Eretsereto zao: Nandeha tamy ty tanàgne tsy nahazatse aze ty Dame, i androy amy izao fa halegne. Fa elaela reke vaho izay nahatsiaro tie montso.

Naho ihe ro Dame, ino ty ho natao’o?

Managne safily maro rehe:

1. Magnontane ndaty.

2. Mampiasa pily mba hagnazava i lalagney.

3. Manohy mandeha avao sady mitamà tie mbe ho trea’o avao i lalagney.

Azo antoke fa tsy mete i safily fahateloy.

I safily faharoey ty soa naho oharegne amy i voaloha’ey. I pilỳ ro hitari-dalagne azo amy ty lalagne homba’o.

Afake magnampe azo manahake izay ka ty Baiboly!

O boke maro mpanagne iohoe ro

• hitari-dalagne azo amy ty olagne mahazo azo

• hagnampe azo hamantatse ty vata’o naho hanagne toetse soa

• hanoro azo ty fomba hanagnagne fiaignagne soa

Naho vaho miana-drehake tikagne le fa magnontane tie:

• Mandeha mbaia o vasiagneo naho fa atoandro?

• Mbaia i masoandroy naho fa halegne?

Naho fa mihabeibey ka tika le fa magnontane tie:

• Inogne ty mahavy o raha ratio hisy?

• Inogne ty mahavy antikagne ho mate?

Higagagne vao naho fa tagnate Baiboly tao avao ty vale’e?

Maro ty ndaty mirehake tie nao talily vande avao ty agnate Baiboly ao. Nao zao hoe fa lany date. Ndra sarotse fantaregne ty raha rehafe’e. O Baibolio vao ro manahiragne, sa ty raha eretserete o ndatio fa nao rehafe ty Baiboly?

Mieretseretse o ndatio fa nao mirehake ty Baiboly tie Andrianagnahare ro mifehe ty tane toy. Le ho maregne vao zay? Ty tontolo toy mikorontagne. Maro ty haoreagne naho ty fijaleagne. Maro ty aretegne naho ty fate. Ty hararahagne naho ty loza. Andrianagnahare bey hatea vao, le hahavita izay?

Va’e ho latsa rehe fa mirehake ty Baiboly tie: Ty tontolo toy fehe i ratỳ.

Tsy magneke vao rehe fa mioregne agnate Baiboly ao ty toro hevetse agnate ty bokekele toy ato? Resy lahatse ty Vavolombelo i Jehovah fa afake mitari-dalagne antikagne amy ty fiaignagne ty Baiboly. Ty anto’e, “boake amy ty hery ty fagnahy masin’Andrianagnahare, soa hampianaragne, hanoroagne, hagnarenagne ze diso” ty Baiboly. (2 Timoty 3:16, 17) Maregne fa ela ty nisia ty Baiboly, faie mbe mahasoa antikagne hatrake amy izao. Vakio naho ianaro o Baibolio fa hahasoa azo.