Ta Paddington tao ty niterahagne ahy. A Londres, Angletera agne ty misy o tanàgne iohoe sady tena maro ty ndaty agne. Niarake nitoboke tamy i reneko naho ze zokeko telo vave rey zay raho, tamy izaho mbe nikede. Mamo lava ty babako, le mateteke ro tsy noly an-tragno.

Tamy izaho mbe nikede, le nampianare i reneko nivavake isan-kariva. Nanagne Baiboly kedekede zay raho, faie ty boke i Salamo avao ty tagnate’e tao. Namorognako feo’e aza i hira agnate’e ao rey amy izay mba hirako. Namaky boke tsy ara-pivavahagne zay raho tie indraike, le nitreako tao ty rehake retoagne: “Indraike andro agne rehe, le tsy hahatrea ty hamaray.” Tsy nimete afake an-tsaiko ao o rehake rehoe, hafarako tsy nimete azon-droro nanomboke tamy izay, fa nieretseretse ty hoavy avao. Hoe raho: ‘Tsy mino raho tie hoe izao avao ty fiaignagne. Fa ino moa ty anto’e nampisy ahike?’ Tsy te ho mate raho!

Nanjare tena te hahafantatse miomba o mazio raho. Nagnohatse nirehake tamo o ndaty fa nimateo areke raho, le nandeha an-kibory ey niarake tamo o mpiara-mianatse amakò, sady nagnente filma horera rey. Soasoa ty magnente aze faie mampatahotse ka.

Mbe ni-10 taogne avao raho, le fa tsy nimete anaragne. Nanomboke nifoke sigara raho, sady tsielatsiela avao le fa nandevoze’e. Nanjare nifoke rongony aza raho tafara tatoy. Tamy izaho 11 taogne ty ninon-toake voaloha’e. Tsy teako ty tsiro i toakey fa izaho mamoy avao o teakò. Tea raha magneno naho mandihy raho. Nangalatse namonje fete naho namonje boate areke raho isake tie nahatrea fomba hanoagne izay. Amy i halegney raho ty mandeha, le mimpoly raho naho fa maraindray bey tsikiake. Rokake raho naho fa maray igne, hafarako tsy avy an-dakilasy agne. Ndra naho mianatse raho, le mateteke le avy le ninon-toake naho vaho vita ty matiera raike.

Tena latsake bey ty moieniko tamy izaho nianatse fara’e. Nidiso tamà ty reneko tamy izay sady niboseke reke satria nihai’e tie o rengerengekò avao nahavy izay io. Nifamale zahay, le niala ty tama’ay tao raho, le nitoboke tamy i sipako zay agne. I Tony ty agnara’e. Rasita reke sady nalaza ho masiake. Nivarotse rongony ka reke sady nangalatse. Nivesatse raho tsiela tafara izay. Niterake lahilahy raho, ie amy izao vaho ni-16 taogne raho tamy izay.

Nisy fotoagne raho nitoboke tamo o tragno natao hoahy ty ampela miteza irerike ty ana’eo agne. Nimeigne efetse raike raho tie tagne mba hitobohako. Tagne ty nahatreavako Vavolombelo i Jehovah voaloha’e. Nisy Vavolombelo i Jehovah roe vave rey zay fa mitilike mateteke ty tanora ila’e tamy i toeragney tao. Nagnatreke i fianara iareoy raho tie indraike. Ty anto’e, te hagnaporofo raho tie tsy maregne ty raha ampianare o Vavolombelo i Jehovah-o. Faie nivalea iareo roe vave boake amy Baiboly ao iaby ze fagnonteneagne napetrako tamy iareo. Tena niteako iareo satria tsy mba niboseke fa nitony avao sady soa fagnahy ka. Nagneke areke raho naho fa nanasa ahy hianatse Baiboly iareo.

Ie tsiela tafara izay, le nisy raha nitreako zay nagnova ty fiaignako. Natahotse ty ho mate raho amparake ty nahakede ahy. Faie nanjare nifantako tie nampianatse ty Jesosy fa mbe hovelomegne o ndaty fa nimateo. (Jaona 5:28, 29) Nanjare haiko ka tie midare antika ty Andrianagnahare. (1 Petera 5:7) Tena nanohigne ty foko ka ty raha rehafe ty Jeremia 29:11. Hoe reke: “‘Haiko soa ty raha fa vinetsevetseko hanoegne ama’areo’, hoe ty Jehovah. ‘Ty hagnomey anareo fiadanagne ty vetsevetseko fa tsy loza, mba hahavy anareo hanagne fiaignagne soa vaho raha tamaegne naho fa afara agne.’” Nanjare nino areke raho tie azoko atao ty hiaigne nainai’e amy i paradisa an-tane etoỳ.​—Salamo 37:29.

Tena naneho hatea tamako o Vavolombelo i Jehovah-o. Tamy izaho nivory voaloha’e tamy iareo tagne ohatse, le tena nirambese iareo soa sady tena nisoa fagnahy tamako iareo iaby. (Jaona 13:34, 35) Faie tsy mba natao hoe izay raho tamy ze fivavahagne raike tama’ay teo zay. Nirambese o Vavolombelo i Jehovah-o soa raho, ndra tie niraty findesam-batagne aza. Nanokagne fotoagne ohatse iareo mba hiarahagne tamako. Nikarakara ahy ka iareo sady tena nagnampe ahy. Hoe manahake ty keleia iareo ty nindesa iareo ahike.

Tsapako tamy ty raha nianarako tie nila niova raho naho te hagnorike ty lilin’Andrianagnahare miomba ty findesam-batagne. Faie nisarotse tamako ty niala tamo o sigarao. Tsapako ka tie vao mainke te hifoke rongony raho naho fa misy hira ila’e rey zay reiko. Novàko areke ty hira fitsanogneko. Tsy namonje fete naho namonje boate ka raho, satria manjare te hinon-toake maro raho naho fa nandeha tagne. Tsy niarake tamy i namako taloha rey sasa raho, fa nikezake niragnetse tamy ty ndaty afake magnampe ahy hiova.​— Ohabolana 13:20.

Nianatse Baiboly tamo o Vavolombelo i Jehovah-o ka ty Tony. Nivalea iareo boake amy Baiboly ao ty fagnontenea i Tony, hafara’e nirese lahatse reke tie tena maregne ty raha ianara’e. Tena niova reke. Tsy niarake tamy i ragne’ey taloha rey sasa ka reke, tsy nangalatse sasa, sady tsy nifoke rongony sasa. Nila nagnova ty findesam-bata’ay areke zahay. Tsapa’ay ka tie nipay anay i ana-dahi’aỳ, le nivaly zahay tamy 1982.

Nipaliaeko ze Fitalakesan-davitse naho Mifohaza! * misy tantara o ndaty nanagne fahazaran-draty manahake ahy, faie nahavita niala tamy izay. Tena nampahery ahy ty fiovagne natao iareo. Nandrisike ahy hikezake mafe naho tsy ho kivy ty fahatreavako irey. Mateteke ka raho nivavake tamy i Jehovah mba tsy hahafoe ahy. Natao badisa zahay mirovaly tamy Jolay 1982, le lasa Vavolombelo i Jehovah ka.

Va’e fa nimate raho hinane zay naho tsy niragnetse tamy i Jehovah. Tsapa’ay mirovaly ka tie nanohagne anay avao ty Jehovah naho fa niatreke raha sarotse zahay. Nianatse nitoky tama’e zahay, le lava nagnampe naho nampahery anay keleian-draike avao reke.​—Salamo 55:22.

Nahafinaritse ahike ty nagnampe i ana-dahi’ay naho i anak’ampela’aỳ hahafantatse i Jehovah. Fale ka raho mahatrea o zafekò mianatse miomba aze.

Manjare azon-droro soa raho hinane zao isan-kalegne, fa tsy minekoneko miomba ty hoavy sasa, ndra matahotse ty ho mate. Mitilike o fiangona o Vavolombelo i Jehovah-o zahay isan-keregnandro mba hampaherezagne iareo. Miarake amy iareo mampianatse o ndatio zahay tie hiaigne nainai’e ze ndaty mino i Jesosy.