Managne safidy tikagne iaby! Ndra hanompo i Jehovah ndra hanompo i Satana naho o demonia’eo. Tsy afake mampifangaro o raha reo tikagne. Tena hendre tikagne naho manompo i Jehovah!

Arake ty nitreantikagne taloha teo, le tena mahafale o demoniao ty mampijale naho mamitake o ndatio. Tsy mba hoe izay ty Jehovah. Manahake ty hatea ty rae ty ana’e ty hatea i Jehovah o ndatio. Ireke ty Mpagnomey “ze kila raha soa naho ze fagnomezagne voririke iaby.” (Jakoba 1:17) Tsy misy raha soa tsy mei’e o ndatio ndra tie lafo sady sarotse aza i rahay.​—Efesianina 2:4-7.

Eretsereto ty raha natao i Jesosy, i Anan’Andrianagnahare tan-tane etoay. Nampirehake ty moagne reke sady ze goa natao’e ty hahatreava’e. Nagnasitragne ty ndaty niazo ty angamae ndra boka vaho ty kepeke reke. Namoake demonia sady nagnasitragne ze karazan’aretegne iaby reke. Namelogne ty ndaty nimate aza ty Jesosy, noho ty herin’Andrianagnahare.​—Matio 9:32-35; 15:30, 31; Lioka 7:11-15.

Tsy mandagnitse mba hamitahagne antikagne ty Andrianagnahare fa misaontsy ty maregne lognandro. Tsy mamitake ndra ia ndra ia reke.​—Nomery 23:19.

Manahake ty fanjira ty tragnom-porarotse ty laletse raike, le ndaty an-tapetrisa’e ka ty gadrae ty finoanoam-poagne naho ty vande. Matahotse ty mate iareo. Matahotse o demoniao iareo. Minekoneko iareo kera ndra hihara ty ozogne, ty fambara naho ty raha agnisiagne ho fiarovagne amy ty vintagne vaho ty sampy natao hahasoa vintagne. Gadrae ty finoagne naho ty fombafomba mifototse amy ty vande i Satana Devoly iareo. Faie tsy misy ndra raike amy irey mamandrike ty mpanompon’Andrianagnahare.

Tena mahery mandikoatse i Satana ty Jehovah. Naho manompo i Jehovah rehe, le hiaro azo amo o demoniao reke. (Jakoba 4:7) Tsy hisy voka’e ama’o o vorekeo. Ohatse, ta Nigéria agne le nisy mpanao aoly raty telo namoreke ty Vavolombelo i Jehovah raike nandietse tsy hiala i tanàgney. Naho fa tsy nisy tomombagne i voreke rey, le nanjare natahotse ty raike amy i mpanao aoly raty rey, le nandeha mbamy i Vavolombelogney agne sady nangatake famindram-po tama’e.

Naho ampijalé o demoniao rehe, le azo’o atao ty mitoka i tahina i Jehovah-y, fa le hiaro azo reke. (Ohabolana 18:10) Faie mba hahazoa’o ty fiarovan’Andrianagnahare, le tsy maintsy atao’o azo antoke tie tsy misy raha ifandrambesa’e amo o demoniao naho ty fanompoagne iareo ty raha atao’o. Nanao izay ty mpanompon’Andrianagnahare ta Efesosy agne tie taloha. Navory iareo iaby ze boke miomba ty mazỳ, le noroa’e. (Asan’ny Apostoly 19:19, 20) Tsy maintsy manao hoe izay ka ty mpanompon’Andrianagnahare amy izao. Asintaho ty ama’o eo iaby ze raha anoagne fiarovagne amy ty vintagne, o aoly atao fiarò, o taly “fiarovagneo”, o sampy natao mba hahasoa vintagneo, o boke miomba ty mazỳ io, vaho ze raha hafa mifandrambe amy ty demonia.

Naho tea’o ty hahazo ty fankasitrahan’Andrianagnahare, le tsy ampe tihoe miala amy ty fivavahan-diso sady tsy manao i raha raty rey sasa. Tsy maintsy magnorike ty fivavahagne maregne ka rehe sady aseho amy ty atao zay: Manoro ty raha takegne ama’o ty Baiboly:

Managne ndaty mampianatse naho manao raha tsy mete an-tane etoa ty Satana naho i demonia’e rey. Faie managne vahoake ka ty Jehovah, le i Vavolombelo’e rey. (Isaia 43:10) Magneran-tane, le managne Vavolombelogne mahery ty valo tapetrisa reke. Mikezake manao ty soa iaby iareo, sady mampianatse ty hafa ty hamarenagne. Hotrea’o amy ty Anjomba i Fanjakagney agne iareo, sady horambese iareo soa rehe.

Magnampe ty hafa hanompo an’Andrianagnahare ty asa’e. Hiara-mianatse Baiboly ama’o an-tragno’o agne iareo, sady hagnampe azo hianatse ty fomba tea i Jehovah hanompoagne aze. Tsy mandoa vola rehe naho fa manao izay. Mahafale o Vavolombelogneo ty mampianatse ty hamarenagne satria tea iareo o ndatio sady tea i Jehovah Andrianagnahare ka iareo.