1. Ino ty raha nirehafe i Jesosy miomba ty harena an-dagnitse agne?

MISY harena ila’e tsy trea maso. Naho ty maregne aza, le i harena tsy trea maso rey ro tena sarobily. Magnamafe izay ty raha nirehafe i Jesosy tamy i Toriteni’e tam-bohitsey. Nirehake reke fa misy harena ty an-dagnitse agne sady sarobily ambone o fanagnagneo ze harena zay. Hoe reke tafara izay: “Fa amy ze misy ty harena’o agne, le ho agne ka ty fo’o.” (Mat. 6:19-21) Naho fa misy raha heverentikagne ho sarobily, le mandrisike antika hikezake hahazo izay ty fontikagne. Hoe mamory “harena an-dagnitse agne” tika, naho fa mikezake hanagne laza soa agnatrehan’Andrianagnahare eo. Tsy ho simba naho tsy hisy hangalatse ze harena zay, hoe ty Jesosy.

2. a) Nandrisike antika mba hifantoke amy ty ino ty Paoly arake ty 2 Korintianina 4:17, 18? b) Ino ty hodinehentikagne ato?

² Nandrisike antika ty apostoly Paoly mba ‘hampifantoke ty masontikagne amy ty raha tsy trea.’ (Vakio ty 2 Korintianina 4:17, 18.) Agnisa izay ty fitahiagne ho azontikagne amy i tontolo vaovaoy agne. Faie andao hey tika handineke ty harena tsy trea maso efatse fa anagnantikagne amy hinane zao. Inogne iaby izay? Ty firagnetantikagne amy i Jehovah, ty vavake, naho ty fagnampea ty fagnahy masigne vaho ty fanohagna i Jehovah naho i Jesosy vaho ty anjely antika naho fa manompo tikagne. Hodinehentikagne ato ka tie akore ty ampisehoantika fa sarobily amantika o harena rehoe.

3. Ino ty harena tsy trea maso fara’e sarobily? Nagnino tika ro afake mahazo o harena iohoe?

³ Ty firagnetantikagne amy i Jehovah ty harena tsy trea maso fara’e sarobily. (Sal. 25:14) Nagnino tika ndaty tsy voririke ro afake  miragnetse amy i Jehovah, ie amy izao reke masigne? Ty anto’e, ‘magnafake ty fahota o ndatio’ ty sorogne natao i Jesosy. (Jaona 1:29) Fa niony i Jehovah tie tsy hivalike ampara-pahafate’e ty Jesosy, le hahavita hagnavotse o ndatio. Izay ty nahavy aze niragnetse tamy ty ndaty niaigne taloha ty nimateza i Kristy.—Rom. 3:25.

4. Ia iaby ohatse ty ndaty niragne i Jehovah taloha ty niavia i Jesosy tan-tane etoy?

⁴ Agnisa ty niragnen’Andrianagnahare ty Abrahama ndra tie niaigne taloha ty niavia i Jesosy tan-tane etoy. Niambake ty finoagne nanagna’e, le mbe tinoka i Jehovah tihoe “ragneko” reke ndra tie fa 1000 taogne mahery tafara ty nimateza’e. (Isaia 41:8) Tsy mahavita mampisarake i Jehovah amy ty ragne’e maifitse aze areke ndra o fateo. Mbe velogne avao ty Abrahama amy i Jehovah satria agnate ty fitadidia’e ao. (Lioka 20:37, 38) Ragne i Jehovah ka ty Joba. Trea tie natoky i Joba ty Jehovah naho henteagne ty saontsi’e miomba aze tagnatreha o anjelio eo tamy ty fivoria iareo an-dagnitse agne. Hoe reke: ‘Lahilahy tsy manan-tahigne reke, sady ndaty maren-tane naho matahotse an’Andrianagnahare, vaho magnalavitse ty raha raty ka.’ (Joba 1:6-8) Tsy nivalike tamy i Jehovah ka ty Daniela ndra tie niaigne tamy ty tane feno ndaty mpanompo sampy agne tagnate ty 80 taogne. Naho fa niantetse reke, le nisy anjely nagnomey toky aze intelo tie tena tea aze ty Jehovah. (Dan. 9:23; 10:11, 19) Afake matoky tika tie tena fa tsy ligne i Jehovah ty hamelogne indraike i ragne’e tsy foe’e rey.—Joba 14:15.

5. Ino ty toko’e hataontikagne naho te ho ragne i Jehovah maifitse aze tika?

⁵ An-tapetrisa’e ty ndaty tsy voririke minamagne amy i Jehovah amy hinane zao. Mirehake izay tika satria maro ty lahilahy naho ampela vaho ajaja magneran-tane mampiseho amy ty raha atao’e tie ragnen’Andrianagnahare. “Ty ndaty maregne ro managne fifandrambesagne maifitse” amy i Jehovah. (Ohab. 3:32) Noho iareo mino i solovoigne natao i Jesosỳ ty mahavy iareo ho afake hiragnetse amy i Jehovah. Noho o solovoigne iohoe, le engà i Jehovah hanokan-tegna ho aze naho hatao badisa ka tikagne. Naho manao o dingagne lahibey rehoe rehe, le ho agnisa ty ndaty an-tapetrisa’e “mifandrambe maifitse” amy i Andrianagnahare Fara Tampo’ey.

6. Akore ty ampisehoantikagne fa sarobily amantikagne tihoe ragne i Jehovah?

⁶ Akore ty ampisehoantika fa sarobily amantika ty firagnentantikagne amy i Jehovah? Tsy nivalike tamy i Jehovah tagnate ty zato taogne mahery zao ty Abrahama naho i Joba. Tsy toko’e hivalike amy i Jehovah ka tikagne ndra fa ela ndra vaho tsiela ty nanompoantikagne aze. Toko’e hanahake i Daniela ka tika, le ty firagnetantikagne amy i Jehovah ro toko’e ho heverentikagne ho sarobily ambone ty fiaintika. (Dan. 6:7, 10, 16, 22) Hahavita hiaretse ty olagne mahazo antikagne tika noho ty fagnampea i Jehovah, le ho mpiragnetse ama’e avao.—Fil. 4:13.

7. a) Akore ty fihevera i Jehovah i vavake ataontikagney rey, arake ty Ohabolana 15:8? b) Akore ty amalea i Jehovah ty vavake ataontikagne?

⁷ Agnisa ty harena tsy trea maso ka ty vavake. Mifampirehake ze raha an-tsai’e naho am-po iareo ao ohatse ty ndaty mpiragnetse  maifitse. Hoe izay ka fa amy ty alala ty Saontsi’e ty agnambara i Jehovah amantika ty vetsevetse’e naho ze raha agn’arofo’e ao. Fa ty antikagne, amy ty alala ty vavake ty irehafantikagne ze raha eretseretentika naho ze raha am-pontikagne ao ama’e. Tena mahafale i Jehovah ty mijanjigne ty vavake ataontika. (Vakio ty Ohabolana 15:8.) Ragnetse bey hatea reke, le mamale i vavake ataontikagne rey ka. Tsiela avao ty amalea’e ty vavake ila’e, fa misy fotoagne va’e ho elaela, le mila mivavake avao tika amparake ty ivalea’e. Faie matoky tika fa tsy maintsy ho valea i Jehovah amy ty fotoagne mete i vavake nataontikagney. Va’e tsy ho arake ty nieretseretentika ty fomba amalea’e aze faie izay ty vazoho’e fa tena mahasoa antika. Va’e tsy hafaha’e ohatse ty olagne mahazo antikagne kindraike, faie homei’e hilala naho hery tika mba hahavitantikagne ‘hiaretse izay.’—1 Kor. 10:13.

8. Akore ty ampisehoantikagne fa sarobily amantikagne ty vavake?

⁸ Asehontika fa sarobily amantikagne ty vavake naho orihentikagne i toroheve i Jehovah tihoey tie “mivavaha lognandro.” (1 Tes. 5:17) Tsy mamoresé antika hivavake ama’e reke fa mandrisike antika avao tie “mahareta amy ty vavake.” (Rom. 12:12) Mankasitrake o fagnomezagne iohoe areke tika naho mivavake amy i Jehovah mateteke isan’andro. Faie tsy toko’e ho halignontikagne fa toko’e hisaotse naho hidera aze ka tika naho fa mivavake.—Sal. 145:2, 3.

9. Manao akore ty fihevera ty rahalahy raike ty vavake? Akore ka ty fihevera’o ty vavake?

⁹ Fa ela vao rehe ty nanompo i Jehovah, sady fa nahatrea ty fomba namalea’e ty vavake nanoe’o? Naho izay, le vao mainke toko’e ho sarobily ama’o ty vavake. Nahatsapa izay ty rahalahy raike atao tihoe Chris. Fa nanompo marain-tsy hariva tagnate ty 47 taogne reke. Hoe reke: “Teako ty mifoha maraindray bey, amy izay raho afake mirehake maharetse amy i Jehovah. Ty anto’e, mbe bangigne soa ty amy izay sady mahatrea ty hasoasoa o raha niforogne i Jehovah-o raho naho fa tarafe i masoandro vaho mibeakey. Manjare te hisaotse aze areke raho noho ty raha iaby nimei’e, agnisa izay ty tombotsoa hivavake ama’e. Naho fa boake nivavake ama’e ka raho naho fa hariva, le manjare milamigne ty saiko sady azon-droro soa.”

10. Nagnino ro toko’e ho sarobily amantikagne ty fagnahy masigne?

¹⁰ Harena sarobily tsy trea maso ka ty fagnahy masigne. Nandrisike antika mba hangatake fagnahy masigne avao ty Jesosy. (Lioka  11:9, 13) Amy ty alala io ro agnomea i Jehovah antika “hery fagnampe’e.” (2 Kor. 4:7; Asa. 1:8) Ndra inogn’ino areke olagne manjò antikagne, le ho vitantika ty hiaretse izay noho ty fagnampea ty fagnahy masigne.

11. Akore ty fomba agnampea ty fagnahy masigne antikagne?

¹¹ Afake magnampe antika hahavita ze asa anendreagne antikagne ty fagnahy masigne. Tsy izay avao fa afake mampitombo ty fahaiantikagne ka io. Naho ty maregne, le tsy ho nahatrea vokatse soa amy ty fanompoagne tika naho tsy eo ty fagnampea ty fagnahy masigne.

12. Magnampe antika hanao ino ty fagnahy masigne, arake ty Salamo 139:23, 24?

¹² Akore ka ty ampisehoantikagne fa sarobily amantika o fagnahy masigneo? Mila mangatake fagnahy masigne tika mba hagnampe antika hamantatse ze eretsere-draty ndra fagnirian-draty am-pontikagne ao. (Vakio ny Salamo 139:23, 24.) Naho manao izay tika, le hampahafantare i Jehovah amy ty alala ty fagnahi’e o raha rehoe. Ie naho fa haintikagne ze eretsere-draty ndra fagnirian-draty am-pontikagne ao zay, le toko’e hangatake fagnahy masigne tika mba hahazo hery hanoheragne izay. Naho manao ireo tika, le mampiseho fa tapa-kevetse tsy hanao ty raha hahavy i Jehovah tsy hagnomey fagnahy masigne antika.—Efes. 4:30.

13. Ino ty toko’e hataontikagne mba ho tena sarobily amantika o fagnahy masigneo?

¹³ Vao mainke ho sarobily amantikagne ty fagnahy masigne naho misaintsaigne ty raha vita’e amo o androntikagne zao tika. Hoe ty Jesosy taloha ty niakara’e tan-dagnitse agne: ‘Hahazo hery nareo naho fa avy ama’areo  i fagnahy masigney, le ho vavolombeloko amy ty faritse fara’e lavitse amy ty tane toy iaby nareo.’ (Asa. 1:8) Tena izay vata’e ty raha miseho amy hinane zao. Noho ty fagnampea ty fagnahy masigne, le ndaty 8 500 000 mahery boake amy ty faritse sambe hafa magneran-tane ty nanjare mpanompo i Jehovah. Manjare managne toetse soa maro atao tihoe ‘vokatse ty fagnahy’ ka tikagne. Agnisa izay ty hatea, hafaleagne, fiadanagne, fitanam-po, hasoa fagnahy, hasoa toetse, finoagne, fahalemem-pagnahy, naho fifehezan-tegna. (Gal. 5:22, 23) Voka’e, manjare miray saigne tika vahoa i Jehovah magneran-tane sady milongo soa. Tena fagnomezagne sarobily vata’e areke ty fagnahy masigne!

14. Ia iaby ty magnampe antika naho fa manompo tika?

¹⁴ Agnisa ty harena tsy trea maso anagnantikagne tihoe “miara-miasa” amy i Jehovah naho i Jesosy vaho o anjelio. (2 Kor. 6:1) Miara-miasa amy iareo tika isake tie manompo. Izao ty nirehafe i Paoly miomba aze naho ze mandrambe anjara amo o asa iohoe: “Mpiara-miasa aman’Andrianagnahare zahay.” (1 Kor. 3:9) Miara-miasa amy i Jesosy ka tikagne naho fa manompo. Ty anto’e, izao ty raha nirehafe i Jesosy tafara i nandilia’e o mpiana’eo mba hampianatse ze ndaty amy ty tane toy iabỳ: “Ho ama’areo avao raho.” (Mat. 28:19, 20) Tena fale ka tika fa miara-miasa amo o anjelio. Iareo ty mitarike antika naho fa mitory i ‘talily soa tsy misy fara’e ... hotoriegne amy ty mponegne ambone tane etoỳ’ tikagne.—Apok. 14:6.

15. Mirehafa ohatse mampiseho fa tena magnampe antikagne ty Jehovah naho fa manompo tika.

¹⁵ Ino ty voka’e noho i Jehovah magnampe antika? Naho fa mitongy i tabiry i hafatse miomba i Fanjakagney tika, le va’e hitombo am-po ty ndaty soa fo ao i tabiry nitongisentikagney. (Mat. 13:18, 23) Ia ty mahavy i tabirỳ hitombo? Nirehake ty Jesosy tie tsy hisy ndaty hanjare mpanonjohy ty lia’e ‘naho tsy i Rae’e ro nitaogne aze.’ (Jaona 6:44) Magnamaregne izay ty tantara i Lydia boake a Filipy agne voarehake agnate Baiboly ao. Nitory tamy ty ampela maromaro tagne ty Paoly tie indraike, le agnisa ty nitsanogne aze teo ka reke. Izao ty rehafe ty Baiboly miomba i Lydia: ‘Nisokafe i Jehovah tanterake ty fo’e mba handrambesa’e soa ty raha nitorie i Paoly.’ (Asa. 16:13-15) An-tapetrisa’e ka ty ndaty fa nitaone i Jehovah, manahake i Lydia.

16. Ia ty toko’e homeagne voninahitse naho fa mahatrea vokatse amy ty fanompoagne tikagne?

¹⁶ Ia ty mahavy antikagne hahatrea vokatse amy ty fanompoagne? Mamale izay ty taratasy nisorate i Paoly hoahy ty fiangonagne ta Korinto agne. Hoe reke: “Izaho nambole, i Apolosy nanondrake, faie Andrianagnahare ro tsy nitsahatse nampitombo aze. Tsy i namboley ndra i nanondrakey areke ro inogne, fa i Andrianagnahare, i mampitombo azey.” (1 Kor. 3:6, 7) Toko’e hitsikombe i Paoly areke tikagne, le i Jehovah avao ro homeintika voninahitse naho fa mahatrea vokatse amy ty fanompoagne tikagne.

17. Akore ty ampisehoantika fa sarobily amantika tihoe “miara-miasa” amy i Jehovah naho i Jesosy vaho o anjelio?

¹⁷ Akore ty ampisehoantika fa sarobily amantika tihoe “miara-miasa” amy i Jehovah naho i Jesosy vaho o anjelio? Mampiseho izay tikagne naho fa manao ze azontikagne atao mba hitoriagne i talily soay. Maro ty fomba azo anoagne izay. Agnisa izay ty fitoriagne amy ty ‘toeragne maro ndaty naho isan-tragno.’ (Asa. 20:20) Maro ka ty tea mitory tsy nifamotoagne. Naho vaho misy ndaty vaho samba’e trea iareo, le salamà iareo i ndatỳ sady mikezake ho soa fagnahy iareo  naho fa mirehake ama’e. Naho vognogne hirehake i ndatỳ vaho izay iareo mitory ama’e i talily soa miomba i Fanjakagney.

18-19. a) Akore ty fomba anondrahantikagne ty tabiry i hamarenagney? b)  Mirehafa ohatse raike mampiseho tie magnampe o mpianatse Baibolio ty Jehovah.

¹⁸ Ino ka ty raha hafa toko’e hataontikagne ankoatse tihoe mitongy? Mila manondrake i tabirỳ ka tika. “Mpiara-miasa aman’Andrianagnahare” vata’e tikagne naho manao ireo. Naho fa misy ndaty liagne areke, le toko’e hikezake mafe tikagne mba hitilike aze, ndra hipay ndaty hafa hitilike aze mba hampianatse aze Baiboly. Ho fale tika naho fa mahatrea tie ampea i Jehovah hagnova ty fomba fiheve’e naho ty toetse’e i ndatỳ naho fa mianatse Baiboly.

¹⁹ Dineho ty tantara i Raphalalani, ni-ambiasa a Afrika Atimo agne toy. Tena nitea’e ty raha nianara’e tagnate Baiboly ao faie nisarotse tama’e ty nagneke ty raha rehafe ty Saontsin’Andrianagnahare miomba ty fifampirehafagne amy ty ndaty nimate. (Deot. 18:10-12) Faie nengà’e hamolavola ty fomba fiheve’e tsikedetsikede ty Jehovah. Tsy nanao ambiasa sasa reke tafara tatoy, ndra tie io avao aza ty niveloma’e amparake izay. Fa 60 taogne ty Raphalalani amy izao sady fa vita badisa ka. Hoe reke: “Tena isaorako o Vavolombelo i Jehovah-o noho iareo nikezake nagnampe ahy tamy ty fomba maro. Nampea iareo ohatse raho mba hahatrea asa. Tena misaotse i Jehovah ka raho satria nampea’e mba hagnova ty fiaignako, le afake manompo aze.”

20. Tapa-kevetse hanao inogne rehe?

²⁰ Nandineke harena sarobily efatse tsy trea maso tika tamy ty lahatsoratse toy. Ty firagnetantikagne amy i Jehovah ty fara’e sarobily amo o harena rehoe. Ty anto’e, naho fa itikagne ragne i Jehovah maifitse aze, le manjare mahazo i harena sarobily tsy trea maso ila’e rey. Agnisa izay tihoe mifandrambe ama’e amy ty vavake, mahazo ty fagnampea ty fagnahi’e masigne, naho miara-miasa ama’e naho amy i Jesosy vaho o anjelio. Lonike abey tika ho tapa-kevetse hampitombo ty fankasitrahantikagne o harena sarobily rehoe. Lonike ka tika hisaotse i Jehovah lognandro satria tsy misy Ragnetse fanjaka mihoatse aze.