HOAHY TY TANORA
12: Manàgna Tanjogne
INO TY DIKA IZAY?
Tsy mitovy amy tihoe magninofinofy tihoe managne tanjogne fa misy raha tsy maintsy atao. Mila alami’o mialoha ty fomba hagnatratraragne aze, fantaro tie ino ty hatao naho misy olagne sady mila mikezake mafe rehe naho fa avy eo mba ho tratse i tanjogney.
Misy ty tanjogne azo tratraregne agnate ty andro raike ndra heregnandro tsiampeampe sady misy ka ty agnate ty vola’e raike. Ty hafa va’e ho aman-tao’e vaho izay tratse. Faie ho tratse’o reke naho zarazarae’o ho dingagne maromaro.
NAGNINO ZAY RO TENA ILAEGNE?
Vao mainke hatoky tegna rehe naho mahatratse ty tanjo’o, hahazo namagne sady ho fale.
Hatoky tegna. Vao mainke ho sahy hagnatratse tanjogne sarotse rehe naho mahavita magnatratse tanjogne mora. Manjare hatoky tegna rehe, le ho afake hiatreke o olagne fitrea isan’andrò, ohatse taone ty namagne harengerenge.
Hahazo namagne. Ho tea o ndatio ty hiarake ama’o naho managne tanjogne rehe. Ty dika izay, ho fanta’o ze tea’o hatao sady vognogne hamita aze rehe. Vao mainke ho mpiragnetse maifitse nareo amy ty nama’o naho miarake magnatratse tanjogne nareo.
Ho fale. Ho fale sady ho afa-po rehe naho managne tanjogne sady tratse’o i tanjo’oy.
“Teako tihoe managne tanjogne. Manjare tsy maintsy mikezake magnatratse aze raho. Faie fale raho naho fa avy eo naho fa tratseko i tanjokoy satria vitako avao ty raha teako hataoko.”—Christophe.
TORO LALA TY BAIBOLY: “Tsy hitongy ze mpisamba tioke sady tsy hijinja ze mitalake i rahogney avao.”—Mpitoriteny 11:4.
INO TY AZO’O ATAO?
Oharo zao naho te hanagne tanjogne sady te hagnatratse aze rehe.
Fantaro tie inogne ty tanjo’o. Sorato ze tanjogne avy an-tsai’o ao, le alaharo naho fa avy eo tie ia ro tea’o ho tratraregne voaloha’e, faharoe, fahatelo, hatrake agne.
Mahaia mandamigne. Anò avao retoa mba ho tratse’o i tanjo’oy:
Farito ze date mete soa hamitagne aze.
Fantaro ze dingagne mila atao’o.
Eretsereto ze olagne va’e hiseho naho ty fomba hamahagne aze.
Atomboho amy izay. Eretsereto ze raha toko’e hatao’o voaloha’e sady le avy le anò zay ndra tie mbe tsy milamigne aza ty raha ila’e. Sorato amy ty taratasy ze dingagne vita’o.
TORO LALA TY BAIBOLY: “Ahazoagne tombo’e ty fandaminagne mialoha anoe ty mazoto.”—Ohabolana 21:5.
Va'e ho Tea'o Ka
TY HEVE TY TANORA MANAHAKE AZO
Ty Raha Nahafale Ahy Tamy ty Fiaignako
Te hanagne fiaignagne soa vao rehe? Tsanogno soa ty Cameron fa hirehake ty raha nahavy aze ho fale amy ty fiaigna’e.
