Fagnonteneagne Boake amo o Mpamakio

Nagnino ty Isaia 30:21 ro mirehake tie “boake afara’o ao” ty saontsy i Jehovah, faie aloha ao ty misy i Jehovah arake ty andine’e faha-​20 manao tihoe ‘hahatrea i Mpampianatsey ty maso’o’?

Hoe ty Isaia 30:20, 21: “Tsy hietake sasa i Mpampianatse Bey Voninahitse mampianatse azoy, sady hahatrea i Mpampianatse Bey Voninahitsey ty maso’o. Ndra mitsile magnavana rehe ndra mitsile magnavia, le ho rey ty sofi’o ty saontsy boake afara’o ao manao tihoe: ‘Intoy ty lalagne, le andehano.’”

Naho rambese o mpamakio ara-bakiteny o rehake reo, le ho trea’e aloha’e eo ty Jehovah, i Mpampianatse Bey Voninahitsey, faie ho rei’e boake afara’e ao ty fiaragnana’e. Faie tsy ara-bakiteny zay, le tsy toko’e ho rambesegne ara-bakiteny ka.

Mahavy antikagne hangalake sare an-tsaigne ty mpanompo raike vognogne hagnatanterake ty irake ampanoe ty tompo’e aze ty saren-drehake amy ty andine’e faha-20 eo. Magnente soa ze tondroe ty tagna i tompoy i mpanompoy mba hahafantara’e ze raha ampanoe’e aze. Mifantoke amy ty raha ampanoe i Jehovah aze ka ty mpanompo’e amy hinane zao, ty dika izay, ty toromareke ara-baiboly mei’e miandalagne amy ty alala ty fandamina’e an-tane eto. (Salamo 123:1, 2) Magnorike soa ze saontsie i Jehovah iareo, le vognogne hagnatanterake ze raha ambara’e amy ty alala ty mpanompo’e mahihitse naho mahimbagne.​—Matio 24:45-47.

Nagnino ro rehafegne fa maharey rehake boake afara’e ao ty mpanompo i Jehovah? Tihoe maharey rehake boake afara’e eo, le ty saontsy nisaontsie i Jehovah taloha, nisorategne amy Baiboly ao naho nihazavae i “mpanompo mahihitse naho mahimbagney.” (Lioka 12:42) Mijanjigne ty fiaragnanan’Andrianagnahare ty mpanompo’e amy hinane zao, naho fa mianatse soa o Baibolio, sady mampihatse ty toro lala’e mifagnarake amo o boke naho gazete niomane o “mpanompo mahihitse naho mahimbagneo.” Naho izay areke, naho fa mifantoke amy i toromareke mea i Mpampianatse Bey Voninahitsey o mpanompo’eo, sady mianatse ty Saontsi’e, nisorategne taonjato maro lasa zay, le sahala hoe, mahatrea aze aloha’e ao iareo sady maharey ty saontsi’e boake afara’e ao.—Romanina 15:4.