Mam Yawe ecamakini itunga lumam edolito amunar Paradais. Ipapero luka Edeke bon iboiete kanen. Inyo etakanikini itunga lumam edolito? Kanu aisisiaun abongokinet, kiitu akiro nukabeit nuka Noa. Iboit Noa ikaru ilukumin kolosek. Arai nges etungan loajok loatamit noi aswam akote naka Yawe. Konye itunga ice kakwap eswamaete iboro lumam ajokak. Aso abu Yawe kolimok Noa ebe abuni Nges ayaun akalele amudiar itunga lukarokok kere. Abu nges kolimok Noa adukun ataker tetere nges ka ekekale mam etwakete ne ebunio Akalele.​—Ageun 6:9-18.

Abu Noa ka ekekale kodukut ateker. Abu Noa ikwenyana itunga ebe ebunit Akalele, konye mam kes apotu kiirasi nges. Apotu kes kiyatakisi aswam iboro lumam ajokak. Kedaun adukun ateker, abu Noa koyangana itiang toma ateker, kosodi nges ka lukokaleke da alomar toma. Etupakini, koyau Yawe ekwam loti. Kotep akiru akwap aparasia 40 ka akwaresia 40. Kilelebunos akipi akwap kere.​—Ageun 7:7-12.

 Otwakiasi itunga lukarok aijarakec, kitajarai Noa ka ekekale. Koyau Yawe kes eyuwara kotoma Akalele toma akwap na alemaritai aronis. (Ageun 7:22, 23) Ebala Ebaibuli ebe ebunit bobo apak na emudiara Yawe ngul lu engeretos aswam lu edolitos. Itunga lukajokak mam emudiario. Iboiete ikaru kere kotoma Paradais.​—2 Petero 2:5, 6, 9.

Itunga nuipu lolo iswamaete iboro lumam ejokak. Ilelebikina amengeranut akwap. Ijukanari Yawe ikejenak duc duc aikwenyanar itunga, konye luipu mam ekotosi apupokin akiro ka Yawe. Mam ekotosi aijulakin ikeceponesio. Mam kes ekotosi acamun nuebala Edeke nuikamunito nuejokak ka nueroko. Inyo ebuni atakanikini itunga luu? Ijulakinos kes acepaaran? Luipu mam ijulakinos. Ebunit apak na emudiarere itunga lukarokok ido mam kes edumunete aijar cut.​—Isabulin 92:7.

Akwap mam emudiaro; itarauno paradais. Ngul lu eraunos ipapero luka Edeke kes epote aiboi kotoma Paradais kakwap.​—Isabulin 37:29.