KOANY! Ejaasi idwe luka Isirael aidok ecilet loka Yorodan! Aibo ejaasi akipi? Epol akiru naetepenenei kapak kana naka ekaru, ido eleleba ecilet lo idakikan idis kokau. Konye kwana, emameete akipi cut! Ido itorete kwana idwe luka Isirael neonit kwape etorotor Angolol Nakarengan! Aibo apotu akipi koloto? Aso kaanyutu.

Kedol apak na idwe luka Isirael atubor Kocilet loka Yorodan, abu Yawe kicorak Yosua alimokin itunga nu: ‘Edakete isasedotin asaduku naka aitutuket ido aingarenikin oni. Naicakiata akejekec akipi nuka Ecilet Loka Yorodan, enangi do akipi alele.’

Kodakutu isasedotin asaduku naka aitutuket, kodaka aingarenikin itunga. Kedolutu kesi Yorodan, kicakata kiding toma akipi. Apopirasi akipi noi ido idulok. Konye nepe atiroriata akejekec akipi, konang akipi apopira ka alele! Erai na aumokinet. Abu Yawe kotukok akipi kane aleleunatar. Atipet komameunos akipi ko cilet!

Kolomasi isasedotin lu adakitos asaduku naka aitutuket kiding na ecilet lo aonikit. Ipedori ijo aanyun kesi kotoma aputo kana? Kwape abwoatar kesi kanen, kitoroto idwe luka Isireal kere Ocilet loka Yorodan eonit!

Ketuboros itunga kere, kicorak Yawe Yosua alimokin itunga 12 luegogong ebe: ‘Kolomasi toma ocilet ne ebwoatar isasedotin lu edakitos asaduku naka aitutuket. Kolemutu amoru 12, koyangasi kibwaikis aiboisit naiperete akuare na. Kosodi kaingaren, kingita yesi idwekus anyoin apolou na amoru anu, ibusakinit yesi alimokin kesi ebe apotu akipi kopaikis alele ne atubio asaduku naka Yawe naka aitutuket Yorodan. Isitoikinete amoru nu yesi aumokinet na!’ Kosipok Yosua bobo amoru 12 ne abwoatar isasedotin kokiding na ecilet.

Awasia do, kolimok Yosua isasedotin lu adakitos asaduku naka aitutuket ebe: ‘Kodokutu yesi ko Yorodan.’ Nape edokunete kesi, kogeutu bobo akipi alele.