Tafara ty nagninofisa i Nebokadnezara i sare vongagney, le nanao sare vongagne volamena reke. Tamy ty vavasaka i Dora eo ty nisia’e aze. Navori’e aloha i sarey eo ty ndaty manam-boninahitse tamy i taney, agnisa izay ty Mesaka, i Sadraka naho i Abednego. Nandily amy izay reke tie: ‘Naho fa maharey feon’antsiva, harpa naho langorogne nareo, le miankohofa aloha o sare vongagneo eo. Ze tsy miankohoke, le hatorake agnate ty laforo mirehetse ao.’ Hanao izay vao i Hebreo telo lahy rey, sa hivavake amy i Jehovah raike avao?

Nikomandy ty hampagnenoagne i mozikey i mpanjakay. Niankohoke sady nivavake tamy i sare vongagney iaby ze teo, faie i Sadraka, i Mesaka naho i Abednego avao ro tsy niankohoke. Nirehake tamy i mpanjakay ze nahatrea izay tie: ‘Tsy niankohoke i Hebreo telo lahy rey.’ Hoe ty Nebokadnezara tamy iareo: ‘Mivavaha amo o sare vongagneo indraike nareo, fa naho tsy mete nareo, le atorako agnate o laforo mirehetseo ao. Tsy misy andrianagnahare hahavotse anareo amako.’ Namale iareo tie: ‘Tsy hanao izay zahay. Afake magnavotse anay ty Andrianagnahare’ay. Faie ndra tie tsy hanao izay reke, tsy hivavake amy io zahay.’

Niboseke ty Nebokadnezara. Nirehake tamy i mpanompo’ey reke tie: ‘Anò’areo mae soa i laforo misy afoy.’ Nikomandy i maramila’e rey ka reke tie: ‘Arohizo iareo telo lahy, le atoraho ao.’ Nimae bey i laforoy, le naho fa niharine aze i maramila rey le avy  le nimate. Natorake agnate afo ao i Hebreo telo lahy rey. Naho fa nagnente ty tagnate laforo tao ty Nebokadnezara, ndra ndaty efatse ty nitrea’e nandehandeha tao fa tsy telo. Natahotse reke sady nagnontane o mpanompo’eo tie: ‘Tsy ndaty telo vao ty natorantika tagnate afo ao? Ndra efatse ty treako, sady ty raike hoe anjely!’

Nagnarine i laforoy ty Nebokadnezara, le nitoka iareo tie: ‘Miakara nareo, fa Tompo ty Hery vata’e ty Andrianagnahare’areo.’ Gaga iareo naho fa nahatrea i Sadraka, i Mesaka naho i Abednego tsy nimae. Tsy nisy mae sady tsy nisy fofon’afo ty vata’e, ty volo’e ndra ty akanjo’e.

Hoe ty Nebokadnezara: ‘Mahery vata’e ty Andrianagnahare iareo. Nagnirake ty anjeli’e reke mba hagnavotse iareo. Tsy misy andrianagnahare manahake aze.’

Vognogne tsy hivalike amy i Jehovah manahake i Hebreo telo lahy rey vao rehe, ndra inogn’ino ty raha miseho?