Boake an’Alemaigne agne ty baba faie nifindra ta Ostralia agne, tamy 1949. Nipay asa tamy ty toeragne fihaliagne safira naho orinasa mpamokatse courant-o reke. Nipetrake tambanevohitse ta Victoria agne reke, sady nanambaly i nene naho fa tafara tatoy. Terake tamy 1953 raho.

Nianatse Baiboly tamy ty Vavolombelo i Jehovah ty nene, naho fa afake taogne tsiampeampe. Mbe kede areke raho, le fa nahafantatse ty raha rehafe ty Baiboly. Faie tena tsy tea fivavahagne ty baba. Nanjare ni-mpiarotegne reke, le tena natahotse aze mafe ty nene. Nianatse Baiboly avao ty nene faie nietake. Nanjare tea’e ty raha nianara’e, le nirehafe’e tama’ay troke raike zay naho fa tsy tan-tragno tao ty baba. Nirehafe’e fa hanjare paradisa ty tane toy, sady ho sambatse zahay naho fa magnorike ty fitsipy ty Baiboly.​—Salamo 37:10, 29; Isaia 48:17.

Tsy maintsy niala ty an-tragno tao raho naho fa ni-18 taogne fa nitea jera loatse ty baba. Nino raho tie maregne ty raha nampianare i nene boake amy Baiboly ao. Faie tsy nampihareko i raha rey, satria tsy le raha lahibey tamako. Nanjare elektrisiana tamy ty toeragne fihaliagne raha ambane tane agne raho. Nanambaly raho naho fa ni-20 taogne, sady nahazo anak’ampela zahay naho fa nitelo taogne tafara izay. Nandineke indraike raho tie ino ty raha lahibey amy ty fiaignako. Fantako fa afake magnampe o keleiako o Baibolio, le nianatse Baiboly tamy ty Vavolombelo i Jehovah raho. Faie tena nanohetse ty valiko. Naho fa boake nivory raho tie indraike zay, le nampitahore’e tie ndra iraho tsy mianatse Baiboly sasa ndra miala ty an-tragno ao. Tsy nisy azoko natao, le tsy nifandrambe tamo o Vavolombelo i Jehovah-o sasa raho. Nanegnegne raho naho fa tafara tatoy satria tsy nitohizeko i fianarakoy, ie amy izao fantako fa soa io.

Nanoro ahy sare vetaveta ze mpiara-miasa tamako zay tie indraike. Nampangorigne ahy i rahay faie nanintogne ahy ka, le nagnenjeke ahy ty eretsereko. Fantako fa ho sazean’Andrianagnahare raho, satria tadidiko tie melohe ty Baiboly ze ndaty manao raha raty hoe izay. Faie mbe nagnente sare vetaveta avao raho, le nanjare tsy nampagninogne ahy sasa i rahay. Nanjare nandevoze’e iaby aza raho.

Vao mainke nanao raha nifanohetse tamy ty raha nampianare i nene raho, le nanjare nanao raha raty avao tagnate ty 20 taogne. Trea tamy ty raha nataoko fa raha raty avao ty mameno ty saiko. Nanjare nitea nirehake raty raho sady nitea nanao sole vetaveta. Niova ty fiheverako o filagneo. Maro ty ampela niarahako ndra tie niara-nipetrake tamy i valiko raho. Nanjare hejeko naho nampangorigne ahy ty tegnako, sady tsy nisy haja’e sasa raho.

Rava i tokantragnokoy sady tena poteke ka ty fiaignako. Nivavake tamy i Jehovah tamy ty foko raho. Niheregne nianatse Baiboly raho, ndra tie fa 20 taogne aza ty tsy nianarako io sasa. Fa nimate ty baba tamy izay, fa i nene nanjare Vavolombelo i Jehovah vita badisa.

Tena nifanipake hoe atimo naho avaratse ty fomba fiaignako naho ty fitsipy ty Baiboly. Faie te hahatsapa i fiadanan-tsaigne ampitamae’ey raho, le nikezake hifehe tegna sady tsy hirehake raty sasa. Nanapa-kevetse ka raho fa tsy hijangajanga sasa, ndra hiloka, ndra hanao mamo, ndra hangalatse naho fa am-piasagne agne.

Tsy azo o mpiara-miasa amako reo tie nagnino raho ro te hiova hoe izay. Nanao ze azo’e natao iareo tagnate ty telo taogne, mba hitaonagne ahy hiheregne amy ty taloha. Naho fa ‘nitonta’ ndra nirese i fahazaran-dratiko rey raho, le nikorake sady nagnompa, le fale iareo sady nirehake tihoe: “Izay kahe! Izay i Joe talohay zay!” Namparare ty foko ty reha iareo, le nanjare nikivy mateteke raho.

Feno sare vetaveta ty tam-piasagne tagne, ndra tamy ty ordinatera zay ndra tamy ty boke. Mifandefa i sare rey o mpiara-miasao manahake ty nataoko taloha. Nikezake niala tamy ty fahazaran-dratiko raho faie natao iareo avao ty hamandrihagne ahy. Niangaviako areke i ndaty nampianatse ahy Baibolỳ mba hagnampe naho hampahery ahy. Nitsanogne soa reke naho fa nirehafeko ze tam-poko tao. Naho fa niavy eo reke nanoro ahy ze andinin-teny afake magnampe ahy. Nirisihe’e ka raho mba hivavake lognandro.​—Salamo 119:37.

Navoriko i mpiara-miasa amako rey tie indraike. Nampagnomeako iareo labiera ze mpiasa roe tena nitragnon-toake tie taloha rezay. Le avy le nitabataba iareo tie: “Aia ka kahe! Iareo aza fa nialy mafe tamy i fahazaran-drati’ey!” Le namale raho tie: “Ie, iraho ka!” Tamy izay vaho nitsapa o mpiara-miasa amako reo tie nialy mafe mba tsy ho andevoze ty boke naho ty sare vetaveta raho. Tsy sinere iareo hagnente irey sasa raho tafara izay.

Nireseko avao i fahazaran-dratikoy tamy ty fara’e, satria tena nagnampe ahy ty Jehovah. Natao badisa raho, le nanjare Vavolombelo i Jehovah tamy 1999. Misaotse aze raho fa mbe afake managne fiaignagne malio naho sambatse indraike.

Izao vaho azoko tie nagnino ro tsy tea i Jehovah ty raha niteako taloha. Baba bey hatea reke, le te hiaro ahy amy ty voka-draty ty fagnenteagne sare vetaveta. Tena maregne ty raha rehafe ty Ohabolana 3:5, 6 manao tihoe: “Matokia i Jehovah amy ty fo’o fa ko miantehetse amy ty fahaia’o. Eretsereto amy ze raha atao’o reke, le hatao’e mandeha soa ty fiaigna’o.” Sady miaro antikagne areke ty fitsipy o Baibolio ro mahavy ty fiaignantikagne handeha soa.​—Salamo 1:1-3.

Nampangorigne ahy ty vatako tie taloha. Faie milamin-tsaigne raho tie amy izao sady misy haja’e. Fa niova raho, sady mamela ty heloko ty Jehovah vaho magnampe ahy. Nanambaly i Karolin raho tamy 2000. Kristiana mahafinaritse reke sady tea i Jehovah manahake ahy. Milamigne ty tokantragno’ay. Fale zahay fa agnisa ty keleia ty mpirahalahy Kristiana magneran-tane malio sady bey hatea.