Karaida itam ijo ajaute kede ekale ka edukone loiyalama, engesununos iboro luepedorete ainakin yesi mam kiyalamasi. (Ekalimonokinan 9:11) Kotoma amina naka Edeke ijaikini nges oni duc aingarakinio neidumunia oni atiokisio. Karai itupak ijo ipiteno luka Ebaibuli, ibuni ijo kede ekale kon aipikonor atiokisio, karaida ejaas ace nuelangir noi.

NUEBALA EBAIBULI: “Kowoikis ŋes aiyaloŋoŋokus kere, naarai epod ŋesi yes.” (1 Petero 5:7) Kiitunenei duc ebe mam Edeke ibusakinit aitoronio kanu atiokisio kon. (Yakob 1:13) Neikunyakinia ijo nejai Edeke, ebuni nges aingarakin ijo kwape ekotor. (Isaia 41:10) “Kobukokisi ikusitauon akonyeneke.”—Isabulin 62:8.

Ibuni ijo da adumun aitalakario neisiomia ijo ka aisisia Ebaibuli kon kangin paaran. Kwape aanyunet ibuni do ijo ajenun eipone “loitalakara Yawe oni neijaar toma acodunio.” (2 Ikorinton 1:3, 4; Iromayon 15:4) Isumunit nges aijaikin ijo “ainapakin da naka Edeke naedeparit ajenun kere.”—Ipilipin 4:6, 7, 13.

NUIPEDORI IJO ASWAM:

• Kilip aingarakinio kanejai Yawe tetere isalakini irai yen inapakina ido koomomoi ejok

• Kinyabuk aomisio kon kere kosodi asekun aomisiot adiopet naitojokarit ijo noi

NUEBALA EBAIBULI: “Etau loka loecobe edumuni aijen; Akit da naka lokacoa emoi aijen.” (Awaragasia 18:15) Kojen abeit. Kojen nuekotosi itunga kere luka okale kon. Kinerakinos keda kesi. Kopupenenei kesi.—Awaragasia 20:5.

Dobodo etwana itunganan yeniminat? Mam idumuni akuriau einer nuejaas otau kon. Kiitu ebe ‘abu Yesu da komony.’ (Yokana 11:35; Ekalimonokinan 3:4) Adumun ajo nuedolitos keda aiyengun erai bobo ibore yen epol. (Ekalimonokinan 4:6) Kijaikini na ijo ipedori aipikonor ejautene loakudian.

NUIPEDORI IJO ASWAM:

• Eroko engeso etakanunia, ekoto ijo aanyun ebe ineranara ijo kede ekale kon. Netakanunatar atiokisio, epote do kesi adumun ailajara neineratar ka ijo

• Kineranakin keda itunga luatakanakisi atiokisio kwangun

NUEBALA EBAIBULI: “Emina epapero apaarasia kere, ido onace euritai kanuka apakio nuka ican.” (Awaragasia 17:17) Ekotosi ipapero kon aingarakin ijo, konye aticepak mam ejenete nuibusakinit aswam. Mam ikurianar alimokin kesi nu ikoto ijo. (Awaragasia 12:25) Bobo da, ipedori ijo adumun aingarakinio naka omoyo kanejaas ngul luemisikitos Ebaibuli. Aicoreta nuijaikinete kesi ijo kotoma Obaibuli epote aingarakin ijo.—Yakob 5:14.

Ibuni ijo adumun aingarakinio na ikoto arai iupanara duc keda itunga luiyuunitos Edeke ido komunokina aisumununetake. Ibuni bobo ijo adumun aitalakario neingarakinia ijo itunga ice luekotosi aisinyikokinio. Komorata keda kesi nuikamunitos Yawe ka aisumununeta ke. Kiyatakinite aingarakin itunga lu ekotosi ajenun Akirot Naka Yawe, bobo da mam kigitar kanejaas ngun lueminasi ido kopodokinitos ijo.—Awaragasia 18:1; 1 Ikorinton 15:58.

NUIPEDORI IJO ASWAM:

• Kinerakin keda epapero loidicatar kanu nges aingarakin ijo

• Kiner abeit ido komunono oboro kalu ikoto ijo