“Tamy tie iraho mbe nikede, le lava jinera ze zokeko lahilahy zay avao sady niteratera’e. Naho fa nanambaly ka raho le nampijalejalé ty rafozako ampela. Natao i rafozako rey manahake o ndevò raho. Hafarako areke ni-te hamono tegna.”​—Madhu, a India.

 Arake ty rehafe ty Fikambanagne Iraisam-pirenena Miomba ty Fahasalamagne le “trea magneran-tane ty fampijaleagne atao amo o ampelao.” Nirehake ka iareo fa ampela raike agnate ty telo eo ho eo ty ihara ty fampijaleagne ara-batagne ndra misy mamahotse.

 Naho agnisa ty ampela fa nitrà izay rehe, le va’e harikarike avao rehe amy ze toeragne homba’o tie kera hisy hijera ndra hisy hiteratera ndra ka hisy hamahotse. Noho izay ty va’e hahavy azo hieretseretse tie tsy misy dika’e o ampelao. Faie akore ty fivazohoan’Andrianagnahare o ampelao?

 Andinin-teny: “Lahilahy naho ampela ty nagnamboara’e [Andrianagnahare] iareo.”​—Genesisy 1:27.

 Ino ty tea izay horehafegne? Lahilahy naho ampela ty nanoan’Andrianagnahare o ndatio. Sambe fagneva ty ho hajaegne iareo ty aman’Agnahare. Tean’Andrianagnahare “ho tea ty vali’e manahake ty tegna’e” ka ty lahilahy fa tsy tihoe hikomandikomandy aze ndra hanao rehake mahavoa fo ndra hijera aze. (Efesianina 5:33; Kolosianina 3:19) Trea boake amy izay fa tena tean’Andrianagnahare hahatsapa ho voaro o ampelao.

 “Nisy longo’ay zay namahotse ahy tamy tie iraho mbe niajaja. Naho fa ni-17 taogne ka raho le nihorohoroe i patròkoy tie ho roahe’e naho tsy mandre ama’e. Naho fa nanambaly ka raho naho fa tafara tatoy, le mbe nambanembané i valiko naho i rae aman-dreneko rey vaho i mpiharo tanàgne amako rey. Faie naho fa tafara tatoy, le nianatse ty miomba i Jehovah, b i Mpamorogney raho. Tena magnaja o ampelao reke. Magnomey toky ahike zay fa tena tea ahy reke sady mihevetse ahy ho sarobily.”​—Maria, Arizantina.

 Andinin-teny: ‘Misy ragnetse tena tsy mahafoe mbe mandikoatse ty longo.’​—Ohabolana 18:24.

 Ino ty tea izay horehafegne? Manohagne azo ty tena ragnetse fa tsy magnenga azo hialy raike. Naho mete ama’o areke, le rehafo amy ze ndaty tena atokisa’o ze raha tsapa’o.

 “Nisy namahotse raho, faie tsy rinehako tama o ndaty zay tagnate ty 20 taogne. Nanjare tsy nahatrea fifaleagne raho voka izay sady ninekoneko naho nikivy. Faie nahatsiaro ho naivankivagne raho naho fa nitantarako tamy ty ndaty tena natokisako i raha nahazo ahikey.”​—Elif, Türkiye.

 Andinin-teny: “Ankigno ama’e [Andrianagnahare] ze mampinekoneko anareo, satria mikarakara anareo reke.”​—1 Petera 5:7.

 Ino ty tea izay horehafegne? Vognogne hijanjigne azo ty Andrianagnahare naho mivavake ama’e rehe. (Salamo 55:22; 65:2) Afake ty hagnampe azo reke mba hahatakatse fa tena sarobily ama’e rehe noho ireke mitretré.

 “Ndra tie nanahake ty fangirifiry o baeo aza ty hamafe ty alahelo nitsapako, le ty fianarako miomba i Jehovah ro nagnasitragne ahy. Voraheko aman’Agnahare amy ty alala ty vavake iaby ze raha tsapako. Ragnetse soa tena mahatakatse ze raha mahazo ahy reke.”​—Ana, Belize.

 Andinin-teny: ‘I Jehovah ... le hagnomey rare’e ty ndaty bode naho ze ndaty misy mampijale, amy izay iareo tsy horohoroe o ndaty mete mate mitoboke ambone tane etoy reo.’​—Salamo 10:17, 18.

 Ino ty tea izay horehafegne? Hofoagnan’Agnahare ty tsy rare’e, agnisa izay ty fampijaleagne o ampelao.

 “Le hoe nitelegne fagnafoly tena nagnasitragne ahy zay raho naho fa nahay tie kay mbe hofoagna i Jehovah avao ty fampijalejaleagne o ampelao. Le vata’e nahavy ahy hilamin-tsaigne ty nifahafantarako izay.”​—Roberta, Meksika.

 Naho mipay fagnazavagne fagnampe’e miomba ty raha ampitamae ty Baiboly rehe naho ty anto’e mahavy antika toko’e hatoky i fampitamàgne rey vaho ty fomba ampiasà o Vavolombelo i Jehovah-o ty Baiboly mba hagnampeagne o ndatio, le mangataha hotilihegne.

 Sintono amy Internet ao ty lahatsoratse toy.