Abu Edeke Yawe * kitegea edukone losodit. Elimokinit oni Ebaibuli ebe abu nges kosub aberu nasodit kosodi ‘ayaun nges neejai etunganan.’ Abu Adam kiyalamikin noi kosodi atemar ebe: “Na nges akoit naka akojoka, ido nges akiring naka akiringika.” (Ageun 2:22, 23) Eroko Yawe ekoto itunga luedukokina aiyalama.

Neidukokinor ijo, ibuni aomoom ebe eraas iboro kere luedolitos. Kotoma abeit, ekiliokit keda aberu luedukokina ido kominanara epote ajaute keda atiokisio. (1 Ikorinton 7:28) Kotoma oitabo kalo, ibuni ijo adumun ipiteno luka Ebaibuli, arai ibuaikin toma aswamisiot, epote aingarakin edukone kon ka ekale adumun aiyalama.—Isabulin 19:8-11.

NUEBALA EBAIBULI: Ekiliokit nges akou naka ekale.—Ipeson 5:23.

Arai kirai ijo ekiliokit, ekoto Yawe ijo amina aberu kon. (1 Petero 3:7) Abu nges kosub nges kwape naingarakinit ijo ido ekoto nges ijo aitodikin nges amina ka angosibib. (Ageun 2:18) Ibusakinit ijo amina aberu kon noi ido kokapakina aitopolorit akoteke adepar nakon.—Ipeson 5:25-29.

Arai kirai ijo aberu, ekoto Yawe ijo ayongite okilenikon noi keda aingarakin nges aitodolikin alosikinetake. (1 Ikorinton 11:3; Ipeson 5:33) Kigang aomisioke kede etau kon kere tetere icamanaros keda nges. (Ikolosain 3:18) Arai kiswama ijo ngun, ibuni do ijo araun naibus noi kotoma akonyen okilenikon keda Yawe.—1 Petero 3:1-6.

NUIPEDORI IJO ASWAM:

• Kingit yenowaikon eipone loipedoria ijo araun ekiliokit araibo aberu nakajokan. Kitoik akit kopupok, ido kiswama nuipedori kere aijulakin iponesio kon

• Kotitingior. Eyangaikini na yesi apak kanu aisisiaun eipone loipedoriatar aisialamikin yenice

NUEBALA EBAIBULI: Ibusakinit ijo aisisiaun eipud ayenowaikon. (Ipilipin 2:3, 4) Koyaite yenowaikon kwape yenetiai, kiitu da ebe ekoto Yawe ikejaanakinak araute ‘luiyapepera mama ejaas itunga kere.’ (2 Timoteo 2:24) ‘Ejai loisudi akiro kwape aicum kekileng, konye itangaleuni angajep naka lukacoa.’ Aso kocoite eipone loinerar. (Awaragasia 12:18) Ebuni emoyo loka Yawe aingarakin ijo einer kojaas ka amina keda asianut.—Igalatian 5:22, 23; Ikolosain 4:6.

NUIPEDORI IJO ASWAM:

• Eroko ijo igeunia einer akiro nuepolok nuikamunitos ekale keda yenowaikon kilip kanu adumun etau loinapakina ka aomisio nuilajara

• Komoom nuibusakinit ijo einer ka eipone loilimunet

NUEBALA EBAIBULI: Neidukokinor ijo, iraunete “adiopetekuan.” (Matayo 19:5) Konye irokosi yesi iraas itunga iarei ido ipote ajaikin ka aomisio nuegelegela. Aso ibusakinit yesi aimorikikina kotoma aomisio. (Ipilipin 2:2) Erai aimorikikina ibore yen epol kanu aimor aomisio. Ebala Ebaibuli: “Ŋin nailosikini itogogongitai kainerun.” (Awaragasia 20:18) Ekoto ipiteno luka Ebaibuli ingarakisi yesi tetere kimorete aomisio nepepe.—Awaragasia 8:32, 33.

NUIPEDORI IJO ASWAM:

• Komorata keda nowaikon nuipuda ijo konye mere akiro ace araibo nuiwomit ijo

• Kinerutu keda yenowaikon eroko ijo kiseunia aswam ace kere