Eyangaikini agogong adumun epapero, eyangaikini da agogong aidar epapero. Agogong na ipikakini ijo kanu araun ka apaikin kirai epapero loka Edeke ebunio aisirereng noi. Alimokit Yesu ngul lu eyunete nges ebe: “Abeit da kiwosikini yes.” (Yokana 8:32) Apolou ke nges inyo?

Ipedori ijo ailel kotoma ailajara kwana. Ipedori ijo ailajaar kotoma aisisianakineta nukaisab ka aingal nu esiarak Satan. Ipedori ijo ailajaar kotoma amameu naka amuno na ilelebikina aijar naka itunga luipu lumam ejenete Yawe. (Iromayon 8:22) Ipapero luka Edeke ilajara da kotoma “akurian atwanare.”​—Iburanian 2:14, 15.

Ipedori ijo ailel ailajara kotoma akwap nakitetet naka Edeke. Buu, ailajara na eumokina na ipedori ijo kalelakin kongaren! Kotoma Paradais akwap, ejaun ailajara kotoma ojie, adekasinei ka epali. Ailajara kotoma ocan ka etenge. Awosikinio kotoma amojong ka atwanare. Awosikinio kotoma akuriau, aridakinio, ka amameu naka etube. Inera Ebaibuli nuka Edeke: “Ipukori akonikan, isimonikini da eimiel loka ŋinibore kere yenikajaran.”​—Isabulin 145:16.

 Ipapero luka Edeke ebusete ikar kere. Aijar namam edaun erai ainakinet naketiai na ijaikini Edeke kere lu emoete epaperone kanges. (Iromayon 6:23) Kiisima ber ijo aiboi ikaru kere!

Ejaun ijo apak na aswam iboro luipu. Acepak ikoto ijo aisisiaun aiwo ikososinei. Acepak ikoto ijo aisisiaun aicul aputosia araibo araut ekeon. Acepak ikoto ijo aisisiaun nuikamanito itiang araibo iraan. Acepak ikoto alosit kosodi awayun aiboisio luegelegela ka itunga. Ajaut ka aijar namam edaun ijaikini iboro lu kere apedor!

Ejaun ijo apak na aisipaper ipapero luipu. Aijar ikaru kere ijaikini epatanar ajenun ice luipu lu arautu ipapero luka Edeke. Ijenuni ijo nu epedoritos kes aswam ka ikeceponesio, eraunos kes ikonipapero da. Iminuni ijo kes, kes da eminunete ijo. (1 Ikorinton 13:8) Ajaut ka aijar namam edaun einakini ijo aisipaper ngin itunganan kakwap! Adepar kakere, ekonipaperone ka Yawe ebuni aiyatakin apolor kwape etubonorotor ikaru. Koraun epapero loka Edeke ikaru kere!