సహాయం కోసం అర్థిస్తున్నవారికి ఉపశమనం

బైబిలు మనస్తత్వశాస్త్ర గ్రంథం కాదు. అయితే, అది మనకు ఉపశమనమిచ్చి, మనకు ఎదురయ్యే కష్టాలు ఎన్నో ఉన్నప్పటికీ జీవితాన్ని విలువైనదిగా ఎంచడానికి మనకు సహాయం చేస్తుంది. వాస్తవికంగానే, లేఖనాలు ఇలా చెబుతున్నాయి: “స్త్రీ కనిన నరుడు కొద్ది దినములవాడై మిక్కిలి బాధనొందును.” (యోబు 14:⁠1) మన సొంత అపరిపూర్ణత మూలంగా మనకు కొన్ని శ్రమలు వస్తాయి. మానవులు అనుభవిస్తున్న బాధలకు ప్రధానంగా బాధ్యులెవరు?

బైబిలు అతడిని అపవాది, సాతాను అని పిలువబడే దుష్టాత్మగా గుర్తిస్తోంది. అతడు “సర్వలోకమును మోసపుచ్చుచు[న్నాడు],” మానవజాతికి ఎదురవుతున్న అనేక శ్రమలకు అతడే కారణం. అయినప్పటికీ అతడికింక ఎక్కువ సమయం లేదని కూడా బైబిలు మనకు చెబుతోంది. (ప్రకటన 12:​9, 12) భూనివాసులపైకి సాతాను తీసుకువచ్చిన వేదన అంతా త్వరలోనే దేవుడు జోక్యం చేసుకోవడం మూలంగా అంతమవుతుంది. బైబిలు చెబుతున్నదాని ప్రకారం, దేవుడు వాగ్దానం చేసిన నీతియుక్తమైన నూతనలోకం నిరాశానిస్పృహలను అంతమొందిస్తుంది.​—⁠2 పేతురు 3:​13.

మానవులు అనుభవిస్తున్న బాధ తాత్కాలికమైనదని తెలుసుకోవడం ఎంతటి ఉపశమనాన్నిస్తుందో కదా! యేసుక్రీస్తు అధికారమందలి దేవుని పరలోక రాజ్య పరిపాలన క్రింద అన్యాయం, బాధ అంతమవుతాయి. దేవుడు నియమించిన రాజు గురించి లేఖనాలు ఇలా చెబుతున్నాయి: “దరిద్రులు మొఱ్ఱపెట్టగా అతడు వారిని విడిపించును. దీనులను నిరాధారులను అతడు విడిపించును. నిరుపేదలయందును బీదలయందును అతడు కనికరించును, బీదల ప్రాణములను అతడు రక్షించును. కపట బలాత్కారములనుండి అతడు వారి ప్రాణమును విమోచించును. వారి ప్రాణము అతని దృష్టికి ప్రియముగా ఉండును.”​—⁠కీర్తన 72:​12-14.

ఈ ప్రవచనార్థక మాటల నెరవేర్పు అత్యంత సమీపంలోనే ఉంది. అద్భుతమైన పరిస్థితుల్లో పరదైసు భూమిపై మనం నిత్యజీవాన్ని ఆనందించవచ్చు. (లూకా 23:43; యోహాను 17:⁠3) ఓదార్పునిచ్చే ఈ లేఖన వాగ్దానాలను గురించిన జ్ఞానము, సహాయం కోసం అర్థిస్తున్నవారికి నిరీక్షణను, ఉపశమనాన్ని ఇస్తుంది.

[32వ పేజీలోని చిత్రసౌజన్యం]

కృంగిన బాలిక: Photo ILO/J. Maillard