Izao ty nirehafe i Nicole rahavave raike a Kolombia agne: “Tena teako i anjomba i fanjakagney, satria miarake amo o keleiako ara-pagnahio raho tie agne.” Mahatsapa hoe izay ka vao rehe?

 Magneran-tane, le misy 63 000 eo ho eo ty Anjomba i Fanjakagney. Toeragne tena mete soa mba hanompoagne an’Agnahare i anjomba rey. Faie izao ka ty nirehafe i Davida, mpisava lalagne maharetse a Kolombia agne: “Vao mainke mahavy ty hafatse torientika hanintogne ndaty i Anjomba rey. Latsan-draha o ndatio naho fa mahatrea ty raha ataontika mba hahavy i Anjomba i Fanjakagney ho soa lognandro.” Tsy mahalatsa zay, satria miasa mafe tika mba hagnaliovagne naho hikojakojagne aze. Akore ty fomba anoagne izay?

 Ze fiangonagne mampiasa i Anjombay ty tompon’andraikitse amy ty fikojakojagne aze. Manao fandaharagne tsy tapake iareo mba hagnaliovagne i Anjombay. Misy asa hafa ka atao iareo mba hiarovagne i Anjombay tsy ho simba. Le avy le amboare iareo ka ze raha madinedineke mila amboaregne.

 Mba hagnampeagne o fiangonagneo amy ty fikojakojagne i Anjombay, le misy rahalahy maromaro tendré i SFA mba hampiofagne iareo. Anjomba i Fanjakagney enegne ndra folo farafahamaro’e ty iandraiketa ty tsikiraidraike amy i rahalahy rey. Teteze’e tsikiraidraike i Anjomba rey sady ampiofagne’e ty mpitory ao mba hahay hikarakara i Anjombay. Biribirie iareo tsikiraikiraike i Anjomba rey isake telo taogne sady fantare iareo ze raha va’e hagnoho-doza ndra ty raha hafa mila fikojakojagne.

 Tena mankasitrake ty fampiofagnagne omea i rahalahy rey o rahalahy naho rahavaveo. Hoe ty rahavave raike atao tihoe Indhumathi, boake an’Inde agne: “Tena soa i fampiofagnagney. Nianara’ay ohatse ty fomba fikojakojagne i Anjombay. Tena nahafale ahy zay.” Hoe ka ty rahalahy Evans, boake a Kenya agne: “Nianara’ay fa mba hahavy i fikojakojagney tsy handany vola bey, le soa naho le avy le amboaregne ze raha madinedineke mila fagnamboaragne.”

 Vola an-jato’e hatrake amy ty agnarivo’e dolara a ty lany amy ty fikojakojagne i Anjomba i Fanjakagney isan-taogne, arakarake ty toeragne misy aze, ty haela ty namboaragne aze vaho ty isa ty fiangonagne mampiasa aze. Vola boake aia ty anoagne izay?

 Tohanagne amy ty alala ty fagnomezagne an-tsitrapo ty fikojakojagne i Anjomba rey. Hoe ty rahalahy Alexander, boake a Kazakhstan agne: “Ampiasaegne amy ty raha hafa tena ilaegne ty ila’e amy i fagnomezagne rey. Agnisa izay zao ty Internet, courant naho ty rano. Ty ila’e ampiasaegne hiviliagne taratasy hampiasaegne an-kaboné agne, gan-tagnagne (gants), fitaovagne fagnaliovagne naho pentiry.” Misy fagnomezagne ila’e ka natao hanohagnagne ty asa magneran-tane. Ampiasaegne io mba hagnampeagne amy ty tetik’asa fikojakojagne tena lahibey atao magneran-tane.

 Naho maharetse roe ndra telo volagne ty ikojakojagne i Anjomba i Fanjakagney sady handany vola bey, le tsy maintsy ampahafantare o androanavi-pagnahio i rahalahy tinendre i SFA rey zay. Naho eké i SFA i tetik’asay, le ty fagnomezagne hoahy ty asa magneran-tane ty ampiasaegne. Tagnate i taom-panompoagne 2023-y, le 76 tapetrisa dolara teo ho eo ty nilany tamy ty tetik’asa miiake 8 793.

 Fa ela loatse zao ty namboaragne ze Anjomba i Fanjakagney raike ta Angola agne zay. Fa 15 taogne ty nisia’e, le maro ty raha simbasimba ama’e. Fa toko’e hisolo iaby zao ohatse ty fitaovagne mpamokatse courant ao, fa vakivaky iaby ka ndra i rindrigney. Misy rano boake amy i Anjombay ao ka zao mikararake mbamy ty ndaty mifagnefetse ama’e mbao. Nisy tetik’asa areke natao i SFA mba hamahagne ze olagne rey zay. Nandany 9 285 dolara o tetik’asa iohoe. Voka izay le nifale i ndaty mifagnefetse amy i anjombay rey sady tena nilatsa tamy ty fomba fiasantikagne.

 Fa nitégne ka zao ty tafo ty Anjomba i Fanjakagney a Polony agne sady ndra ty tapỳ falafike agnate’e ao aza le fa simbasimba tsy nimete namboaregne sasa. Neké i SFA areke ty hagnamboaragne i tafoy naho ty hanoloagne i tapỳ. Le 9 757 dolara ty nilany amy ze tetik’asa zay. Noho izay, le tsy naharetse an-tao’e i fagnavaozagney.

 Tsy tihoe mitsitsy i vola fagnomezagne rey avao ty fanoagne o fikojakojagneo fa magnomey voninahitse i Jehovah ka. Izao ty nirehafe ty rahalahy raike atao tihoe Shaun, boake a Tonga agne: “Noho ty asa fikojakojagne ataontika, le afake manompo i Jehovah amy ty Anjomba malio, milamigne naho azo ampiasaegne soa tika. Mahavy o ndatio hagnomey voninahitse i tahina’ey ka i Anjombay noho ze kezake ataontika rey zay. Tena mahafale antika areke ty manasa o ndatio ho avy amy i Anjombay ao.”

 Sambe afake magnalio naho mikolokolo i Anjombay tika iaby. Hoe ty Marino, mpampiofagne amy i fikojakojagney a Aostralia agne: “Sambe managne tombotsoa hikarakara i Anjomba i Fanjakagney tikagne iaby. Naho itikagne manao izay, le mitsitsy i vola fagnomezagne rey sady mampiasa aze soa amy ze toko’e ampiasagne aze.”

 Tena tea mikojakoja i Anjomba i Fanjakagney ka zao ty rahalahy Joel a Inde agne. Izao ty nirehafe’e: “Mahavy ahy hahazo sare an-tsaigne ty raha hiseho amy i tontolo vaovaoy agne ty fiharoagne miasa amo o rahalahio.” Izao ka ty nirehafe i Nicole, i nirehafentika taloha tagney: “Nikezake nagnalio raho tamy i rahalahy rey namboatse i tafo tan-kaboné aoy. Maregne fa tsy nagnampe iareo mivantagne raho faie afake nagnampe iareo mba tsy ho azon-doza.”

 Naho magniry hanao asa an-tsitrapo mba hikojakoja i Anjomba i Fanjakagney rehe, le mirehafa amy ty androanavi-pagnahy ama’areo eo. Tsy izay avao fa naho irehe ka manao fagnomezagne, le manohagne ty fikojakojagne i Anjomba’areoy naho ty Anjomba i Fanjakagney hafa magneran-tane. Naho manao fagnomezagne rehe, le azo’o ajògne mivantagne amy i boate amy i Anjombay ao rey zay ndra ka atao’o amy ty alala ty donate.dan124.com. Tena ankasitraha’ay ty fatariha’areo.