Tsy toko’e ho mpitari-bato vilam-bava o rae aman-dreneo, le ho hafa ty raha rehafe’e ie amy izao hafa ty raha atao’e. Akore ohatse naho misy ndaty mipay azo, le rei’e rehe mirehake tie: “Rehafo reke tie tsy ao raho”? Le hitamà vao rehe tie hirehake ty maregne i ana’oy?

“Tsy mete amo o ajajao i fomba firehake tihoey: ‘Ko magnente ty ataoko fa ze rehafeko ro anò.’ Ianara’e iaby ze raha trea’e naho ze rey. Sady ty vatantegna’e ro hirehake azo naho fa tsy mifagnarake amy ty raha rehafe’o ty raha atao’o.”​—Davida.

TORO LALA TY BAIBOLY: “Ihe mitory tie: ‘Tsy mete ty mangalatse’, mangalatse avao v’iheo?”​—Romanina 2:21.

Ty raha rehafe o rae aman-dreneo ro misy voka’e amo o ajajao naho o tanorao naho oharegne amy ty mitovy taogne ama’e. Ihe areke ro toko’e hanoro ty ana’o ty lalagne toko’e homba’e. Faie tsy ho mete zay naho mpitari-bato vilam-bava rehe.

“Misy raha zao ohatse fa aherenkeregne mateteke avao faie le tsy mipaoke o ajajao. Naho tsy mifagnarake amy ty raha rehafentikagne ty raha ataontikagne, le hirehake antikagne reke. Trea’e iaby ze raha ataontikagne ndra ty raha heverentikagne fa tsy trea’e aza.”​—Nicole.

TORO LALA TY BAIBOLY: “Ty hilala boake ambone agne ... tsy manao soa miatreke.”​—Jakoba 3:17.

Dineho ty raha atao’o. Soa fagnahy amy ty valy aman’ana’o vao rehe? Ndaty manao akore ty nama’o? Manao akore ty raha hentea’o ndra ty raha atao’o? Tea magnampe ty hafa vao rehe? Naho tsoregne le izao: Magnomey modely hoahy ty ana’o vao rehe?

“Tsy ampanoe’ay ty ana’ay ty raha tsy vita’ay mirovaly.”​—Christine.

Mikezaha hiala tsiny naho fa diso. Fa fanta ty ana’o tie tsy voririke rehe. Naho nanao raha tsy nimete tamy i vali’o ndra tamy ty ana’o areke rehe, le mikezaha hanao “ajafady” ndra “mifogne.” Amy izay ho tsapa’e tie tena ilaegne ty miambane sady magneke naho fa diso.

“Mora magneke ty hadisoa’e o ajajao naho rei’e manao izay tikagne rae aman-drene ndra rei’e miala tsiny naho fa diso.”​—Sabiny.