Mahaliagne ty ankamaroa o ndatio ty fomba fiaigna ty ndaty tsy mihinan-kena naho ze raha boake amo o bibiò. Véganisme ty itokavagne i ndaty rey.

•   “O ndaty atao tihoe véganisme reo, le manoro amy ty fomba fisaigna’e naho ty fomba fiaigna’e fa manohetse ty famonoagne o bibio mba hohanegne, hagnamboaragne akanjo ndra ty fampiasagne aze amy ty raha hafa iareo.”​—The Vegan Society.

 Tsy tihoe noho o ndatio mitretré o bibio avao ty mahavy iareo tsy mihinagne hena naho ze raha boake amo o bibio fa noho ie te hagnasoa ty fahasalama’e, ty tontolo iaignagne ndra anto’e ara-pivavahagne.

•   “O ndaty miteza vatagneo zao mifily soa ty raha hohane’e. Faie tsy izay ty mahavy o ndatio mifily ty ho véganisme, fa noho ie te hagnasoa ty tontolo toy ndra managne toe-tsaigne filozofia, ndra ka noho ty finoa’e.”​—Britannica Academic.

 Ty tsy fihinanagne o henao naho ty raha boake amo o bibio vao ty fomba raike hahafahagne magnasoa ty tontolo toy? Ino ty rehafe ty Baiboly?

 Rehafe ty Baiboly fa hevere i Jehovah Andrianagnahare, a i Mpamorogne antikagney ho lahibey noho o bibio o ndatio sady nimea’e fahefagne amo o bibio iareo. (Genesisy 1:27, 28) Nengan’Andrianagnahare hihinagne o bibio ka iareo. (Genesisy 9:3) Faie ndra tie eo zay, le tsy ankasitraha’e ty fampijaleagne o bibio.​—Ohabolana 12:10.

 Naho enteagne ty raha rehafe ty Baiboly, le miankigne amy ty tsikiraidraike ty hanapa-kevetse tie hihinan-kena vao sa tsy hihinagne. b Faie tsy miankigne amy ty fifilianantikagne tie hihinagne ndra tsy hihinagne ty hahavy antika hankasitrahan’Andrianagnahare. (1 Korintianina 8:8) Tsy toko’e hitsaratsara ze fanapahan-kevetse rambese ty hafa tika, ndra mifily ty hihinagne reke ndra tsy hihinagne.​—Romanina 14:3.

 Rehafe ty Baiboly fa tsy miankigne amy ty fomba fiaignantikagne ty hahavoaha ty olagne amy ty tontolo toy eto. Ty anto’e mahavy ty ankamaroa ty olagne mahazo o ndatio, le boake amo o polotikeo, o fiaraha-monegneo, ty lamigne ara-toe-karena amy ty tontolo toy eto sady toe tsy misy ka afake mamaha ireo. Zao ty rehafe ty Baiboly:

•   “Ty mengoke tsy ombia ho vantagne.”​—Mpitoriteny 1:15.

 Hovahà i Mpamorogney ze olagne mahazo antika amy izao. Mampiasa rehake agn’ohatse ty Baiboly mba hirehafagne ty raha hatao’e.

•   “Le nahatrea lagnitse vaovao naho tane vaovao raho, fa tsy eo i lagnitse talohay naho i tane talohay, sady tsy nisy riake sasa.”​—Apokalypsy 21:1.

 O fitondran’olombelogneo ndra i “lagnitse talohay,” le hosoloen’Andrianagnahare “lagnitse vaovao,” ndra i Fanjakà’e an-dagnitse agney. Hafaha i Fanjakà’ey i “tane talohay” ndra o ndaty raty fagnahio, le hosoloe’e “tane vaovao” ndra ze ndaty magneke an-tsitrapo ty zoton’arofo’e.

 Naho fa hinday ambone tane etoy i Fanjakàn’Andrianagnaharey, le hianara o ndatio ty fomba hilongoagne amo o bibio naho hiarovagne o tontolo hiaignagneo.​—Isaia 11:6-9.