Nirehake ty tompon’andraikitse ambone ila’e a Etazonia agne tamy 23 Mey 2023 tie misy voka’e raty amy ty tanora maro o tragnom-porarotse fifandrambesagneo.

•   Rehafe ty boke Social Media and Youth Mental Health: The U.S. Surgeon General’s Advisory, 2023 tie: “Va’e hahasoa ty ajaja ndra ty tanora ila’e o tragnom-porarotse fifandrambesagneo. Faie maro ka ty porofo mampiseho tie va’e hanimba ty say iareo naho ty fahasalama’e o raha iohoe.”

 Rehafe o boke iohoe avao ka ty voka-pikarohagne manoro tie nagnino ro mampinekoneko ty fampiasagne o tragnom-porarotse fifandrambesagneo.

•   Atahoragne ho kivy naho hinekoneko loatse, le hanjare ho voa ty areten-tsaigne ty ajaja 12 hatrake amy 15 taogne “mampiasa tragnom-porarotse fifandrambesagne mihoatse ty 3 lera isan’andro.”

•   Ty ankamaroa ty ajaja 14 taogne “nampiasa o tragnom-porarotse fifandrambesagneo ro nanjare tsy ampe roro, misy mitsibore amy Internet ao, mihevetse ty vata’e ho ampela raty ndra lahy raty naho tsy soa vatagne, le manjare mihevetse ty vata’e ho tsisy dika’e. Faie mateteke ro o ajaja ampelao ro tratse ze raha zay.”

 Ino areke ty azo o rae aman-dreneo atao mba hiarovagne ty ana’e amy ze raha rezay?

 Fantaro ty raha misy. Fantaro tie ino ty va’e hahavoa ty ana’o amo o tragnom-porarotse fifandrambesagneo ao, amy izay rehe afake manapa-kevetse naho enga’o hampiasa aze reke ndra tsy hampiasa.

•   Toro lala ty Baiboly: “Zaro amy ze lalagne toko’e homba’e o ajajao.”​—Ohabolana 22:6.

•   Naho mipay fagnazavagne fagnampe’e rehe, le vakio ty lahatsoratse tihoe “Tokony Hampiasa Tambazotran-tserasera ve ny Zanako?”

 Naho enga’o hampiasa tragnom-porarotse fifandrambesagne ty ana’o, le fantaro tie ino iaby ty raha va’e hagnoho-doza agnate’e ao. Henteo ka tie ino iaby ty raha atao’e ao. Akore ty hanoa’o izay?

 Arovo amy ze raha va’e hanimba aze ty ana’o. Ampiofagno ty ana’o mba hahafantatse tie ino iaby ty raha va’e hanimba aze amo o tragnom-porarotse fifandrambesagneo ao, le akore ty hatao’e mba tsy ho voa izay.

•   Toro lala ty Baiboly:“Ao tsy ho tognonegne ama’areo eo ty rehake miomba ty fijangajangagne naho ze kila raha va’e ho fahalotoagne ndra hatea mena ... Ko engagne hotognonegne ka ze findesam-batagne mahamegnatse naho ze rehake tsisy foto’e vaho o solesole vetavetao.”​—Efesianina 5:3, 4.

•   Naho te hahatrea soso-kevetse afake magnampe azo rehe, le vakio ty lahatsoratse tihoe “Ampianaro ny Zanakao mba ho Voaro Rehefa Mampiasa Tambazotran-tserasera.”

 Asio fetra’e ty fotoagne ampiasà ty ana’o aze. Fero ty fotoagne toko’e hampiasà’e i tragnom-porarotse fifandrambesagney, le isake ombia reke ro hampiasa aze.

•   Toro lala ty Baiboly: “Mitaoa lognandro mba ... hanahake o hendreo, le mahaia magnararaotse fotoagne.”​—Efesianina 5:15, 16.

•   Ampiasao i saresare tihoey Mba Mahirata Naho fa Mampiasa Internet mba hagnampeagne ty ana’o hahatakatse tie nagnino ro mila asiagne fetra’e ty fotoagne ampiasàgne o tragnom-porarotse fifandrambesagneo.