamaregne ty raha rehafe ty Mpitoriteny 9:5?

¹¹ Mirehake ty Baiboly fa “tsy misy raha rendre’e” ty mate. (Mpitoriteny 9:5) Tsy mahatsiaro iareo sady tsy misy tane iveloma’e. Magnamaregne izay ty tantara i Lazarosy. Inogne ty raha nirehafe’e naho fa vinelogne? Nitalily ty fiaignagne an-dagnitse agne vao reke, le nampatahotse ze ndaty teo? Sa nirehake miomba ty afobey mampiriatse holitse? Tsy izay. Tsy mirehake ty Baiboly tie nitantara raha hoe izay reke. ‘Tsy nisy raha rendre’e’ ty Lazarosy tagnate ty efatse andro nahafate aze. Niazo ty roro fate avao reke.—Jaona 11:11.

12. Inogne ty mahavy antikagne matoky fa nivelomegne vata’e ty Lazarosy?

¹² Ty tantara i Lazarosy ka ty magnamaregne fa misy vata’e ty famelomagne ty mate fa tsy vandevande avao. Tsiefa ty vavaolombelogne nahatrea maso ty nameloma i Jesosy i Lazarosy. Ndra ty mpitarike fivavahagne nalaigne i Jesosy tsy nandietse o raha mahaveregne iohoe. Ndra hoe ty reha iareo: “Inogne ty hanoentikagne fa manao famantaragne maro i lahỳ [Jesosy]?” (Jaona 11:47) Nangororoke mbamy i Lazarosy mbeo iaby i ndatỳ naho fa naharey aze tie vinelogne, le nimaro ty ndaty nino i Jesosy. Naho fa nahatrea i Lazarosy iareo, le nagneke fa nirahen’Andrianagnahare vata’e ty Jesosy. Tsy nisy handieragne aze o raha nanoe i Jesosy iohoe, le izay ty nahavy o mpitarike fivavahagne Jiosy reo nilahatse ty hamonoagne i Jesosy naho i Lazarosy.—Jaona 11:53; 12:9-11.

13. Inogne ty mahavy antikagne mino fa ho vita i Jehovah ty mamelogne o ndaty fa nimateo?

 ¹³ Sarotse vao ty hinoagne fa misy vata’e ty famelomagne ty mate? Naho ty maregne, nirehake ty Jesosy fa hamelogne “ze an-kibory ao” reke naho fa ela ty ela. (Jaona 5:28) Mpamboatse ze kila raha miaigne ty Jehovah. Le ho sarotse ama’e vao ty hamboatse aze indraike? Miankigne amy ty fahatsiarova i Jehovah zay. Le ho tsiaro i Jehovah iaby vao ty hamaro ty longontikagne fa nimate? Tsy vatse isahegne o vasiagneo faie mean’Andrianagnahare agnaragne tsikiraidraike! (Isaia 40:26) Vita’e ka ty mahatsiaro ty miomba o longontikagne fa nimateo sady vogno’e hamelogne iareo indraike reke.

14, 15. Inogne ty raha rineha i Joba magnamaregne fa te hamelogne ty ndaty nimate vata’e ty Jehovah?

¹⁴ Akore ty ahafantarantikagne fa magniry hamelogne o ndaty nimateo ty Jehovah? Matoky tikagne fa ty Baiboly ro mirehake izay. Izao ty fagnontenea ty lahilahy tsy nivalike atao tihoe Joba: “Naho mate ty lahilahy tsy marare, le mbe ho velogne indraike vao reke?” Le mbe nirehake avao reke fa handigne an-kibory ao amparake ty ahatsiarovan’Andrianagnahare aze. Hoe reke tamy i Jehovah: “Hikanjy rehe le hanoin-draho. Fa magniry mafe hahavazoho ty asa ty fità’o rehe.”—Joba 14:13-15.

¹⁵ Tsy mba dinehe’o vao tie fa tsy mahalìgne ty hameloma’e indraike o ndaty nimateo ty Jehovah! Tsy mampionogne azo vao ty mahafantatse fa magniry mafe hamelogne ty ndaty fa nimate ty Jehovah? Hanao akore ka areke ty ho famelomagne ty ndaty fa nimate amy ty ho avy? Ia ty ho velomegne, le aia ty hisy aze?

16. Hanao akore ty fiaignagne naho fa ho velomegne o ndaty nimateo?

¹⁶ Mianatse raha maro miomba ty famelomagne ty mate amy ty ho avy tikagne, naho fa mamaky ty tantara o ndaty fa nivelomegne reo agnate Baiboly ao. Tambone tane etoy avao  ty namelomagne iareo sady nifankatrea indraike tamy ty longo’e. Izay ka ty raha hiseho amy ty ho avy faie ho soa ambone izay. Fa nianarantikagne tamy Toko faha-3 ao, fa safirin’Andrianagnahare ty hagnova ty tane toy ho paradisa. Naho fa ho velomegne indraike o ndaty nimateo, le tsy hisy sasa ty aly naho ty malaso vaho ty aretegne. Ho velogne nainai’e an-tane etoy amy ty fiadanagne naho ty hasambaragne iareo.

17. Ia iaby ty ho velomegne indraike?

¹⁷ Ia iaby ty ho velomegne indraike? Nirehake ty Jesosy, fa ‘hitsanogne ty fiaragnana’e ze an-kibory ao, le hiakatse boake ao.’ (Jaona 5:28, 29) Hoe ka ty Apokalypsy 20:13: “Nagnakatse ze nimate tama’e ao i riakey, le ty fahafatezagne naho o kiborio ka nagnakatse ze nimate tama’e ao.” O “kibory” rehafe’eo, tsy inogne fa ty fiharoa ze kibory misy ty ndaty nimate iaby. (Henteo ty Fagnazavagne Fagnampe’e peje 212-213.) Tsy hisy raha sasa ty agnate o kiborio ao amy izay, fa ho fohazegne iaby ty ndaty agnarivo tapetrisa’e miroro ao. Hoe ty apositoly Paoly: “Hisy ty famelomagne ze maregne naho ze tsy maregne.” (Asan’ny Apostoly 24:15) Inogne ty teà izay ho rehafegne?

18. Ia o ndaty “maregne” hovelomegne indraikeo, sady inogne ty voka izay ama’o?

¹⁸ Agnate i ndaty “maregne” zay, ty ndaty maro rehafe ty Baiboly nivelogne taloha ty nahavia i Jesosy an-tane etoy. Tsiaro’o varagne ty ry Noa, Abarahama, Saraha, Mosesy, Rota, Esitera naho ty maro ila’e tsy niazo tognogne. Amy i Hebreo toko faha-11 ao ty irehafagne ty ila’e amo o lahilahy naho ampela nanam-pinoagne rehoe. Agnisa i ndaty “maregne” rey ka ty mpanompo i Jehovah mate amy izao. Tsy eo sasa itikagne natahotse ty ho matey fa mitamà fa mbe hovelomegne indraike ty ndaty nimate.—Hebreo 2:15.

19. Ndaty manao akore ro atao tihoe “tsy maregne”, le hengà ty hasoa fagnahy i Jehovah hanao inogne iareo?

¹⁹ Akore ka ty amy i ndaty tsy nanompo i Jehovah sady tsy nagnorike ty fagnanara’e fa tsy nahafantatse aze rey? Tsy ho haligno’e o ndaty agnarivo tapetrisa’e rehoe. Ndaty “tsy maregne”  ty irehafa ty Baiboly iareo. Mbe ho velomegne ka iareo sady homeagne andro lavalava hianara’e ty maregne miomba an’Andrianagnahare naho hanompoa’e aze. Agnate ty arivo taogne ty hamelomagne o ndaty nimateo sady hengàgne hiharo amy ty mpanompo i Jehovah tsy mivalike an-tane etoy iareo. Ho fanjaka ty fiaignagne amy izay. Izay o atao ty Baiboly tihoeo tie Andro Fitsaràgne. *

20. Inogne ty atao tihoe Gehena, le ndaty manao akore ty mbeo?

²⁰ Ty dika izay vao, le ho velomegne iaby ze ndaty nimate? Tsy izay. Mirehake ty Baiboly fa amy i “Gehena” agne ty ndaty ila’e nimate. (Lioka 12:5) O Gehena zao agnara toeragne nifagnariagne forompotse ndra fako tambaly i Jerosalema tao, le izay ty nangalagne o agnaragne iohoe. Nifagnoroagne fate naho forompotse ty ao. Nariagne ao ty fate ze ndaty mpamono ndaty, fa tsy fagneva ty halevegne naho ho velomegne indraike ty nifieretsereta o Jiosio ty fate iareo. Mete ka ty nanoagne Gehena ze fate lelia’e ho rereke. Ndra tie i Jesosy ty hampitsaraegne ty velogne naho ty mate, le i Jehovah ty manapa-kevetse fara’e. (Asan’ny Apostoly 10:42) Tsy ho velomegne sasa ze ndaty nivazoho’e fa raty fagnahy sady tsy miova amy ty raha raty nanoe’e.

21, 22. a) Inogne ty famelomagne karaza’e hafa rehafe ty Baiboly? b) Ia ty nivelomegne voaloha’e ho fagnahy?

²¹ Mirehake ty Baiboly fa mbe misy famelomagne ty mate karaza’e hafa ka. Rehafe’e ao fa misy ndaty ho velomegne faie ho fagnahy ho an-dagnitse agne iareo. I Jesosy Kirisity ty ohatse raike trea agnate Baiboly ao.

²² Tsy nengà i Jehovah hijanogne ela tan-kibory ao i Ana’e tsy nivalikey naho fa vinono. (Salamo 16:10; Asan’ny Apostoly 13:34, 35) Nivelomen’Andrianagnahare ty Jesosy faie tsy ndaty sasa naho fa nivelomegne. Nihazavae i apositoly Petera  fa “nofotse ty [Kirisity] naho fa vinono, faie fagnahy naho fa vinelogne.” (1 Petera 3:18) Mahaveregne ty raha hoe izay. Nivelogne indraike ty Jesosy sady fagnahy mahery! (Vakio 1 Korintianina 15:3-6.) Ie ty voaloha’e nahazo i voninahitse lahibey zay. Faie hisy ndaty hafa ka ho velomegne indraike, le hanjary fagnahy ka.—Jaona 3:13.

23, 24. Ia o “agnondry tsy ampe” i Jesosy reo sady fire ty isa’e?

²³ Naho fa nahafantatse ty Jesosy tie fa marine hiheregne an-dagnitse agne, le nirehake tamy i mpiana’e tsy nivalike rey reke tie, “hagnomagne toeragne ho anareo raho.” (Jaona 14:2) “Agnondry tsy ampe” ty nanognona i Jesosy ze ho an-dagnitse agne. (Lioka 12:32) Fire ty isa o Kirisitianagne tsy mivalike rehoe? Hoe ty apositoly Jaona amy Apokalypsy 14:1 ao: “Nagnente indraike raho le heheke i Anak’agnondrỳ [Jesosy Kirisity] nitsangagne amy i Vohitse Ziona eo, le niharo ama’e ty ndaty efatse arivo tsy efatse ale tsy ray hetse ninday ty agnara i Anak’agnondrỳ naho ty tahinan-dRae’e sinoratse an-kandry iareo eo.”

²⁴ Hovelomegne indraike o Kirisitianagne 144 000 reo sady hiaigne an-dagnitse agne. Agnisa izay o apositoly i Jesosy tsy nivalike reo. Ombia ty hamelomagne iareo? Mirehake ty apositoly Paoly fa agnate ty andro fagnatreha i Kirisity. (1 Korintianina 15:23) Hianarantikagne amy Toko faha-9 ao fa miaigne amo o andro iohoe itikagne hinane zao. A naho izay areke, le avy le hovelomegne ho an-dagnitse agne ty sisa’e amy i ndaty 144 000 rey naho fa mate. (1 Korintianina 15:51-55) Faie hiaigne amy i tane Paradisay etoy ty maro amy ze ndaty hovelomegne indraike.

25. Inogne ty hodihentikagne amy ty toko manonjohy itoy?

²⁵ Le lia’e tsy hisy sasa ty fate fa handrese o fahavalontikagne iohoe vata’e ty Jehovah! (Vakio Isaia 25:8.) Va’e hieretseretse rehe tie: ‘Hanao inogne an-dagnitse agne o ndaty ho agne reo?’ Ho agnisa ty fitondràm-panjakagne raike an-dagnitse agne iareo. Hianatse ty miomba o fanjakagne fara izay ty soa iohoe tikagne amy ty toko manonjohy itoy.