Naho fa nimate ty Jesosy, le nangatahe ty lahilahy raike mpagnarivo, atao tihoe Josefa tamy i Pilato ty fate’e. Finogno i Josefa tamy ty lamba rongony soa nisy raha magnitse ty fate i Jesosy, le naleve’e tamy ty kibory vaovao. Nasia’e vatobey ty lala i kiborỳ. Hoe ty lahibey i mpisorogne rey tamy i Pilato: ‘Matahotse zahay tsy hangalare o mpiana i Jesosy reo ty fate’e, le hatao iareo tie fa vinelogne reke.’ Le hoe ty Pilato tamy iareo: ‘Asio’areo tampò i kiborỳ, le ambeno’areo.’

Telo andro tafara izay, le nisy ampela nandeha tan-kibory agne maraindray bey. Faie zoe iareo fa nisokake i kiborỳ. Nisy anjely ty tagnate i kiborỳ ao nirehake tamy iareo tie: ‘Ko matahotse nareo, fa vinelogne ty Jesosy. Akia, rehafo o mpiana’e reo hagnente aze a Galilia agne.’

Nilay hipay i Petera naho i Jaona ty Maria Magdalena. Le hoe reke tamy iareo: ‘Nisy nangalatse ty fate i Jesosy!’ Nilay mban-kibory mbeo ty Petera naho i Jaona. Naho fa nitrea iareo tie tsy tao vata’e i fatey, le noly iareo.

Naho fa niheregne tan-kibory agne ty Maria, le nahatrea anjely roe tagnate’e tao. Hoe reke: ‘Tsy fantako ty nasia o ndaty i Tompoko.’ Nahatrea lahilahy hafa ka reke naho fa niavy eo. Faie natao’e mpiambegne teteke avao reke, le hoe reke: ‘O aba! Aia ty nasia’o aze?’ Faie naho fa nirehake i lahilahỳ tie: “O Maria!”, le nifanta’e tie i Jesosy. Niendrake reke sady nirehake tie “I Mpagnanatse!“ sady nitagne ama’e. Faie hoe ty Jesosy tama’e: ‘Akia, rehafo amy i rahalahiko rey tie nitrea’o raho.’ Le avy le nilay mbamy i mpianatse rey mbeo ty Maria sady nirehake tamy iareo tie nitrea’e ty Jesosy.

Tafara izay, le nisy mpianatse roe lahy boake a Jerosalema ao handeha ho a Emaosy agne. Nisy lahilahy nifankatratse tamy iareo tan-dalagney, le nagnontane ty raha nifampirehafa iareo. Hoe iareo: ‘Mbe tsy rei’o vao? Fa telo andro zay ty namonoa ty lahibey o mpisorogneo i Jesosy. Hinane zao ka misy ampela mirehake tie fa velogne reke!’ Nagnontane i lahilahỳ tie: ‘Tsy mino  o mpaminanio vao nareo? Rehafe iareo tie, ho mate ty Kristy, avy eo hovelomegne.’ Nagnazava ty Soratse Masigne tamy iareo reke. Naho fa niavy ta Emaosy ao iareo, le nangatake i lahilahỳ hitsile amy iareo ao. Naho fa boake nivavake i hanegne harivay reke vaho izay nifanta iareo tie i Jesosy io, faie fa nanjavogne reke.

Le nandeha malaky i mpianatse roe lahy rey, hitantara tamy ty apostoly ta Jerosalema agne ze raha zay. Naho mbe nirehake iareo, le avy le niseho tagnivo iareo eo ty Jesosy. Tamy ty voaloha’e i apostoly rey tsy nino tie i Jesosy vata’eo. Faie hoe reke: ‘Henteo’areo ty tagnako sady tsapao raho. Fa voasoratse tie hovelomegne amy ty mate ty Kristy.’