AISISIAET NA 40
Epone Ani Ipedoria Oni Araut Luilai Kakonyen Nuka Edeke?
Koomoom ber ijo toto naemin itemonokini ikekoku kanu alosit osomero. Ilongari ber ngesi ikekoku kosodi aitanapikin igoen luelaete. Ingarakinete ngun ikekoku araut yenengalei ido itodikinete ngun luce da ebe idarete auriak ikecekoku ejok. Kwape kwangin Yawe da, Papawok loemina, ekoto oni araut luilai—kotoma akuan, aomisio, oiner, ka aswamisio da. Arai irai oni itunga luilai, imedauni oni ido einakinete ngun Yawe aibuses.
1. Epone ani ipedoria oni araut luilai kotoma akuan?
Elimokinit Yawe oni ebe: Ibusakinit yesi araun “lukalaunak.” (1 Petero 1:16) Kanu araut lukalaunak, ekoto oni araut luitesegaara kotoma oponesio ido kalaete kotoma akuan. Ipedori oni araut luilai kotoma akuan kopone loka ailongenen, ailosenen igoen, aitala ireriawok, igaalin, ipikipikin, ka imotokan. Ipedori bobo oni aitala Ekingdom Hall. Arai irai oni luilai, iinakini oni Yawe aibuses.—2 Ikorinton 6:3, 4.
2. Anu iponesio luibusakinit oni aisac kanu araut luilai?
Elimokinit Ebaibuli oni ebe “ketesegaaros kotoma asilianut kere naka akuan ka naka emoyo da.” (2 Ikorinton 7:1) Kanuangun, iswamai oni kagogong ainac idiobore kere yenepedori amunaar aijarawok ka aomisiowok da. Naarai ibusakinit aomisiowok koraasi nuisiyalamikinitos Yawe, ekoto oni aisac aomisio nueroko. (Isabulin 104:34) Ekoto bobo eineriwok da korai loejok.—Kosiom Ikolosain 3:8.
Inyo bobo epedori ainakin oni araut lumam ilai? Ejaasi iboro ice luepedorete amunaar awatewok. Kanuangun, ibusakinit oni aisac iboro kwape nat aimat esigala, ejae, anyaka ikwii luemunaarete adam arai bo aitwasam ikee kanuka aitelelio. Kisac oni iboro ngul idumuni oni angaleu naejok, ido itoduni oni ebe isiyalamikinit oni Edeke kanuka ainakinet naka aijar. Ibusakinit bobo oni aswam nuipedori kere aisac asilianut naka ailangilang neilec ka asesen aputosia numujal. (Isabulin 119:37; Ipeson 5:5) Aisac aswamisio ngun, epedori araut ibore yenetiono, konye ingarakini Yawe oni aipikor.—Kosiom Isaia 41:13.
KISISIAU NUIPU
Kisisiau epone loipedoria oni ainakin Yawe aibuses kotoma araut luilai, ido kojenu epone lopedoret aipikor aswamisio nuka asilianut.
3. Araut luilai kotoma akuan einakinit Yawe aibuses
Kisiom oni ikisila luainakinit Yawe ateker naka Isirael, ipedori oni amisiikin jokan epone loeyaitor ngesi aila. Kosiom Anyoun 19:10 keda 30:17-19, kosodete aimor aingiseta nuta:
-
Anyoika bo nuitejenunitos ikokoron lu kanuikamunitos epone loesesenia Yawe aitala akuan?
-
Anu bo nuipedori ijo aiswamaenen kanu asalakinit irai yenilai kotoma akuan?
Araut yenilai, eyangaikini agogong keda apak. Konye ipedori oni aswam ngun kojautene edio kere, kaiboisit adio kere arai icana oni arai ibarit. Koboliak EBIDIO, kosodete aimor aingiset naetupakini.
-
Epone ani epedoria aidar iborowok kolaete aitubusikin alimonokiniwok?
4. Kipiko aswamisio nuarokok
Epedori Yawe aingarakin oni aipikor adiosilianut kere
Arai imasi ijo esigala, arai bo nat itwasamaenenei ijo ikee kanu aitelelio, ipedori jo kojeni epone loetionor ajalakin iboro ngul. Inyo epedori aingarakin ijo? Kojenu nuarokok nuepedorete iboro ngul aiswamakin ijo. Kosiom Matayo 22:37-39, kosodete aimor nuikamunitos epone loepedoria aimat etaba, esigala, keda atwasam ikee kanu aitelelio, . . .
-
amunaar eidicane loka itunganan keda Yawe.
-
ayaun ationis neejaasi lukokaleke keda luce da.
Kitolom ainapeta nuingarakinete ijo aipikor aswamisio ngun nuarokok. a Koboliak EBIDIO.
Kosiom Ipilipin 4:13, kosodete aimor aingiset nata:
-
Epone ani epedoria adunyakinit ailip, aisisia Ebaibuli, ka ajaunun airiamununeta aisipedor itunganan aipikor aswamisio nueroko?
5. Kitijii aomosio keda aswamisio nuarokok
Kosiom Ikolosain 3:5, kosodete aimor aingiseta nuta:
-
Epone ani ijenunia oni ebe asesen aputosia numujal, aijukanakin luce aputosia arai bo nat akiro nuka adoteu, ailangilang neilec, eraasi iboro lueroko kakonyen nuka Yawe?
-
Iwomit kereka ijo ebe edolit Yawe akote oni araut luilai? Kanuinyo?
Koany epone lopedoret aitijii aomisio nueroko. Koboliak EBIDIO.
Abu Yesu kitwasam aitupuset kanu aitodun ebe ibusakinit oni aswam katipet nuipedori kere kanu asalakinit irai luilai. Kosiom Matayo 5:29, 30, kosodete aimor aingiset nata:
-
Karaida mam Yesu abala ebe ibusakinit oni atubor adiotutubet naka akuanawok, konye etodunit ngesi ebe ibusakinit oni aiswamaun idiobore katipet kanu aitanang aswamisio nueroko. Anyoika bo nuepedori itunganan aswam katipet kanu aisac aswamisio nueroko? b
Arai iwuta jo aswam kagogong aipikor aomisio nueroko, isiyalamikinit Yawe noi nuiswamai ijo. Kosiom Isabulin 103:13, 14, kosodete aimor aingiset nata:
-
Arai iwuta ijo aitijii adiosilianut, epone ani epedoria ekokoro lo aingarakin ijo ainyikokin aitijii asilianut ngin?
Mam ipalari karaida ibuca ijo!
Ipedori jo aticepak aomoom ebe, ‘Akuroki eong aitijii asilianut na, akoto do eong apalar.’ Konye koomoom ber ijo nuta: Arai kibiror akeran loilagani, mam erai ebe epikor ngesi ido mam bobo erai ebe inyakario ngesi ageunet naka ailaagan. Kwape kwangin da, aibucar mam erai ebe ekaraki ijo aitijii asilianut. Ido mam ngun elemarete nuajokak kere nuidau ijo aitodolikin. Nginitunganan kere epedori aibucar—eraasi aibucanareta nuepedorete atakanun naiwutar ijo aitijii adiosilianut. Sirikipalaa! Kingarakinite Yawe, ipedori ijo aipikor.
EBAKASI ICETUNGA EBE: “Atam eong nuapedori kere konye, ekaraki eong.”
-
Ani bo ekokoro loipedori jo asiomakin itunganan ngin kanu aitogogong ebe kingarakinite Yawe ngesi, epedori ngesi aipikor adiosilianut?
NUIDAU AISISIAUN
Isiyalamikini oni Yawe kopone loka araut luilai kotoma akuan, aomisio, oponesio, ka aswamisio.
Ainyogoor
-
Kanuinyo eraar ibore yenepol oni araut luilai?
-
Epone ani ipedoria ijo araut yenilai kotoma akuan?
-
Epone ani ipedoria ijo aidar aomisiokon, iponesiokon, ka aswamisio koraasi nuelaete?
ISISIAU BOBO NUTA
Anyoika bo nuepataka nuipedori ijo aswam kanu araut yenilai karaida aticepak icana?
Kisisiau nuipedori ijo aswam kanu aitanang aimat esigala.
“Epone Lopedoret Ajalakin Aimat Esigala” (Awake!, Elap Loikanyet 2010)
Kojenu aronis naka asesen aputosia numujal.
“Asesen Aputosia Numujal—Ejok Arai bo Erono?” (Watchtower, Elap Loikanyetauni 1, 2013)
Kisisiau epone loabu ediopetunganan kopedoria ajalakin asesen aputosia numujal.
“Abu Kokurok Eong Irwan Nuipu Konye Ekaulo Abu Eong Epiko” (Watchtower No. 4 2016)
a Aisisiaet naejai atutubet Isisiau Bobo Nuta kotoma aisisiaet kana, naebala ebe “Epone Lopedoret Ajalakin Aimat Esigala,” itetemit nuipedori jo aswam kanu ajalakin iboro lueroko.
b Kanu adumun aingarakinio tetere ipikori ailangilang neileic, koany aisisiaet naebala ebe “Epone Ani Epikoria Eong Asilianut Naka Ailangilang Neileic?” koitabo Questions Young People Ask—Answers That Work, Volume 1, esula lo 25.
