1-2. a) Nagnino ty Paoly ro nirehake tie ty hatea ro toetse “tena lahibey”? b) Ino ty fagnonteneagne hodinehentika?

 NAHO fa nirehake miomba ty finoagne naho ty fanantenagne ty apostoly Paoly, le nasongadi’e tie “ty hatea ty tena [toetse] lahibey amy ireo.” (1 Kor. 13:13) Nagnino ty Paoly ro nirehake izay? Amy ty hoavy le tsy hilaegne sasa ty finoagne naho ty fanantenagne naho fa amy i tontolo vaovaoy ao, satria fa tanterake iaby i fampitamà i Jehovah rey. Faie mbe mila maneho hatea i Jehovah naho o vahoa’eo avao tika. Naho ty maregne aza, le mila ampitomboegne nainai’e io.

² Satria tika mila managne hatea avao, le misy fagnonteneagne telo hodinehentika retoa. Ty voaloha’e, nagnino tika ro toko’e hifankatea? Faharoe, akore ty hanoroantika fa mifankatea tika? Fahatelo, akore ty hagnamafesantika ty fifankateavantika?

3. Nagnino tika ro toko’e hifankatea?

³ Nagnino ro tena lahibey amantikagne tihoe mifankatea? Ankoatse ty anto’e hafa, le ty hatea ty amantaragne ty tena Kristiana. Hoe ty Jesosy tamy i apostoli’e rey: “Naho mifankatea nareo, le izay ty hahafantara ze kila ndaty fa mpianako nareo.” (Jaona 13:35) Mampiharo saigne antika ka ty hatea.  Natao i Paoly tihoe “taly voririke mampiharo raike” ty hatea. (Kol. 3:14) Mbe misy anto’e hafa ka maha lahibey tihoe mifankatea. Hoe ty sinora i apostoly Jaona tamy ty mpiharo finoagne tama’e: “Ze tea an’Andrianagnahare le toko’e ho tea ty rahalahi’e ka.” (1 Jaona 4:21) Naho fa maneho hatea ty ndaty hafa tika, le mampiseho tie teantika ty Andrianagnahare.

4-5. Hazavao ty fifandrambesa ty hateantikagne i Jehovah naho ty hateantika ty hafa.

⁴ Ino ty ifandrambesa ty fanehoantika hatea o rahalahy naho rahavaveo amy ty hateantikagne an’Andrianagnahare? Intoy misy ohatse: Eretsereto moa ty fifandrambesa ty fontikagne naho ty ila’e amy ty vatantikagne. Naho fa magnente ty fitepo ty fontikagne amy ty faritse ila’e amy ty tagnantika zao o dokoterao, le avy le fanta’e tie manao akore ty fahasalamà ty fontika. Ino ty ianarantikagne boake amo o ohatse iohoe?

⁵ Le avy le fanta i dokoteray ty fahasalamà ty fontika naho fa magnente ty fitepo ty fontika amy ty faritse ila’e amy ty tagnantika reke. Hoe izay ka fa ho fantantikagne tie manao akore ty hamafe ty hateantika i Jehovah naho mandineke ty hateantikagne ty hafa tika. Naho voamarentika tie mihegne ty hateantika o mpiara-manompò, le famantaragne zay tie fa mihegne ka ty hateantika i Jehovah. Faie naho maneho hatea o mpiara-manompò avao tika, le porofo ka zay tie matanjake ty hateantikagne an’Agnahare.

6. Nagnino tika ro mila manao raha malaky naho fa tsapantika tie mihegne ty hateantika ty hafa? (1 Jaona 4:7-9, 11)

⁶ Toko’e hanao raha malaky tika naho treantikagne tie mihegne ty hateantikagne o mpiara-manompò. Fa nagnino? Satria midika zay tie fa miha simba ka ty ara-pagnahintikagne. Izay ty nahavy i apostoly Jaona nirehake tie: “Fa ze malaigne ty rahalahi’e trea’e maso, le tsy ho afake ty ho tea i Andrianagnahare tsy trea’e masoy.” (1 Jaona 4:20) Ino ty lesogne ho antika? Ho fale ty Jehovah naho ohatse tika “mifankatea.”​—Vakio ty 1 Jaona 4:7-9, 11.

7-8. Ino iaby ty fomba azontika ampisehoagne hatea?

⁷ Arake ty fa fantantika, le mandily antika ty Baiboly mba “hifankatea.” (Jaona 15:12, 17; Rom. 13:8; 1 Tes. 4:9; 1 Pet. 1:22; 1 Jaona 4:11) Ty hatea le toetse agnate fo ao, le tsy misy ndaty afake mahatrea ze raha agnate fontikagne ao. Akore areke ty hahafantara ty hafa fa teantika iareo? Amy ty alala ty raha ataontika naho rehafentikagne.

⁸ Maro ty fomba azontika anoroagne fa teantikagne o rahalahy naho rahavaveo. Intoa misy ohatse tsiampeampe: “Mifampirehafa ty maregne.” (Zak. 8:16) “Milongoa soa lognandro nareo.” (Mar. 9:50) Mikezaha ho voaloha’e “amy ty fagnomeagne voninahitse ty hafa.” (Rom. 12:10) “Rambeso soa ty hafa.” (Rom. 15:7) “Mahaia mifamela heloke tanterake.” (Kol. 3:13) “Mifampindesa lognandro ze mavesatse.” (Gal. 6:2) “Mifampionogna naho mifampahereza lognandro.” (1 Tes. 5:11 fap.) “Mifampivavaha.”​—Jak. 5:16.

9. Nagnino ty fampionognagne ty hafa ro fomba anehoagne hatea? (Henteo i sarey.)

⁹ Andao handineke ty raike amy i fomba fanehoagne hatea nirehafentika tambone teo rey. Ty fandrisiha i Paoly tihoe “mifampionogna lognandro” ty hodinehentika. Nagnino ty fampionognagne ty hafa ro fomba anehoagne hatea? Hazavae ty fagnazavagne fagnampe’e amy Baiboly ao, fa ty rehake nampiasae i Paoly tihoe “mampionogne”, le midika tihoe “miheo agnila ty ndaty raike eo mba hampahery  aze naho fa miatreke raha sarotse reke.” Naho fa mampionogne ty rahalahy miatreke raha sarotse tika, le magnampe aze mba hanohy hanompo i Jehovah avao. Isake tie mampionogne ty hafa areke tika, le mampiseho tie tea iareo.​—2 Kor. 7:6, 7, 13.

10. Ino ty ifandrambesa ty fitretrézagne naho ty fampionognagne?

¹⁰ Misy fifandrambesa’e ty fitretrézagne naho ty fampionognagne. Amy ty fomba akore? Naho fa misy ndaty raike miferenaigne ty ndaty raike mijale, le te hampionogne naho te hanao raha hagnampeagne aze reke. Mila mitretré heike areke tika vaho izay hahavita hampionogne ty hafa. Nihazavae i Paoly fa noho i Jehovah mitretré, ty mahavy aze mampionogne o ndatio. Nirehafe i Paoly fa “Rae ty fitretrézagne naho Andrianagnahare ze kila fampionognagne” ty Jehovah. (2 Kor. 1:3) Hazavae ty Baiboly fianaragne, fa nampiasa ty rehake tihoe “fitretrézagne” ty Paoly mba hirehafagne ty fihetseham-po tsapa naho fa miferenaigne ty hafa. Natao’e tihoe “Andrianagnahare ze kila fampionognagne ndra Fifotora ty fitretrézagne ty Jehovah satria tena miferenaigne o ndatio reke.” (2 Kor. 1:4) Manahake ty rano mamelombelogne ty ndaty maran-drano, le mamelombelogne naho mampionogne ty ndaty kivy ka ty Jehovah. Akore ty hanahafantika i Jehovah? Fomba raike anoantika izay ty fikezahantikagne hanagne i toetse misy ifandrambesa’e amy ty fampionognagney. Inogne iaby ze toetse zay?

11. Arake ty Kolosianina 3:12 naho ty 1 Petera 3:8, ino ty toetse hafa hagnampe antika hampionogne ty hafa?

¹¹ Ino ty hagnampe antika haneho hatea sady “hifampionogne lognandro”? Mila mambole fitretrézagne tika, hatea laleke naho hasoa fagnahy. (Vakio ty Kolosianina 3:12; 1 Petera 3:8.) Akore ty agnampea o toetse reo antika? Naho fa tsy managne i toetse fitretrézagney naho ty toetse hafa mifandrambe ama’e tika, le tsy ho afake hampionogne ty hafa. Nirehake ty Jesosy fa “ze raha mameno ty fo o ndatio ro rehafe ty vava’e. Ty ndaty soa le mampiboake ze raha soa nitamirie’e agnate fo’e ao.” (Mat. 12:34, 35) Ty fampionognagne o rahalahy naho rahavaveo areke, ty fomba raike lahibey anoroantikagne fa tena teantika iareo.

12. a) Nagnino tika ro mila mitao avao? b) Ino ty fagnonteneagne hodinehentika?

¹² Teantika iaby tihoe “hifankatea.” (1 Jaona 4:7) Faie toko’e hotadidientika fa nirehake ty Jesosy tie “hihamanintsigne ty hatea ty ndaty maro.” (Mat. 24:12) Tsy nirehake ty Jesosy tie tsy haneho hatea ty ankamaroa o mpiana’eo. Faie toko’e hitao tika mba tsy hifindra amantika ty toetse ty ndaty tsy manan-katea amy ty tontolo toy eto. Mifandrambe amy izay avao, le andao handineke ty fagnonteneagne lahibey raike toy: Misy fomba vao ahafahantika mamantatse tie mafe soa ty hateantika o rahalahio?

13. Ino ty raha hagnampe antika hahafantatse ty hamafe ty hateantika ty hafa?

¹³ Fomba raike ahafantarantikagne ty hamafe’e, le tihoe manao akore ty fihetsentika naho fa managne olagne amy ty hafa. (2 Kor. 8:8) Nirehake ze olagne zay ty apostoly Petera tie: “Ambone ze kila raha iaby, le mifankateava laleke fa mandrongogne fahotagne maro ty hatea.” (1 Pet. 4:8) Ty raha ataontika naho fa manao hadisoagne amantikagne ty hafa ro hahafantarantika tie mafe soa vao ty hateantika iareo.

14. Arake ty 1 Petera 4:8, toko’e hanao akore ty hateantikagne? Hazavao.

 ¹⁴ Andao hodinehentika soa i reha i Peteray. Rehafe ty tapa’e voaloha’e amy andine’ey tie toko’e “hifankatea laleke” tika. Midika ara-bakiteny tihoe “mivelatse” ty rehake nampiasae i Petera eo. Rehafe ty tapa’e faharoe ty ho voka’e naho fa itika mifankatea laleke. Magnampe antika handrongogne ty fahadisoa ty hafa zay. Intoy misy ohatse: Eretsereto tie misy latabatse raike, feno simbasimba ty ama’e. Faie misy lamba bey nivelare’o ambone’e eo mba handrongonagne aze, le avy eo tsy trea sasa i simba ama’e rey iaby. Hoe izay ka fa naho managne hatea laleke tika, le tsy tihoe hahavita handrongogne ndra hamela ty hadisoagne raike ndra roe natao ty hafa amantika avao, fa hahavita handrongogne “fahotagne maro.”

15. Ino ty raha ho vitantika naho mafe soa ty hateantikagne o rahalahio? (Kolosianina 3:13)

¹⁵ Toko’e ho mafe soa ty hateantika ty hafa amy izay tika hahavita hamela ty hadisoa iareo, ndra tie va’e hitake kezake mafe boake amantika aza zay. (Vakio ty Kolosianina 3:13.) Naho fa mamela ty hafa tika, le  mampiseho zay tie mafe soa ty hateantika aze sady ho fale ty Jehovah. Ino ka ty raha hafa hagnampe antika hamela ty hadisoa ty hafa?

16-17. Ino ka ty raha hagnampe antika hamela ty hadisoa ty hafa? Magnomeza ohatse. (Henteo i sarey.)

¹⁶ Mifantoha amy ty toetse soa ty hafa fa tsy amy ty toetse rati’e. Intoy misy fampitahagne: Eretsereto tie miarake amy ty rahalahy naho ty rahavave maromaro rehe. Tena nifale nareo tamy i fotoagne ignehoe, le nalake sare tamy ty fara’e. Nalake sare mihoatse ty roe rehe satria raty ty raike amy i sare rey. Telo hinane zao ty sare anagna’o. Faie nivoamare’o tie hoe miorognorogne ty rahalahy raike amy ty raike amy i sarey. Hatao’o akore areke i sarey? Hofafa’o reke satria mbe managne sare roe hafa rehe sady somimoke iaby nareo ty agnate’e ao agnisa izay i rahalahỳ.

¹⁷ Azo ampitoviegne amo sare iohoe ty raha tsiaro’o miomba ty hafa. Managne fahatsiarovagne soa miomba o rahalahy naho rahavaveo iaby zao tika. Faie va’e tamy ty raike amo raha reo, le nirehake ndra nanao raha raty tamantikagne ty rahalahy ndra rahavave raike. Hatao’o akore areke ze raha tsiaro’o zay? Nagnino naho fafagne manahake i sarey ze raha zay? (Ohab. 19:11; Efes. 4:32) Afake mikezake mamafa ze fahatsiarovagne raty miomba ty hafa tika satria maro mandikoatse igne ty raha mahafale niarahantikagne tamy iareo. Ze fahatsiarovagne soa avao areke ty toko’e ho tadidientika.

18. Ino ty raha nianarantika tato miomba ty hatea?

¹⁸ Nagnino ro toko’e hohamafesentika ty hateantika ty hafa? Arake ty fa nidinehentika, le manoro ty hateantika i Jehovah tika naho fa mampiseho ty hateantika o rahalahy naho rahavaveo. Akore ty hampisehoantikagne hatea amy ty hafa? Fomba raike anoantika izay tihoe mampionogne iareo. Hahavita “hifampionogne lognandro” tika naho ohatse miferenaigne ty hafa. Akore ty hagnamafesantika ty fifankateavantika? Manao izay tika naho ohatse manao ze fara herintika mba hamelagne ty hadisoa ty hafa.

19. Nagnino ro tena ilaegne ty mifankatea amy hinane zao?

¹⁹ Nagnino ro tena ilaegne ty maneho hatea ty hafa amy hinane zao? Nirehafe i Petera ty anto’e: “Fa marine ty fara ze kila raha. Lonike areke tikagne ... hifankatea laleke.” (1 Pet. 4:7, 8) Satria fa mihamarine ty fara ty tontolo raty toy, le ino areke ty raha hiseho? Hoe ty Jesosy tamy i mpiana’e rey: “Ho heje ze kila ndaty nareo noho ty amy ty agnarako.” (Mat. 24:9) Mba hiatrehagne ze raha zay areke, le mila miharo saigne tika. Naho fa manao izay tika, le tsy hahavita hampisaratsarake antika ty Satana satria ty hatea le “taly voririke mampiharo raike antika.”​—Kol. 3:14; Fil. 2:1, 2.