KOANY ibore yenerobo yen atakanu! Eario Yesu. Ekajakisi kesi nges okitoi. Ibubukitai isumalin akaninike ka akejeke. Kanukinyo ti ekotor idio itunganan aiswamaikin Yesu nu?

Erai naarai engarasi icietunga Yesu. Ijeni ijo luangai kesi? Ediope kakesi erai emailaika loaronon Satan Ekejodijodon. Arai ngesi ainakini Adam ka Keba aimwang Yawe. Satan ainakini luasurup luka Yesu aiswamaun epali lo loerono.

Sek da eringa Yesu kibubukino, kiswamanakis nges luasurup ke iboro lueroko. Kiitu epone lo abunotor kesi omanikor loka Getesemane ka ayangar nges? Luangai bo luasurup ngul? Eebo araas kesi ikayaitok luka ediini. Aanyutu nunyoika etupakinete.

Keyangasi ikiyaitok luka ediini Yesu, apotu ikeyakia kokerata. Kojalakis Yesu bon keda luasurupoke, naarai akuriakaros kesi. Konye ikiyakia Petero ka Yokana mam apotu koloto nelwana. Kotupata aanyun nunyoika etakanikinete Yesu.

Koyangasi Isasedotin Yesu nejai Anas, lo sek arai esasedoti lokapolon. Mam abu ekodet odau kane apak naepol. Koyangasi Yesu togo loka Kaiapa, lo kwana erai esasedoti lokapolon. Atukokina ikayaitok luka ediini togoke.

Togo loka Kaiapa nges apupere aosan. Eyautai itunga asabakin Yesu akiro. Kotemasi ikayaitok kere luka ediini ebe: ‘Ibusakinit Yesu aario.’ Kosodete aimuanakin aimul oreet ke, kodipidipoto da nges.

Iswamas nu kere kojai Petero kinga alaro. Alilim akware, aso kinokokis itunga akim. Nepipierete kesi akim, kongolia apese Petero kobala ebe: ‘Ajai nan etunganan loda ka Yesu.’

Kobongok Petero, ‘Mam cut!’

Kobalasi itunga Petero irwanauni ebe ijai ijo ka Yesu. Konye kotema Petero ebe mam erai abeit. Naiunikini Petero alimun nu kibelokin Yesu kongolia nges. Kitironikin Petero noi kanu einer nuaisab, kolot kosodi aimony.

Nepelomuni akolong Naikanyet tupuruc, koyangasi isasedotin Yesu aibosikec napolon nairiamanakinotor naenyaritai Sakedrin. Kane kinerata nuebeit kes aiswamaikin nges. Koyangasi nges nejai Pilato, ekayaiton loka Yudaya.

Kolimokis isasedotin Pilato: ‘Erono etunganan lo. Ibusakinit ngesi aario.’ Akaulo na aingitingit Yesu, kotema Pilato ebe: ‘Mam eong aanyunit adioronis kanejai ngesi.’ Kosodi Pilato aijukar Yesu nejai Kerod Antipa. Kerod nes ekayaiton loka Galilaya, konye iboie ko Yerusalem. Kerod da mam eanyunit adioronis kanejai Yesu, aso kinyaka bobo nges nejai Pilato.

Ekot Pilato aosikin Yesu. Konye ekotos lukasurup luka Yesu koosikinai emusubet ecie. Etunganan lo erai ekokolan Baraba. Erai do bala kwana iswan ikanyikape, koyau Pilato Yesu kinga. Kobala ngesi itunga ebe: ‘Koany! Ekabakakus!’ Konye kiworoto ikayaitok luka ediini: ‘Kolema nges! Koar nges! Koar nges!’ Aso koosik Pilato Baraba, koyangarete Yesu aiar.

Kibubuikinai Yesu okitoi Naikanyet iswan lukapaaran. Mam ijo ipedori aanyun kes kaput, konye kibubukinai nges nepepe kikokolak, ediopet epuai ka ece da epuai. Eringa Yesu ketwana, kolimok ediopet kakesi nges ebe: ‘Kiitu eong kiloma toma ajakanutukon.’ Kobongok Yesu ebe: ‘Esumunit ijo ebe ijaun nepepe keong Paradais.’

Mam ngin erai aisumunet naejok? Ijeni ijo Aparadais naebala Yesu? Aibo ajai a Paradais naeswamauni Edeke kageunet? Eebo, akwap. Kipuga Yesu kwape ekabaka kokuju, inyakuni ngesi etunganan lo toma aijar kosodi adumun ailel ko Paradais kakwap naitetet. Mam oni ipedori aiyalamikin kanukangun?