Eo ho eo amy ty dime arivo tapetrisa ty ndaty nieretseretegne hagnente ty Jeux Olympiques amy ty taogne 2024 toy. Ndaty mpanao sporo boake amy ty tane 206 sambe hafa ty mandrambe anjara amy i fihisagney. Hoe ty Thomas Bach, prezidà ty Komity ty Jeux Olympiques Iraisam-pirenena: “Io ty fotoagne agnisa ty mampiharo saigne naho mampilongo ty ndaty iaby magneneke ty tane toy. Andao homasahentikagne o fihisagne iohoe satria io ty hampilongo naho hampiharo saigne antika ndra tie misy tsy fitoviagne aza ty amantika.”

 Faie, o fihisagne iohoe vao ty tena mampiharo saigne naho mampilongo o ndatio? Ino ty raha tena hampilongo naho hampiharo saigne o ndatio?

 Tsy ty fanoagne sporo avao ty raha avy an-tsay o ndatio ao amy i Jeux Olympiques amy ty taogne toỳ. Mampisy olagne ara-piaraha-monegne naho ara-politike o fihisagne iohoe, hafara’e o ndatio tsy miharo saigne. Agnisa ze olagne rezay zao ty tsy fagnajagne ty zo o ndatio, o fagnavakavahagneo ndra ara-pivavahagne zay ndra amy ty lafi’e hafa. Eo ka ty tsy fitovia ty fari-piaigna o ndatio.

 Maregne fa toe mampifalefale o ndatio ty fihisagne iraisam-pirenena manahake o Jeux Olympiques-o. Faie naho ty maregne, le amy i fotoagne rey ty tena ahatreavagne ndaty managne toe-tsaigne raty naho manao raha raty. Le ze raha atao iareo zay ro vao mainke tsy mampiharo saigne naho tsy mampilongo iareo.

 Fa nirehafe ty Baiboly mialoha ty anto’e mahavy o ndatio tsy mete hiharo saigne. (2 Timoty 3:1-5) Naho te hahazo fagnazavagne fagnampe’e miomba o faminaniagne iohoe rehe, le vakio ty lahatsoratse tihoe “Efa Voalazan’ny Baiboly Mialoha ve ny Toe-tsain’ny Olona Amin’izao Andro Izao sy ny Zavatra Ataony?”

 Rehafe ty Baiboly fa tena hilongo soa naho hiharo saigne ty ndaty magneran-tane. Ampitamae’e fa hitraoke raike iaby ty ndaty ambone tane etoy naho fa ambane fifehea “i Fanjakan’Andrianagnahare” an-dagnitse agney.​—Lioka 4:43; Matio 6:10.

 I Jesosy Kristy ty Mpanjaka o Fanjakagne hampisy filongoagne magneran-tane iohoe. Izao ty rehafe ty Baiboly:

•   “Ho maro ty ndaty maregne sady tena hiadagne iareo.”​—Salamo 72:7.

•   “Horombahe’e ze mahantra mipay vonje ... Hagnafake iareo amy ty fampijaleagne naho ty hampiarotegne reke.”​—Salamo 72:12, 14.

 Ndra tie amy izao ka le mbe magnampe ndaty an-tapetrisa’e boake amy ty tane 239 mba hiharo saigne ty fampianara i Jesosy. Amy ty maha mpanonjohy ty lia i Jesosy o Vavolombelo i Jehovah-o, le mikezake ho tea filongoagne iareo. Naho te hahazo fagnazavagne fagnampe’e miomba izay rehe, le vakio ty Fitalakesan-davitse manao tihoe “Afaka ny Hifankatia ve ny Olona Mifankahala?”