Vao mainke sarotse ama’o vao ty magnambake ty maregne naho ty vande ty amy izao? Ze raha mifagnarake amy ty eretsere’e naho ty sai’e avao ty atao o ndatio tie maregne ty amy izao fa tsy ze mifagnarake amy ty raha tena maregne sady tena misy. Maro ty ndaty mino magneran-tane tie tsy misy ze o hamarenagne zao.

 Faie tsy vaho amy izao ty isia o fomba fihevetse iohoe. Fa 2 000 taogne zay, ty Pontio Pilato, Governora Romana ro nagnontane i Jesosy hoe izao tie: “Ino ty maregne?” (Jaona 18:38) Ndra tie tsy nandigne ty namalea i Jesosy o fagnontenea’e iohoe aza ty Pilato, le trea fa tena lahibey o fagnonteneagne iohoe. Magnomey vale’e mahafa-po ty Baiboly sady afake magnampe azo hahafantatse ty maregne fa tsy hanahake ty tontolo toy mampifangaro ty maregne naho ty diso.

Tena misy vao ty maregne?

 Ie. Mampiasa ty rehake tihoe “hamarenagne” ty Baiboly mba hirehafagne raha tena maregne sady azo atokisagne. Ampianare’e fa i Jehovah a Andrianagnahare ty Foto o tena hamarenagneo, le izay ty mahavy aze tokavegne tihoe “Andrianagnahare ty hamarenagne.” (Salamo 31:5) Amy Baiboly ao ty ahatreavagne ty maregne miomba an’Andrianagnahare. Ampitoviegne amy ty hazavagne o hamarenagne iohoe. Ty anto’e, afake mitarike antikagne mba tsy ho voafita ty tontolo toy o hamarenagne iohoe.​—Salamo 43:3; Jaona 17:17.

Akore ty hahatreava’o ty maregne?

 Tsy tean’Andrianagnahare hagneke fahatane ty hamarenagne amy Baiboly ao tika. Mandrisike antikagne reke mba hampiasa ty fahaiantikagne misaigne mba handineke i hamarenagney fa tsy hiantehetse amy ty fihetseham-pontikagne avao. (Romanina 12:1) Tea’e tikagne naho “amy ty saintikagne iaby” ty ahafantarantika sady iteavantikagne aze. Mandrisike antika ka reke mba hagnamaregne amy Baiboly ao ze raha ianarantikagne.​—Matio 22:37, 38; Asan’ny Apostoly 17:11.

Ia ty nifotora o vandeo?

 Rehafe ty Baiboly fa boake amy i fahavalon’Andrianagnaharey, i Satana Devoly o vandeo. Tokave ty Baiboly tihoe “rae ty vande” ka reke. (Jaona 8:44) Navande miomba an’Andrianagnahare reke naho fa nirehake tamy i ndaty voaloha’e rey. (Genesisy 3:1-6, 13, 17-19; 5:5) Nanomboke teo ty Satana ty nampiparitake vande maro sady nagnetake ty maregne miomba an’Andrianagnahare.​—Apokalypsy 12:9.

Nagnino ty amo o androntikagne zao ro feno vande?

 Amo ze o andro iaignantikagne atao ty Baiboly tihoe “andro fara’e” zao, le mamitake ty ndaty amy ty tontolo toy eto ty Satana. Mateteke o ndatio ro mavande mba hamitahagne ty hafa sady hagnararaotagne iareo. (2 Timoty 3:1, 13) Maro ka ty fivavahagne amy izao mampianatse raha tsy maregne. Fa nirehafe ty Baiboly mialoha fa ty ndaty amo o androntikagne hinane zao, le ‘hipay mpampianatse ze tea’e, mba hahareiza’e ty raha mahafinaritse ty sofi’e fa tsy hitsanogne ty hamarenagne’ iareo.​—2 Timoty 4:3, 4.

Nagnino ro tena lahibey ty maregne?

 Toko’e hifampirehake ty maregne ty ndaty roe mba hahavy iareo hifampatoky. Tsy haharetse sady ho rava o finamagnagneo naho o fiaraha-monegneo naho tsy mifampatoky. Rehafe ty Baiboly fa tean’Andrianagnahare hioregne amy ty hamarenagne ty fanompoantikagne aze. Hoe reke: “Ze mivavake ama’e [Andrianagnahare] le tsy maintsy mivavake arake ty fagnahy naho ty hamarenagne.” (Jaona 4:24) Afake magnampe azo hahafantatse ty raha diso ampianare o fivavahagneo ty hamarenagne amy Baiboly ao. Io ka ty hagnampe azo tsy ho voafehefehe i vande rey amy ty fiaigna’o. Vakio ty lahatsoratse tihoe “Vande Mahavy o Ndatio Tsy ho Tea an’Andrianagnahare” mba hahafantara’o izay.

Nagnino raho ro tean’Andrianagnahare hahafantatse ty maregne ?

 Tean’Andrianagnahare ho voavonje rehe. Faie mila mianatse ty maregne miomba aze rehe mba hahazoa’o izay. (1 Timoty 2:4) Naho fa mianatse ty fitsipin’Andrianagnahare miomba ty fanoagne ty maregne naho ty vande rehe sady miaigne mifagnarake amy izay, le hanjare ho ragne’e maifitse aze. (Salamo 15:1, 2) Nalefan’Andrianagnahare ambone tane etoy ty Jesosy mba hagnampeagne o ndatio hahafantatse ty maregne. Tea’e hitsanogne ty fampianara i Jesosy tikagne.​—Matio 17:5; Jaona 18:37.

Hofoagnan’Andrianagnahare vao o vandeo?

 Ie. Hejen’Andrianagnahare io satria mahavy o ndatio hagnararaotse ty hafa. Toe fa nampitamà reke fa hamonovono ze ndaty tsy mete miova fa mavande avao. (Salamo 5:6) Ho tanterake ty fampitama’e toy naho fa hanao izay reke: “Haharetse nainai’e ty sogny mirehake ty maregne.”​—Ohabolana 12:19.