AISISIAET NA 32
Ipugai Kwana Ajakanut Naka Edeke!
Ekaru lo 1914 nges ageunia Ajakanut Naka Edeke aipuga. Apak ngipengin ageunotor apaarasia nukawasia nuka eipugae loka itunga. Epone ani ijenunia oni ngun? Isisiau nuedwarit Ebaibuli, ejautene loka akwap lolo, ka iponesio luka itunga ameun kokaru lo 1914.
1. Anyoika bo nuedwarit Ebaibuli?
Itodunit eitaabo loka Daniel ebe egeuni Ajakanut Naka Edeke aipuga kangeset naka apak naenyaritai “apakio akanykaarei.” (Daniel 4:16, 17) Ketuboros ikar luipu, abu Yesu kiner nuikamunitos apakio ngun kwape “apakio nuka Imo,” ido abala bobo ngesi ebe mam apakio ngun angetakina. (Luka 21:24) Ibuni oni aisisiaun ebe apotu apakio ngun akanykaarei kongetakinos kokaru lo 1914.
2. Anyoika bo nuiswamasi kakwap ido epone ani ejaatar iponesio luka itunga ameun kokaru lo 1914?
Apotu ikesisiak luka Yesu kingitata nges ebe: “Anyoin da aanyunet naka abunorekon, ka naka esange loka akwapin?” (Matayo 24:3) Kotoma abongokineteke, abu Yesu kodwarite iboro luipu luepote atakanun kapak naegeunia ngesi aipuga kotoma akuj kwape Ekabaka loka Ajakanut Naka Edeke. Ice koboro kalu imoriaritos ijiisinei, aikidiokus naka inyamat, keda amaran naka akwap. (Kosiom Matayo 24:7.) Edwarit bobo Ebaibuli ebe iponesio luka itunga “kapaarasia nukawasia” einakinete aijar araut ‘naetiono.’ (2 Timoteo 3:1-5) Ejautene ngon ka iponesio luka itunga inyikokinitos ajaut kanoinoi ameun kokaru lo 1914.
3. Kanuinyo arokiarotor iboro noi ameun naageunia Ajakanut Naka Edeke aipuga?
Katipet akaulo naaraunor Yesu Ekabaka loka Ajakanut Naka Edeke, abu ngesi kitiji Satan kakejokin kotoma akuj. Aponi kipikorai Satan kojie kangol. Kanuikamunitos Satan, ebala Ebaibuli ebe aponi “kocakakinai toma akwap, kocakakinai da ikemalaikan nepepe kanges.” (Apukokinio 12:9, 10, 12) Ekadakinit Satan noi naarai ejeni ebe eyapiei nges amudiario. Kanuangun, eyaunit ngesi apipilu ka aiticanitoi naepol otunga anatar akwap kere. Komam abuonokin, ngun kes eyatakinotor iboro arokiar kakwap! Elemari Ajakanut Naka Edeke atiokisio nu kere.
KISISIAU NUIPU
Kisisiau kanuinyo kijenia ebe egeunit Ajakanut Naka Edeke aipuga kokaru lo 1914 ido kojenu epone loetiroritotor nu oni.
4. Adwareta nuka Ebaibuli itodunitos ebe abu Ajakanut Naka Edeke kogeu aipuga kokaru 1914
Abu Edeke koinak Ekabaka Nebukadenesar airujasit naerai adwaretait. Airujasit ngin keda apolou naabu Daniel koinak, itodunitos ebe apotu ngun kotakanikisi ajakanut naka Nebukadenesar ka Ajakanut Naka Edeke da.—Kosiom Daniel 4:17. a
Kosiom Daniel 4:20-26, kosodete aitwasam acaat abongonokinia aingiseta nuetupakinete:
-
(A) Inyo abu Nebukadenesar koany kotoma airujasitike?—Koany ikokoron 20 keda 21.
-
(B) Inyo abu otakanik ekitoi?—Koany ikokoron 23.
-
(C) Anyoika bo nuiswamaunos kawasia naka “apakio akanykaarei”?—Koany ikokoron 26.
Epone Loimoriaritor Airujasit Naka Ekitoi Ajakanut Naka Edeke
ADWARETAIT (Daniel 4:20-36)
Ajakanut
(A) Ekitoi loti
Aponi kitobwounai ajakanut
(B) “Kojep ekitoi . . . aitodol neatuborotor apakio akanykaarei”
Enyakakin ajakanut
(C) “Icasi [inyakakinio] akonijakanut”
Kotoma aitodolikinet nasodit naka adwaretait kana . . .
-
(D) Ebwoikinit bo ekitoi ingai?—Koany ikokoron 22.
-
(E) Epone ani aponi itobwounere ajakanut?—Kosiom Daniel 4:29-33.
-
(F) Inyo abu kotakanik Nebukadenesar ketuboros “apakio akanykaarei”?—Kosiom Daniel 4:34-36.
AITODOLIKINET NASODIT
Ajakanut
(D) Nebukadenesar, Ekabaka loko Babulon
Aponi kitobwounai ajakanut
(E) Akaulo naekaru 606 E.L.K., abu Nebukadenesar ibangubangun adaun ikar ikanyaarei ido mam apedorit bobo aipuga
Enyakakin ajakanut
(F) Abu aijen naka Nebukadenesar kobongok kogeuni bobo ngesi aipuga
Kotoma aitodolikinet naiyareit naka adwaretait kana . . .
-
(G) Ebwoikinit bo ekitoi ingai?—Kosiom 1 Aisiitonokin 29:23.
-
(H) Epone ani aponi itanangere ajakanut? Epone ani ijenunia oni ebe aroko ajakanut ngin itanangitai naajaar Yesu toma akwap?—Kosiom Luka 21:24.
-
(I) Iwori bo, ido ai bo aponi kinyakakinere ajakanut ngin?
AITODOLIKINET NAIYAREIT
Ajakanut
(G) Ikabakan luko Isirael luabwoikinitos Ajakanut Naka Edeke
Aponi kitobwounai ajakanut
(H) Aponi komudiarai Yerusalem, kitanangete apugan naka ikabakan luka Isirael adaun ikar 2,520
Enyakakin ajakanut
(I) Kogeuni Yesu aipuga kotoma akuj kwape Ekabaka loka Ajakanut Naka Edeke
Apak naetia ai edaunete apakio akanykaarei?
Akiro ace nuinerit Ebaibuli ingarakinete oni amisiikin atutubena ace. Kwape aanyunet, itejenunit eitaabo loka Apukokinio ebe ikar iuni katutubet eriakasi keda apaarasia 1,260. (Apukokinio 12:6, 14) Apakio akanykaarei eraasi apaarasia 1,260 irwan aarei, kodumuni ijo apaarasia 2,520. Kanenice kotoma Obaibuli, ebwoikinit adiopepaaran ekaru. (Esekiel 4:6) Kwape kwangin da, apakio akanykaarei kotoma oitaabo loka Daniel eraasi apaarasia 2,520 nuebwoikinitos ikar 2,520.
5. Ejulakin akwap ameun kokaru lo 1914
Abu Yesu kodwar epone loejaunotor iboro kakwap akaulo nges ageun aipuga kwape Ekabaka. Kosiom Luka 21:9-11, kosodete aimor aingiset nata:
-
Anu bo kotoma oboro kalu iwanyunitor arai bo ipupunitor ijo?
Itetemit ekiyakia Paul epone loejaunotor itunga kapaarasia nukawasia naka apuganisinei nuka itunga. Kosiom 2 Timoteo 3:1-5, kosodete aimor aingiset nata:
-
Iwanyunit ijo iponesio ngun kotunga lolo?
6. Kitodu ebe iyuunit ijo ebe ipugai Ajakanut Naka Edeke kwape kwana
Kosiom Matayo 24:3, 14, kosodete aimor aingiseta nuta:
-
Ani bo aswam naepol naitodunit ebe ipugai kwana Ajakanut Naka Edeke?
-
Epone ani ipedoria ijo aingarakin kotoma aswam angin?
Ipugai kwana Ajakanunt Naka Edeke, ido aapu apak naeraunor Ajakanut ngin bon ipugai akwap kere. Kosiom Iburanian 10:24, 25, kosodete aimor aingiset nata:
-
Anyoika bo nuibusakinit oni kere aswam kwape iwanyunitor “apaaran ngin eyapuunit adolun”?
Arai kisisiau ijo idiobore yeningarakini luce ido yenelakuni kes, anyoika bo nuiswamauni ijo?
EPEDORI ICE AINGIT EBE: “Kanuinyo itopolooritotor Ajenak Luka Yawe ekaru lo 1914?”
-
Epone ani ibongokinia ijo?
NUIDAU AISISIAUN
Adwareta nuka Ebaibuli, keda iboro luiswamasi kotoma akwap itodunitos ebe ipugai Ajakanut Naka Edeke. Itoduni oni ebe iyuunit oni ngun kopone lo oni alimonokin luce da nuikamunitos ajakanut ngin ka ajaunun airiamununeta.
Ainyogoor
-
Inyo abu kotakanu kangeset naka apakio akanyaarei nuadwaritai koitaabo loka Daniel?
-
Inyo einakinit ijo acamun ebe egeunit Ajakanut Naka Edeke aipuga kokaru lo 1914?
-
Epone ani ipedoria ijo aitodun ebe iyuunit jo ebe ipugai kwana Ajakanut?
ISISIAU BOBO NUTA
Koany nuebakasi ipirioitin luka akiro nukolo sek ka itunga ice da kanuikamunitos aijulanakineta nuatakanutu ameun kokaru lo 1914.
“Naeyatakinotor Iponesio Luka Itunga Amunaar” (Awake!, Elap Loiwongonet 2007)
Kosiom nuikamunitos epone loabu adwaretait nakotoma Matayo 24:14 kijulakinia aijar naka ediopetunganan.
“Amina Eong Aicak Emopira Loakan Adepar Idiobore Kere!” (Watchtower No. 3 2017)
Epone ani ijenunia oni ebe adwaretait nakotoma Daniel isulai 4 inerit nuikamunitos Ajakanut Naka Edeke?
“Iwori bo Ageunia Ajakanut Naka Edeke Aipuga? (Atutubet Na 1)” (Watchtower, Elap Loitomonet 1, 2014)
Inyo itodunit ebe “apakio akanykaarei” nuineritai kotoma Daniel isulai 4 apotu kongetakinos kokaru lo 1914?
a Koany aisisiaeta aarei nuawasia kotoma atutubet naebala ebe Kisisiau Bobo Nuta kaisisiaet kana.
