KOANY irikoi luenikinitai Paul, kongolia esirikalet lo Rome idari nges. Erai Paul eenat ko Rome. Idari ngesi kiton Kaisar ekayaiton lo Rome aanyun nuiswamaikini nges. Konye ecamaikitai itunga aipejoikin nges.

Akaulo na aparasia auni kedau Paul adolere Rome abu kijuka akirot nejaasi ingarenok luka Iyudayan abunere aanyun nges. Kwangin kopotu Iyudayan ko Rome luipu. Kolimonok Paul kes nuka Yesu kaajakanut naka Edeke. Icie kiyuutu koraunos Ikrisitayon, konye kongeroto luce.

Kolimonok bobo Paul isirikalei luegelegela luidarete nges. Ikar iarei luadau Paul eenitai kane abu kolimonok kwape apedoria. Kwangin kopup ekal da loka Kaisar akiro nukajokak nuka Ajakanut ido icie kakesi apotu koraunos Ikrisitayon.

Konye ingaibo epejonon loiwadikai komesa? Ipedori ijo adwarun? Eebo erai Timoteo. Timoteo da aenitai naarai alimonokini nuka Ajakanut konye elacakina bobo. Aso abuu nee kanu aingarakin Paul. Ijeni ijo nunyoika iwadikai Timoteo? Aanyutu beroni.

Itut ijo ireria luka Pilipi ka Epeso Kaitetemet na 110? Abu Paul kingarak ageun atukono nu Krisitayon koreria kangul. Kwana, kwana ne ejaar aidaris, iwadikaikin Paul Ikrisitayon lu ibaluwan. Ejaas ibaluwan obaibuli, ido enyaritai Ipeson ka Ipilipin. Ejai do kwana Paul alimokin Timoteo nuiwadikakini ipaperokec lukrisitayon ko Pilipi.

Kesiaka noi lpilipin kanejai Paul. Ejukakis ngesi ainakinet kane aidaris ido ejai do Paul aisialamikin kesi kane. Epapurodito nges ayauni ainakinet. Konye kodekakin noi aidiak atwanare. Angaleu do kwana ido ekapakina alosit ore. Eyangar ngesi ebaluwa lo kane ejai Paul ka Timoteo ebongori Pilipi.

Ne Paul aidaris kiwadik ibaluwan bobo iarei luejaas Obaibuli. Ediopet nejaas Ikrisitayon kore Kolosae. Ijeni ijo epone lo enyaritere? Ikolosain. Ecie erai loiwadikakit ngesi opaperoke loenyaritai Pilemon loiboie ko Kolosae. Ikamunit ebaluwa ekejakinan loka Pilemon loenyaritai Onesimo.

Abu Onesimo koker kanejai Pilemon kosodi abunere Rome. Kopone ece abu Onesimo isisiau ebe ejai Paul aidaris. Kipejok, kosodi Paul alimonokin Onesimo. Atipet koraun Onesimo da Ekrisitayot. Kwana etironikin ngesi kanu akeria. Aso ijeni ijo nunyoika iwadikat Paul obaluwa lo nejai Pilemon?

Ingisit Paul Pilemon aitim Onesimo. ‘Enyakuni eong nges neijai ijo,’ iwadikai Paul. ‘Konye mam kwana nges erai ekejanakinan kon bon. Erai bobo onac lominat lo kristayot.’ Kebongo Onesimo Kolosae, abu koyanga ibaluwan luu iarei, ediopet loka Ikolosain kosodi loce nejai Pilemon. Ipedor oni ajenikin epone lo eyalamikinor Pilemon apupun ebe araun ekejanakinan Ekrisitayot.

Ne ewadikaikina Paul Ipilipin ka Pilemon, ejaatar ngesi kakiro cut nukajokak. Olimokini Paul Ipilipin ebe: ‘Ejukuni eong Timoteo neijaas yesi. Konye epejokini eong da yes katipet.’ Kosodi nejai Pilemon, kiwadi ngesi: ‘Kitemok aibois nabuni eong aiboi kangina.’

Kelacakin Paul abu kipejok Ikrisitayon, inacan ka anacan kaboisio nuipu. Konye ekaulo aponi koenai bobo Paul ko Rome. Kapak kana ejeni do ngesi cut ebe ebeit aiar nges. Aso kiwadikak ngesi Timoteo abunere katipet. Iwadika Paul ebe: ‘Arai lem eong lomunot kanejai Edeke. Ido eropi Edeke eong.’ Ikar idis akaulo na aarere Paul, komudiarete Yerusalem bobo, ido Iromayon eswamaunete nu.

Konye ejaas acie Obaibuli. Koinak Edeke Yawe ekiyakia Yokana aiwadik itabon luawasia, nepepe keitabo loka Apukokinio. Eitabo lo loko Obaibuli elimorit nukoingaren. Aanyutu do kwana nunyoika ejaas ingaren.