AISISIAET 10
Eipone Bo Ani Ijenuna Ijo Aima Nakabeit?
1. Ejai ediini lokabeit adiopet bon?
“Kocoito inabin lukengalak.”—MATAYO 7:15.
Kisisianak Yesu iketupitok ediini ediopet bon, lokabeit. Eputosi kwape erot lo elosi aijar namam edaun. Kotema Yesu ebe: “luedumunete da eraas luikidioko.” (Matayo 7:14) Ecamunit Edeke aima naelomunit kotoma Akirot ke nabeit bon. Imorikikina luemaete kotoma abeit kere aiyuun adiopet.—Kosiom Yokana 4:23, 24; 14:6; Ipeson 4:4, 5.
Kosesen ebidio Ecamunit Kereka Edeke Idiinin Kere?
2. Anyoika abu Yesu kinerete nuikamunitos Ikristayon lukaisab?
“Elimorete ebe ejenete Edeke konye engeritos nges kaswamisiokec.”—TITO 1:16.
Abu Yesu ikwenyak ebe epote inabin lukaisab aitapar aiyuun. Katakan otunga, esubitos bala amaak lukabeit. Kokanisan kec ebalasi ebe eraas Ikristayon. Konye ipedori ijo ajenun itunga ngul kopone kalo ejaatar. Epone bo ani? Ediini lokabeit nges bon ejatar ka Ikristayon lukabeit ido kijenuni ijo kesi koponesio ka aswamisio nukajokak.—Kosiom Matayo 7:13-23.
3. Epone bo ani ijenuna ijo aima nakabeit?
Kaanyutu ajenuneta akany:
-
Ikristayon lukabeit eyongitos Ebaibuli kwape Akirot naka Edeke. Etamitos cut aitup ipiteno luka Ebaibuli. Kanukangun aisisianakineta ka aswamisio nuka ediini loabeit mam elomunitos aomisio nu itunga. (Matayo 15:7-9) Kiswamaete Ikristayon lukabeit nuisisianakinete kesi.—Kosiom Yokana 17:17; 2 Timoteo 3:16, 17.
-
Itupitok lukabeit luka Yesu Itopoloritos ekiror loka Edeke, Yawe. Kitopolo Yesu ekiror loka Edeke kaitijenar. Abu ingarak itunga ajenun Edeke kaisisianakin kesi epone loitopoloret ekiror loka Edeke kotoma ailip. (Matayo 6:9) Kane iboyo ijo ediini bo ani itijenarit ekiror loka Edeke?—Kosiom Yokana 17:26; Iromayon 10:13, 14.
-
Elimonokinete Ikristayon lukabeit nuikamunitos Ajakanut Naka Edeke. Abu Edeke kijuk Yesu alimonokin akiro nukajokak nuka Ajakanut. Ajakanut Naka Edeke nges bon amuno naka itunga. Abu Yesu kiyatak einer nuikamunitos Ajakanut aitodol apak natwanare ke. (Luka 4:43; 8:1; 23:42, 43) Alimunit nges ebe ibusakinit iketupitok da alimonokin nuikamunitos Ajakanut ngin. Arai ebu itunganan kinera nuikamunitos Ajakanut Naka Edeke, ediini bo ani iyuunit nges?—Kosiom Matayo 24:14.
-
Itupitok ka Yesu mam erasi lukakwapin. Ijenuni ijo kesi narai mam ejaas akirosinei nuka apugan ka angolopa naka itunga. (Yokana 17:16; 18:36) Bobo da, mam kesi isisiaete aswamisio nuarokok ka iponesio lukakwapin.—Kosiom Yakob 4:4.
-
Ejatatar Ikristayon lukabeit amina naepol nejai nginidiopet. Kotoma akirot naka Edeke, isisiaunitos kesi anyongit ngin iteker. Karaida igangitos cut idiinin lukaisab ijisio lukakwapin, Ikristayon lukabeit egiritos aswam ngun. (Mika 4:1-3) Konye, Ikristayon lukabeit itosomaete akec pak ka iboro luejatatar kesi aingarakina itunga luce.—Kosiom Yokana 13:34, 35; 1 Yokana 4:20.
4. Ipedori ijo amisikin ediini lokabeit?
Ediini bo ani elemunit nu isisianakini kotoma akirot naka Edeke, kitopolorite ekiror loka Edeke ido kolimonokini nu ikamunitos Ajakanut Naka Edeke kwape amuno bon naka itunga? Ediini bo ani ejatar amina ido kolaite ijisio? Iwomit ijo bia?—Kosiom 1 Yokana 3:10-12.
