అవును. “లోక రక్షకునిగా” రాబోయే ‘నాయకుడైన మెస్సీయ’ గురించిన ఎన్నో ప్రవచనాల్ని, యేసు భూమ్మీదున్నప్పుడు నెరవేర్చాడు. (దానియేలు 9:25; 1 యోహాను 4:14) ఆయన చనిపోయిన తర్వాత కూడా, మెస్సీయ గురించిన ప్రవచనాల్ని నెరవేర్చాడు.—కీర్తన 110:1; అపొస్తలుల కార్యాలు 2:34-36.

•  “మెస్సీయ” అంటే అర్థమేమిటి?

•  ఒకరు కన్నా ఎక్కువమంది మెస్సీయ ప్రవచనాల్ని నెరవేర్చగలరా?

•  మెస్సీయ భవిష్యత్తులో వస్తాడా?

•  బైబిల్లో మెస్సీయ గురించిన ప్రవచనాలు ఎన్ని ఉన్నాయి?

•  యేసు నెరవేర్చిన మెస్సీయ ప్రవచనాల్లో కొన్ని

 మషీయాక్‌​ (మెస్సీయ) అనే హీబ్రూ పదానికి, క్రిస్టోస్‌​ (క్రీస్తు) అనే గ్రీకు పదానికి అర్థం “అభిషిక్తుడు.” కాబట్టి “యేసు క్రీస్తు” అంటే “అభిషిక్తుడైన యేసు” లేదా “మెస్సీయ అయిన యేసు” అని అర్థం.

 బైబిలు కాలాల్లో, ఒక వ్యక్తిని ప్రత్యేక స్థానంలో అధికారిగా నియమించేటప్పుడు అతని తలమీద నూనె పోసి అభిషేకించేవాళ్లు. (లేవీయకాండము 8:12; 1 సమూయేలు 16:13) దేవుడు యేసును మెస్సీయగా గొప్ప అధికారం ఉన్న స్థానంలో నియమించాడు. (అపొస్తలుల కార్యాలు 2:36) అయితే దేవుడు నూనెకు బదులుగా పవిత్రశక్తితో ఆయన్ని అభిషేకించాడు.—మత్తయి 3:16.

 లేదు. ఒక వేలిముద్ర సహాయంతో ఒక వ్యక్తిని మాత్రమే గుర్తించినట్లు, బైబిలు ప్రవచనాలన్నీ ఒక్క మెస్సీయ లేదా క్రీస్తు విషయంలోనే నెరవేరాయి. అయితే “అబద్ధ క్రీస్తులు, అబద్ధ ప్రవక్తలు పుట్టుకొచ్చి సాధ్యమైతే ఎంచుకోబడిన వాళ్లను కూడా మోసం చేయడానికి గొప్ప అద్భుతాలు, ఆశ్చర్యకరమైన పనులు చేస్తారు” అని బైబిలు హెచ్చరిస్తోంది.—మత్తయి 24:24.

 రాడు. మెస్సీయ ఇశ్రాయేలుకు చెందిన రాజైన దావీదు వంశం నుండి వస్తాడని బైబిలు ముందే చెప్పింది. (కీర్తన 89:3, 4) అయితే దావీదు వంశావళిని వివరించే యూదా పూర్వీకుల చరిత్రపుటలు ప్రస్తుతం అందుబాటులో లేవు. బహుశా అవి, క్రీ.శ. 70లో రోమన్లు యెరూషలేమును స్వాధీనం చేసుకున్నప్పుడు నాశనమైవుంటాయి. a కాబట్టి, యేసు దావీదు రాజవంశానికి చెందినవాడని నిరూపించడం అసాధ్యమైన పనిగా మారింది. కానీ, యేసు కాలంలో ఆ చరిత్రపుటలు అందుబాటులో ఉన్నాయి కాబట్టి, యేసు దావీదు వంశానికి చెందినవాడనే విషయాన్ని యేసు శత్రువులు కూడా ప్రశ్నించలేకపోయారు.—మత్తయి 22:41-46.

 మెస్సీయ గురించిన ప్రవచనాలు ఖచ్చితంగా ఇన్ని అని చెప్పడం సాధ్యం కాదు. మెస్సీయకు సంబంధించిన వృత్తాంతాల్ని లెక్కించే విధానం బట్టి కూడా ప్రవచనాల సంఖ్య మారవచ్చు. ఉదాహరణకు యెషయా 53:2-7 లో ఉన్న వృత్తాంతాన్నే తీసుకుంటే, మెస్సీయ విషయంలో నెరవేరాల్సిన ఎన్నో వివరాలు అందులో ఉన్నాయి. కొంతమంది ఆ వృత్తాంతం అంతటినీ కలిపి ఒక ప్రవచనంగా భావించవచ్చు. మరికొంతమంది, అందులోని ఒక్కో విషయాన్ని ఒక్కో ప్రవచనంగా భావించవచ్చు.