“ముగ్గురు జ్ఞానులు” ఎవరు వారు?

యేసు జననానికి సంబంధించిన దృశ్యాలు సాధారణంగా, ఒక పశువుల పాకలోని మేతతొట్టిలో శిశువైన యేసును పడుకోబెట్టినట్లు, నిలువుటంగీలు ధరించిన ముగ్గురు మనుష్యులు తమ ఒంటెలతో అక్కడికి చేరుకున్నట్లు సూచిస్తాయి. ఎంతో శ్రేష్ఠమైన దుస్తులను ధరించిన ఆ సందర్శకులను సాధారణంగా ముగ్గురు జ్ఞానులు అని అంటారు. వారి గురించి బైబిలు ఏమని చెబుతోంది?

బైబిలు ప్రకారం, జ్ఞానులని పిలువబడే ఈ వ్యక్తులు “తూర్పుదేశపు” వారు, అక్కడే వారు యేసు జననం గురించి తెలుసుకున్నారు. (మత్తయి 2:​1, 2, 9) అక్కడి నుండి యూదయకు చేరుకోవడానికి ఈ ముగ్గురు మనుష్యులకు చాలా కాలం పట్టి ఉంటుంది. చివరికి వారు యేసును కనుగొన్నప్పుడు ఆయన అప్పుడే జన్మించిన ఒక పసికందుగా పశువుల పాకలో లేడు. బదులుగా మరియ, “ఆ శిశువు” ఒక ఇంట్లో ఉండడాన్ని వారు చూశారు.​—⁠మత్తయి 2:​10, 11.

బైబిలు ఈ మనుష్యులను మాగీలు (మునీశ్వరులు) లేదా “జ్యోతిష్కులు” అని పిలుస్తోంది, అయితే వారు ఎంతమంది అనేది మాత్రం చెప్పడం లేదు. ది ఆక్స్‌ఫర్డ్‌ కంపానియన్‌ టు ద బైబిల్‌ “ఈ సందర్శకులు నక్షత్రం చేత బేత్లెహేముకు ఆకర్షించబడడంలో ఇంద్రజాలానికి, జ్యోతిష్యానికి మధ్యనున్న సంబంధం వ్యక్తమయ్యింది” అని స్పష్టం చేస్తోంది. బైబిలు అన్ని రకాల ఇంద్రజాలాన్ని, నక్షత్రాల నుండి సమాచారం సేకరించడానికి ప్రయత్నించే బబులోనీయుల అలవాట్లను స్పష్టంగా ఖండిస్తోంది.​—⁠ద్వితీయోపదేశకాండము 18:​10-12; యెషయా 47:​13.

ఆ మనుష్యులకు అందజేయబడిన సమాచారం ఏ మంచికీ దారి తీయలేదు. బదులుగా అది దుష్ట రాజైన హేరోదు అసూయాగ్రహాన్ని రగిల్చింది. తత్ఫలితంగా యోసేపు, మరియ, యేసు ఐగుప్తుకు పారిపోవాల్సి వచ్చింది, బేత్లెహేములో “రెండు సంవత్సరములు మొదలుకొని తక్కువ వయస్సుగల” మగపిల్లలందరూ చంపబడ్డారు. హేరోదు ఆ జ్యోతిష్కుల నుండి తెలుసుకున్న దాన్నిబట్టి యేసు జన్మించిన సమయాన్ని చాలా జాగ్రత్తగా నిర్ధారించుకున్నాడు. (మత్తయి 2:​16) వారి సందర్శనం వల్ల కలిగిన సమస్యలన్నింటి దృష్ట్యా, వారు చూసిన నక్షత్రమూ “యూదుల రాజుగా పుట్టినవా[ని]” గురించిన సందేశమూ యేసును చంపాలనుకున్న దేవుని శత్రువైన సాతాను నుండి వచ్చినవేననే నిర్ధారణకు రావడం సమంజసమే.​—⁠మత్తయి 2:⁠1, 2.