1. Naho fa ombia o voahosotseo ro hoentegne an-dagnitse agne iaby?

 TAOGNE maro lasa zay le nieretseretse hoe izao o vahoa i Jehovah-o: ‘Ombia ro hoentegne an-dagnitse agne ty sisa amo o Kristiana voahosotseo?’ Nieretseretse ka tikagne fa va’e mbe hitoboke ambone tane etoa ty ila’e amo o voahosotseo, le hiaigne amy i Paradisay ao agnate ty fotoagne fohe afara i aly Haramagedonay. Faie nianarantika tamy ty Fitalakesan-davitse 15 Jolay 2013 fa ze voahosotse iaby mbe ambone tane etoy, le hakaregne an-dagnitse agne aloha ty hanomboha i aly Haramagedonay.​—Mat. 24:31.

2. Ino ty fagnonteneagne va’e ho eretseretentika, le ino ty hodinehentika ato?

² Faie izao ty fagnonteneagne: Hanao akore o “agnondry hafa” i Kristy reo satria iareo mbe hanompo i Jehovah ambone tane etoy avao agnate i “haoreagne lahibeỳ” ao? (Jaona 10:16; Mat. 24:21) Ty ila’e amo o agnondry hafao, le va’e hieretseretse tie ho montso ndra ho irerike iareo naho fa hoentegne an-dagnitse agne o rahalahy naho o rahavave voahosotse reo. Andao tika handineke tantara roe agnate ty Soratse Masigne ao va’e mahavy iareo mieretseretse izay. Naho fa avy eo le hodinehentika tie nagnino tika ro tsy toko’e hatahotse.

INO TY RAHA TSY HISEHO?

3-4. Misalasala miomba ty ino ty ila’e, le nagnino?

³ Va’e hieretseretse ty ila’e tie hiala amy ty hamarenagne o agnondry hafao naho fa tsy ho eo sasa o Filan-keve-pitantanagneo hitarike iareo. Mieretseretse izay iareo noho ty tantara ila’e amy Baiboly ao. Andao tika handineke ohatse roe. Ty voaloha’e le ty miomba i Joiada Mpisorombey. Lahilahy tsy nivalike reke. Niaro i Joasy Mpanjaka sady nagnampe aze hanao ty soa iareo amy i Josebata vali’e tamy tie ireke mbe nikede. Nanao  ty soa avao ty Joasy tamy tie i Joiada mbe nivelogne. Faie tafara ty nimateza i Joiada le nanomboke nanao raha raty ty Joasy. Nitsanogne o roandriagne raty fagnahio reke sady tsy nanompo i Jehovah sasa.​—2 Tan. 24:2, 15-19.

⁴ Ty ohatse faharoe le ty miomba o Kristiana tamy ty taonjato faharoe reo. I Jaona ty apostoly nivelogne fara’e. Nisy voka’e soa tamy ty Kristiana maro ty fisia’e sady nagnampe iareo mba hiaretse tamy ty fanompoagne i Jehovah reke. (3 Jaona 4) Manahake ty natao i apostoly i Jesosy ila’e tsy nivalikeo avao, le nikezake mafe niaro o fiangonagneo tamy ty fampianaran-diso niparitake tamy izay ty Jaona. (1 Jaona 2:18; 2 Tes. 2:7.) Faie tafara ty nimateza i Jaona, le maro ty fiangonagne nanjare nivali-pinoagne. Taogne maro tafara tatoy, le nanjare nifangaro tamy ty fampianaran-diso ty raha nampianare o fiangonagneo.

5. Ino ty raha tsy toko’e ho eretseretentika naho fa mandineke o tantara roe reo?

⁵ Mampiseho vao o tantara roe reo fa hanahake izay ka ty hanjò o agnondry hafao naho fa hoentegne an-dagnitse agne ty sisa amo o voahosotseo? Amy ze fotoagne zay vao, le hanjare hiala amy ty raha nampianaregne iareo manahake i Joasy ndra hivali-pinoagne manahake o Kristiana tamy ty taonjato faharoe reo o agnondry hafao? Aha’a tsy hiseho zay! Afake matoky tika fa naho fa tsy ho ambone tane etoa sasa o voahosotseo, le mbe hanohy hanompo i Jehovah avao sady mbe hokarakarae’e soa o agnondry hafao. Nagnino tika ro matoky izay?

MBE HANOMPO I JEHOVAH AVAO O VAHOA’EO

6. Ino iaby i fotoagne telo hodinehentika rey?

⁶ Nagnino tika ro matoky fa mbe hanompo i Jehovah avao o vahoa’eo ndra tie agnate i fotoan-tsarotse ho avy tsy ho elay aza? Satria rehafe ty Baiboly fa tsy mitovy tamy ty fotoagne niaigna o Israelitao naho ty fotoagne tafara ty nimateza o apostolio ze fotoagne iaignantika zao. Andao tika handineke ty miomba o fotoagne telo reo: 1) Ty fotoagne niaigna o Israelitao, 2) ty fotoagne tafara ty nimateza o apostolio, 3) naho ty amy ty androntika hinane zao zane hoe ty “fotoagne fagneregnagne ze kila raha amy ty toe’e.”​—Asa. 3:21.

7. Tamy ty fotoagne niaigna o Israelitao, nagnino ro tsy toko’e hamoe fo ze Israelita tsy nivalike naho fa nanao raty ty mpanjaka iareo naho ty hafa?

⁷ Ty fotoagne niaigna o Israelitao. Taloha kede ty himateza i Mosesy le hoe reke tamo o Israelitao: “Fantako soa fa naho fa mate raho le hanao raty nareo sady hiala amy ty lalagne fa nampandehanako anareo.” (Deot. 31:29) Nampitao ka ty Mosesy fa naho mivalike o Israelitao le hatao sese-tane iareo. (Deot. 28:35, 36) Nitanterake vao zay? Ie. Tagnate ty taogne maro, le maro ty mpanjaka nanao raha raty sady nitaogne o vahoa i Jehovah-o hanao hoe izay ka. Noho izay le nisazea i Jehovah ty ndaty raty tamo o Israelio eo sady tsy nenga’e hifehe iareo sasa ty mpanjaka’e. (Ezek. 21:25-27) Faie nampahery o Israelita tsy nivalikeo ty nahatrea tie nitanterake ze raha nisaontsie i Jehovah, le nagnampe iareo hanagne herim-po hanompoagne Aze zay.​—Isaia 55:10, 11.

8. Toko’e ho latsa vao tika naho fa nifangaro tamy ty fivavahan-diso ty fiangonagne Kristiana tamy ty taonjato faharoe? Hazavao.

⁸ Ty fotoagne tafara ty nimateza o apostolio. Toko’e ho latsa vao tikagne naho fa nifangaro tamy ty fivavahan-diso ty fiangonagne Kristiana tamy ty taonjato faharoe? Oho’o. Fa nirehafe i Jesosy fa hisy fivaliham-pinoagne lahibey hiseho. (Mat. 7:21-23; 13:24-30, 36-43) Sambe nagnamafe ty apostoly Paoly, i Petera naho i Jaona fa nanomboke nitanterake  i faminania i Jesosỳ tamy ty taonjato voaloha’e. (2 Tes. 2:3, 7; 2 Pet. 2:1; 1 Jaona 2:18) Tamy ty taonjato faharoe, le nanjare nifangaro tamy ty fivavahan-diso ty fiangonagne Kristiana. Nanjare agnisa i Babilona Lahibey ndra fitambara ty fivavahan-diso magneran-tane o Kristiana nivali-pinoagne reo tafara ty nimateza o apostolio. Nitanterake areke i faminaniagney.

9. Nagnino ro tsy manahake ty fotoagne niaigna o Israelio naho ty fotoagne tamy ty taonjato faharoe ty fotoagne iaignantika amy izao?

⁹ “Ty fotoagne fagneregnagne ze kila raha amy ty toe’e.” O fotoagne iohoe, le tsy manahake i fotoagne niaigna o Israelitaoy naho i fotoagne nisy fivaliham-pinoagne lahibey tamy ty taonjato faharoey. Ino ty itokavagne o fotoagne iohoe? Andro fara’e. (2 Tim. 3:1) Faie atoro ty Baiboly fa misy vanim-potoagne lahibey naho maharetse nanomboke nisy ka tamo o fotoagne iohoe. Hitohy avao zay amparake ty hagneregna i Fanjakà i Mesiay o ndatio ho voririke naho hagnova’e ty tane toy ho paradisa. Atao tihoe “fotoagne fagneregnagne ze kila raha amy ty toe’e” o fotoagne iohoe. (Asa. 3:21) Nanomboke tamy 1914 o fotoagne iohoe. Ino ty haheregne? Tinendre ho Mpanjaka an-dagnitse agne ty Jesosy. Nanagne mpanjaka hisolo-tegna Aze indraike boake amy ty tarira i Davida Mpanjaka areke ty Jehovah. Faie tsy o fanjakagne iohoe avao ty nahere i Jehovah, fa tafara kede izay le nanomboke naheregne ka ty fivavahagne maregne. (Isaia 2:2-4; Ezek. 11:17-20) Mbe hifangaro amy ty fivavahan-diso indraike vao zay?

10. a) Ino ty nirehafe ty Baiboly mialoha miomba ty fivavahagne maregne amy ze o fotoagne zao? (Isaia 54:17) b) Nagnino o faminaniagne iohoe ro magnomey toky antika?

¹⁰ Vakio ty Isaia 54:17. Dineho ty faminaniagne toy: “Tsy hisy ho tomombagne ze fialiagne amboaregne hamonoagne azo!” Tanterake amy izao o rehake rehoe. Hoe izay ka ty rehake mampahery magnarake toy: “Hampianare i Jehovah iaby ty ana’o sady ho bey ty fiadana ty ana’o. Hioregne soa amy ty hamarenagne rehe. ... Tsy hisy raha hampatahotse azo sady tsy hisy raha hampititike azo satria tsy hiharine azo zay.” (Isaia 54:13, 14) Ndra i “andrianagnahare ty tontolo toỳ” zane hoe i Satana, le tsy hahavita hampijanogne ty asa atao ty vahoa i Jehovah mba hampianaragne o ndatio ty miomba aze. (2 Kor. 4:4) Naheregne indraike ty fivavahagne maregne sady lelia’e tsy hifangaro amy ty fampianaran-diso sasa. Haharetse nainai’e zay satria tsy hisy ho tomombagne ze fialiagne amboaregne hamonoagne antika!

 INO TY RAHA HISEHO?

11. Nagnino tika ro rese lahatse tie tsy ho irerike i vahoake tsy vatse isahegney naho fa hindesagne ho an-dagnitse agne ze sisa voahosotse mbe an-tane etoy?

¹¹ Ino ty raha hiseho naho fa hoentegne an-dagnitse agne ty sisa amo o voahosotseo? Ko haligno fa i Jesosy ty Mpiarake antika. Ireke ty loha o fiangonagneo. Nirehake mazava hoe izao ty Jesosy: “Raike avao ty Mpitarike anareo, le i Kristy.” (Mat. 23:10) Hikarakara ty mpanonjohy ty lia’e avao ty Jesosy, i Mpanjaka an-dagnitse agney. Satria mitarike antika ty Kristy, le tsy misy raha toko’e hampatahotse ze mpanonjohy ty lia’e ambone tane etoa. Ie aloha tsy haintika amy ty pitsopitso’e ty fomba hitariha i Kristy o vahoa’eo amy ze fotoagne zay. Andao areke tika handineke ohatse magnomey toky antika amy Baiboly ao.

12. Akore ty fomba nikarakara i Jehovah o vahoa’eo a) tafara ty nimateza i Mosesy? b) tafara ty nahazoa i Elia fanendreagne hafa? (Henteo i sarey)

¹² Nimate ty Mosesy taloha ty niziliha o Israelitao tamy i tane nampitamaegney ao. Nanao akore areke o vahoan’Agnahareo? Tsy nagnampe iareo sasa vao ty Jehovah satria nimate ty Mosesy? Aha’a. Nikarakara iareo avao ty Jehovah naho fa tsy nivalike iareo. Taloha ty nimateza i Mosesy, le nandily aze ty Jehovah mba hanendre i Josoa hitarike i vahoakey. Fa nampiofagne i Josoa tagnate ty taogne maro ty Mosesy. (Eks. 33:11; Deot. 34:9) Fagnampe izay, le nisy lahilahy maro hafa ka afake nitarike, agnisa izay ty lahibey ty 1 000, lahibey ty 100, lahibey ty 50 naho lahibey ty 10. (Deot. 1:15) Nivoakarakara soa areke o vahoa i Jehovah-o. Hagnente ohatse hafa mitovy amy izay ka tika, le ty miomba i Elia. Niasa mafe tagnate ty taogne maro reke mba hagnampeagne o Israelitao hanompo i Jehovah. Faie tafara tatoy le tinendre i Jehovah hanompo amy ty tapa’e atimo i Joda agne reke. (2 Mpanj. 2:1; 2 Tan. 21:12) Tsy nisy nitarike sasa vao ze ndaty tsy nivalike tamy ty foko folo o Israelio eo? Aha’a. Fa nampiofagne i Elisa tagnate ty taogne maro ty Elia. Nisy “ana ty mpaminany” ka ty tagne sady va’e nampiofagnegne tamy ty lakilasy iareo. (2 Mpanj. 2:7) Maro areke ty lahilahy tsy nivalike afake nitarike o vahoan’Agnahareo. Nanohy nagnatanterake ty fikasà’e avao ty Jehovah sady nikarakaraka o mpanompo’e tsy nivalikeo.

13. Ino ty toky treantika amy Hebreo 13:5b ao? (Henteo i sarey)

¹³ Naho fa mandineke o ohatse reo rehe, ino ty eretserete’o fa hiseho naho fa hoentegne ho an-dagnitse agne ty sisa amo o voahosotseo? Tsy toko’e hinekoneko tika. Izao ty  toky mea ty Baiboly: Tsy hienga ty vahoa’e an-tane etoy ty Jehovah. (Vakio ty Hebreo 13:5b.) Manahake i Mosesy naho i Elia, le taka ty fitambara ty Kristiana voahosotse tsiampeampe mitarike amy izao ka fa tena ilaegne ty mampiofagne ty hafa. Fa tagnate ty taogne maro o rahalahy agnisa ty Filan-keve-pitantanagneo ro nampiofagne rahalahy agnisa ty agnondry hafa mba hitarike. Ohatse zao, maro ty sekoly nalamy iareo mba hampiofagnagne ty androanavi-pagnahy, ty mpiandraikitse faritse, ty rahalahy agnisa ty Komity Sampagne, ty mpiandraikitse amy i Betela ao naho ty hafa. Managne mpagnampe manokagne ka o Filan-keve-pitantanagneo amy ty komity misy aze. Amy hinane zao le maro ty andraikitse fa atao o mpagnampe iareo reo agnivo fandaminagne eo. Fa vognogne hanohy ty fikarakaragne o agnondry i Kristy reo iareo.

14. Ino ty hevetse lahibey nitreantika tato?

¹⁴ Izao ty hevetse lahibey: Naho fa hoentegne an-dagnitse agne ty sisa amo o voahosotseo aloha ty hifaragna i haoreagne lahibeỳ, le mbe hanohy hanompo i Jehovah avao ty vahoa’e ambone tane etoy, ambane ty fitariha i Jesosy Kristy. Fantantika fa hisy firenena maromaro hitambatse, zane hoe i Goga boake a Magoga agne, hanafike antika amy ze fotoagne zay. (Ezek. 38:18-20) Faie tsy ho tomombagne o fanafihagne iohoe satria mbe hanohy hanompo i Jehovah avao o vahoa’eo. Hagnavotse iareo reke! Nahatrea “vahoake tsy vatse isahegne” agnisa ty agnondry hafa i Kristy ty apostoly Jaona. Nirehake reke tie o “vahoake tsy vatse isahegne” reo le boake tamy “i haoreagne lahibeỳ.”(Apok. 7:9, 14) Tena azo antoke areke fa hagnavotse antika ty Jehovah!

15-16. Arake ty Apokalypsy 17:14, ino ty hatao o voahosotseo agnate i aly Haramagedonay, le nagnino zay ro mampahery antika?

¹⁵ Va’e hieretseretse ty ila’e tie: ‘Akore ty miomba o voahosotseo? Ino ty hatao iareo naho fa an-dagnitse agne iareo?’ Mamale izay mivantagne ty Baiboly. Rehafe’e ao tie “hialy amy i Anak’agnondrỳ” o firenenao, faie ho rese iareo. Hoe ty Baiboly: “Haharese iareo i Anak’agnondrỳ.” Ia ty hagnampe aze? ‘Ze tinoka naho ze jinobogne vaho o tsy mivalikeo’  arake ty rehafe i andine’ey.(Vakio ty Apokalypsy 17:14.) Ia reo? O voahosotse natsangagne tamy ty mateo! Naho fa hoentegne an-dagnitse agne ty sisa amy ty voahosotse mbe an-tane etoy aloha ty hifaragna i haoreagne lahibeỳ le hialy ty fanendreagne hatao iareo voaloha’e. Fanendreagne miambake zay! Ty ila’e amo o Kristiana voahosotseo, le nimpialy taloha ty naha vavolombelogne aze. Ty ila’e aza nimaramila tamy ty tontolo toy eto. Faie naho fa nanjare Kristiana iareo tafara izay, le nianatse hilongo soa amy ty hafa. (Gal. 5:22; 2 Tes. 3:16) Tsy mampiasa fitaovam-pialiagne sasa iareo. Faie naho fa avy an-dagnitse agne iareo, le hialy amy ty fahavalon’Andrianagnahare miarake amy i Kristy naho o anjeli’e masigneo.

¹⁶ Dineho zao! Fa bey taogne sady fa tsy matanjake ty ila’e amo o Kristiana voahosotse ambone tane etoy reo. Faie naho fa hatsangagne hiaigne an-dagnitse agne iareo le hanjare matanjake naho ho fagnahy tsy mete mate sady hiarake hialy amy i Mpanjaka iareo Mpialỳ, zane hoe i Jesosy Kristy. Naho fa tapetse i aly Haramagedonay, le hiara-hiasa amy i Jesosy mba hagnampe o ndatio hanjare voririke iareo. Amy izay iareo, le azo antoke fa hagnampe o rahalahy naho rahavave iareo ambone tane etoy reo mihoatse ty natao iareo tamy iareo mbe tsy nivoririkey!

17. Akore ty ahafantarantika fa ho voaro o vahoan’Agnahareo amy i Haramagedonay?

¹⁷ Agnisa ty agnondry hafa vao rehe? Ino ty toko’e hatao’o naho fa manomboke i aly Haramagedonay? Izao ty atao: Matokia i Jehovah le oriho ty toromare’e. Va’e ino ohatse zay? Mandrisike antika hoe izao ty Baiboly: “Miziliha agnate ty efe-tragno’o agnate’e ao le ahilio i lalagney. Mietaha tsielatsiela amparake ty handena i fagnamelohagney.” (Isaia 26:20) Sambe ho voaro iaby ty vahoan’Agnahare ndra ty an-dagnitse agne ndra ty an-tane etoa amy ze fotoagne zay. Manahake i apostoly Paoly, le rese lahatse tika fa ndra “fanjakagne ndra raha amy izao ndra raha amy ty hoavy ... le tsy hisy hampisarake antika amy ty hatean’Andrianagnahare.” (Rom. 8:38, 39) Tadidio zao: Tena tea azo ty Jehovah sady tsy ombia hienga azo!