Ekoto Edeke Ijo araun opaperoke. Iwoomomotor ijo ebe ipedori ijo araun opaperoke Etunganan lokapolon akwap akere? Aburaam, loboit kolosek, anyaritai opapero loka Edeke. (Yakob 2:23) Ice da luineritai kotoma Obaibuli inumunumito epaperone ka Edeke ido aponi isirerengai noi. Lolo, itunga lukatutubena nukakwap kere arautu ipapero luka Edeke. Ijo da ipedori araun epapero loka Edeke.

Araut epapero loka Edeke ejok adepar araut epapero loka etunganan. Mam Edeke itakadikini ipapero ke lumunon. (Isabulin 18:25) Araut epapero loka Edeke ejok adepar ajaut ka abar. Ne etwania loka abaran, elosete ikesirigin nejaa ice. Konye, ngul lu inumunumete epaperone ka Edeke ejaas ka abar namam idio itungan eyangari awai.​—Matayo 6:19.

Ice itunga etamete aisimik ijo aisisia nuikamunito Edeke. Ice kotoma opaperon kon ka lukokalekon iswamaunete nu. (Matayo 10:36, 37) Kikwenatar ice ijo araibo aitukurian ijo, ingitakin ber ijo, ‘Ingai bo akoto eong aisialamikin​—itunga araibo Edeke?’ Koomoom kanu: Kilimok ijo ice ajalakin ainyam, irimari ijo nges? Mam cut! Ikoto ijo inyamat kanu aijar. Konye Edeke ijaikini ijo aijar ikar kere! Aso mam cut icamakini idio kere aisimik ijo aisisiaun epone lo iraunor ijo epapero loka Edeke.​—Yokana 17:3.