Amy 27 Janvie 2023 ty Andro Iraisam-pirenena Ahatsiarovagne i Famonovonoagne Kopa Beỳ, sady maro ty ndaty hankalaza io. Fa losotse ty 75 taogne lasa zay ty nisehoa i Famonovonoagne Kopa Beỳ. Tena nampangorigne ty raha niseho tamy izay, le va’e hieretseretse tikagne tie, nagnino ty Andrianagnahare ro nagnenga ty raha hoe igne hiseho.

•   Naho tea’o ho fantatse ty raha rehafe ty Baiboly, le vakio ty lahatsoratse tihoe “Nagnino ro Nengàn’Andrianagnahare Hamono Ndaty Maro Indray Mandeha o Naziao?”

 Tena nijale o Jiosio satria maro tamy iareo ty nimate tamy i Famonoagne Kopa Beỳ. An-tapetrisa’e iareo ty nivonoegne, sady fa soa omagne ty fomba namonoagne iareo. Nisy ndaty hafa ka nenjehegne naho nivonoegne tamy i Famonoagne Kopa Beỳ. Agnisa izay ty Vavolombelo i Jehovah. Nenjehegne iareo satria nino ty raha rehafe ty Baiboly.

•   Naho mipay fagnazavagne fagnampe’e rehe, le vakio ty lahatsoratse tihoe “Ino ty Nanjò o Vavolombelo i Jehovah-o Tagnate i Famonoagne Kopa Bey Natao o Naziaoy?”

 Maro ty ndaty matahotse ke mbe hisy raha raty hiseho manahake i Famonoagne Kopa Beỳ. Faie hasoan-draha fa nirehake ty Baiboly tie tsy hisy sasa ty loza hoe irey amy ty hoavy.

•   “‘Haiko soa ty raha fa vinetsevetseko hanoegne ama’areo’, hoe ty Jehovah. ‘Ty hagnomey anareo fiadanagne ty vetsevetseko fa tsy loza, mba hahavy anareo hanagne fiaignagne soa vaho raha tamaegne naho fa afara agne.’”​—Jeremia 29:11. a

 Ho avy eo ze fampitamaegne zay naho fa hofoagna i Jehovah Andrianagnahare o haratiagneo naho ty voka-drati’e. Tsy ho ela, le:

•   Habaibai’e ze ndaty raty fagnahy mampijale ty hafa.​—Ohabolana 2:22.

•   Hofoagna’e o fijaleagneo naho ze fanaintaignagne iaby.​—Apokalypsy 21:4.

•   Hovelome’e indraike o ndaty fa nimateo le hiaigne an-tane etoy.​—Jaona 5:28, 29.

 Mampahery ty fampitamaegne amy Baiboly ao sady afake matoky rehe fa ho avy eo ze raha rezay. Naho tea’o ho fantatse ty anto’e, le mandrisike azo zahay hagnohatse i fianaragne Baiboly miarake amy ty ndaty hampianatsey. Maimaim-poagne o fianaragne iohoe.