Nanagne teteke kedekede ta Galice amy ty faritse avaratse ahandrefa i Espaigne agne ty baba naho i nene tamy ty raho naterake. Nahafinaritse ty nifiaigna’ay tan-tragno tao. Valo zahay ty troke raike, le iraho ty fahaefatse. Tea nandefa ty ana’e amy ty lakilasy fiofagnagne ho pretra ndra lakilasy ara-pivavahagne ty ndaty a Espaigne agne tamy izay. Ajaja raike fara fahatsiampe’e ro mandeha agne fa ty tama’ay tao telo.

Niofagne ho masera ta Madrid agne manahake i zokeko ampelay raho naho fa nifeno 13 taogne. Hejeko ty fiaignagne tagne. Tsy nisy mpiragnetse zao ty tagne, hentetse ka ty fitsipike tao, nivavake avao ty atao sady nampijale tegna zahay. Vaho maraindray zahay, le fa nandeha nisaintsaigne tam-piangonagne agne. Faie tsy mba nisy raha ty tan-tsaiko tao. Nihira naho nanao lamesa tamy ty rehake latina zahay naho fa niavy eo. Tsy nisy niazoko i rahay, le hoe nilavitse zay ty Andrianagnahare tie tamako. Nitsìgne avao raho isan’andro. Ndra tie nifankatrea aza zahay amy rahavavekoy, le tsy nahazo nifampirehake afa-tsy tihoe: “Derao ty Maria virjiny.” Antsasa-dera avao ty azo’ay nifampirehafagne naho fa boake nihinagne. Faie tsy hoe izay ty nifiaigna’ay tan-tragno agne. Nahatsiaro ho irerike raho, le mateteke nitagny.

Tsy nahatsiaro ho nifandrambe aman’Andrianagnahare zao raho. Faie nanao vava avao raho, le nanjare masera raho tamy tie raho ni-17 taogne. Nanao ze raha nampanoegne ahike avao raho, faie tsielatsiela avao, le nihitako fa tsy mete amako i rahay. Nirehake avao i masera rey tie ho agn’afobey agne zao raho naho miroeroe saigne hoe izay. Faie tsy nampagninogne ahy zay. Fantako fa tsy mba nitokamonegne zao ty Jesosy Kristy fa nampianatse naho nagnampe o ndatio avao. (Matio 4:23-25) Tsy te ho masera sasa raho naho fa ni-20 taogne. Nahagaga fa nirehake tamako i lahibey o maseraoy tie, toko’e hiala malaky raho naho misalasala. Va’e natahotse reke tsy mone hanahake ahy avao ka ty hafa. Le nandeha vata’e raho.

Nitantaraeko tamy i Baba naho i Nene ty raha nanjò ahy naho fa noly raho sady niazo iareo soa zay. Faie tsy nisy asa ty tan-tanàgne tao, le nifindra tamy i zaiko lahilahỳ, tan’Alemaigne agne raho. Agnisa ty antoko Kominista Espaignola mipay raven’ahetseo reke. Nialy hoahy ty zo ty mpiasa naho ty zo ty ampela iareo, le niteàko ty niarake tama’e. Nanjare Kominista ka aza raho sady nanambaly ndaty agnisa o antoko iohoe ka. Nieretseretse raho tie hisy dika’e ty raha nataoko naho fa nizara ty boke o Koministao sady nilahatse t’agnarabey ey zahay.

Faie nanjare nikivy indraike raho naho fa tafara tatoy. Satria mateteke ro tsy magnatanterake ty raha rehafe’e o Koministao. Vao mainke niroeroe saigne raho tamy 1971, naho fa noroa ty tanora tamo o antoko iohoe ty Solontegnam-panjakà i Espaigne ta Francfort ao. Boseke iareo satria nao tsy rare’e zao ty raha natao i fitondragne manao didy jadogne a Espaigne aoy. Faie treako fa tsy mete ty raha natao iareo.

Nirehafeko ty valiko naho fa niterake i talen’ana’aỳ fa tsy hagnatreke ty fivoria o Koministao sasa raho. Nanjare nangìke raho, satria tsy mba nisy nitilike anay miroanake i namako taloha rey. Nanjare nieretseretse raho tie, ino koahe ty anto’e mba ivelomantikagne. Hisy voka’e avao vao ty kezake atao mba hagnasoaegne o fiaignagneo?

Nisy Vavolombelogne espaignola roe niavy tan-tragno’ay tao tamy 1976, sady nagnomey boke ara-baiboly. Nametrahako fagnonteneagne maro iareo naho fa niheregne. Agnisa izay ty miomba o fijaleagneo naho ty tsy fitoviagne ara-tsosialy vaho o tsy rare’eo. Tena nigaga raho fa nampiasa Baiboly avao iareo, mba hamaleagne i fagnonteneakoy! Le avy le nagneke hianatse Baiboly raho.

Mba te hahafanta-draha avao ty anto’e nianarako tamy ty voaloha’e. Faie niova zay naho fa nivory tamy ty tragno fivavaha o Vavolombelo i Jehovah-o agne zahay mirovaly. Fa nanagne anake roe zahay tamy izay. Soa fagnahy ama’ay o Vavolombelogneo, le nangalake anay an-tragno agne, sady nagnampe anay hiteza i ana’ay rey tagnate i fivoriagney. Nanjare tena niteàko iareo.

Faie mbe nisy raha nampisalasala ahy avao tamo o fivavahagneo, le nandeha nitilike ty keleiako ta Espaigne tagne raho. Mompera i dadatoa’aỳ sady natao’e ze hahavy ahy tsy hianatse Baiboly. Faie tena nagnampe ahy i Vavolombelogne tagne rey. Nivalea’e boake agnate Baiboly ao ty fagnonteneako, sady nanahake ty natao i Vavolombelogne tan’Alemaigne tagne rey avao. Nianatse Baiboly indraike raho naho fa niheregne tan’Alemaigne tagne. Tsy niova hevetse raho ndra tie tsy nianatse sasa aza ty valiko. Nanjare Vavolombelo i Jehovah vita badisa raho tamy 1978.

Nanjare fantako ty anto’e iveloma o ndatio, naho fa nahafantatse ty maregne amy Baiboly ao raho. Mahazo tari-dalagne soa ka raho. Rehafe ty 1 Petera 3:1-4 ohatse fa toko’e ‘hagneke’ ty vali’e sady ‘hagnaja laleke’ aze o ampelao, sady ‘tsy hagnore’ satria “tena sarobily agnatrehan’Andrianagnahare eo” zay. Nagnampe ahy hanjare valy fanjaka naho rene mahay miteza i toro lalagne rey.

Fa ho 35 taogne teo ho eo zay ty naha Vavolombelo i Jehovah ahy. Sambatse raho manompo i Jehovah miarake amy i rahalahiko naho i rahavaveko magneran-tane rey. Fale ka raho fa manao hoe izay ty efatse amy i anako dime rey.