AISISIAET NA 43
Epone Ani Eyaitotor Ikristayon Ajon?
Anatar akwap kere ejaatar itunga keda aomisio nuegelegela nuikamunitos ajon. Itunga ice emasete ajon kapak naejaatar kesi kipaperokec. Ice eseunitos mam aimat ajon cut. Konye icetunga emasete kitoni amerikin. Anyoika bo nuisisianakini Ebaibuli kanuikamunitos ajon?
1. Erono kereka aimat ajon?
Mam Ebaibuli imikit aimat ajon. Itia aitoronit aimat ajon, imarunit Ebaibuli iboro lueraasi ainakinet kama ejai Edeke aimoriarit “ebino loisiyalamikinit etau loka etunganan.” (Isabulin 104:14, 15) Ikiliok ice ka angor ace nukolo sek ejaanakinete Edeke amasenenete ajon.—1 Timoteo 5:23.
2. Ani bo aicoretait naijaikinit Ebaibuli ngul lueseunete aimat ajon?
Imikit Yawe aimat ajon nuipu ka emeret. (Igalatian 5:21) Ebala Akekirot ebe: “Sirijaananas kangul kaluemeranakinos.” (Awaragasia 23:20) Aso arai kiseu oni aimat ajon karaida naijaar bon, mam ekoto oni aimat kitoni akurokin aomoom ejok, kasodete aisud einer, ka aswam nueroko arai bo aibwaikin angaleuwok oitelesit. Arai mam oni ipedori aitikokina kotoma aimat ajon, ibusakinit oni acamun aitaleor ajon.
3. Epone ani ipedoria oni ayongit aseunet naka luce naikamunit aimat ajon?
Itunganan ilopet eseuni arai aimat ajon arai mam. Mam ibusakinit oni atubokin luce lueseunete aimat ajon adis, karaida abuikin idiotunganan aimat ajon. (Iromayon 14:10) Arai eyauni aimatawok ationis neejaasi luce, ibusakinit oni aseun ainyein aimat ajon. (Kosiom Iromayon 14:21.) Ebala Ebaibuli ebe: “Sirikemo itunganan akejokis bon, konye naka lucekeng.”—Kosiom 1 Ikorinton 10:23, 24.
KISISIAU NUIPU
Kisisiau aicoreta nuka Ebaibuli nuingarakinete jo aseun arai aimat ajon ido ajon bo nuetia ai ibusakinit ijo aimat. Bobo da, kojenu nuipedori ijo aswam arai ijaatar ijo keda ationis naka aimat ajon.
4. Ipedori ijo aseun arai aimat ajon arai mam
Epone ani ayaitor Yesu aimat ajon? Kanu adumun abongokinet kisisiau nuikamunitos aumokinet nasodit naabu Yesu iswamau. Kosiom Yokana 2:1-11, kosodete aimor aingiseta nuta:
-
Anyoika bo nuisisiauni oni kotoma aumokinet kana nuikamunitos epone loeyaitor Yesu ajon ka loayaitor ngesi ngul da luemasete?
-
Kwape mam Yesu etoronitor aimat ajon, epone ani ibusakinitor Ikristayon ayait ngul lueseunitos aimat ajon?
Konye karaida ilajaara Ekristayot aimat ajon, mam erai ebe ibusakinit ngesi aimat kanginipak kere. Kosiom Awaragasia 22:3, kosodi airereor akiro nuta nuepedorete aingarakin ijo aseun aimat ajon arai mam:
-
Ebeit ijo aiteker emotoka, epikipik, arai bo nat aitwasam adiocuuma.
-
Ipotiei ijo.
-
Icorakinit emurwon ijo ainyeikin aimat ajon.
-
Etionikinit ijo aitikokina kotoma aimat ajon.
-
Mam ikisila luka apugan ecamakinitos ijo aimat ajon.
-
Ijaasi ijo nepepe kitunganan yenitaleorit ajon naarai etionikinit ngesi aitikokina kotoma aimat ajon.
Ibusakinit kereka ijo akorakin itunga ajon kotoma opucit loka aiwen epeta arai bo kotoma adiopejo kere? Kanu aanyun nuepedorete aingarakin ijo aitolomun aseunet, koboliak EBIDIO.
Kosiom Iromayon 13:13 keda 1 Ikorinton 10:31, 32. Akaulo naka aisiom kanginikokoro, komorata aingiset nata:
-
Epone ani ingarakinia aicoretait na ijo aitolomun aseunet naisiyalamikinit Yawe?
Erai Nginikristayot ilopet eseuni arai aimat ajon arai bo mam. Karaida emasenenei ngesi ajon, epedori ngesi aseun mam aimat ajon kapakio ace
5. Ajon nuetia ai iseuni ijo aimat?
Arai kiseu ijo aimat ajon, kiitunite nuta: Karaida mam Yawe imikit aimat ajon, itoronit ngesi aimat ajon nuipu. Kanuinyo? Kosiom Kosea 4:11, 18, kosodete aimor aingiset nata:
-
Anyoika bo nuepedorete atakanun arai emasi itunganan ajon nuipu?
Inyo epedori aingarakin oni aisac aimat ajon nuipu? Ekoto oni araasi luimisiikinit awokononok. Kosiom Awaragasia 11:2, kosodete aimor aingiset nata:
-
Kanuinyo eraar ibore yenejok ijo aitutub ajon nuetia ai iseuni jo aimat?
6. Nuepedorete aingarakin itunganan ainyekin aimat ajon nuipu?
Koany nuopotu kingarakisi etunganan ediopet aisac aitwasam ajon erono? Koboliak EBIDIO, kosodete aimor aingiseta nuta.
-
Kotoma obidio, anyoika bo nueswamaenenei Dmitry akaulo na ngesi aimat ajon?
-
Abu kereka ngesi korasak apalar aimat ajon?
-
Epone ani abu ngesi opedoria aitaleor ajon?
Kosiom 1 Ikorinton 6:10, 11, kosodete aimor aingiseta nuta:
-
Kanuinyo eroniar emeret?
-
Inyo itodunit ebe epedori itunganan yenemasi ajon nuipu aijulakin?
Kosiom Matayo 5:30, kosodete aimor aingiset nata:
-
Aitupuset nainakini Yesu naka atubor akan, arai akepolou ebe ibusakinit itunganan ajalakin iceboro kanu aisiyalamikin Yawe. Anyoika nuipedori ijo aswam arai etionikinit ijo ainyeikin aimat ajon nuipu? a
Kosiom 1 Ikorinton 15:33, kosodete aimor aingiset nata:
-
Anyoika bo nuetakanunete arai ijaananasi ijo kangul luemasete ajon nuipu?
EPEDORI ICE AINGIT EBE: “Erono kereka aimat ajon?”
-
Epone ani ibongokinia ijo?
NUIDAU AISISIAUN
Einakinit Yawe oni ajon kanu alelakinit, konye itoronit ngesi aimat ajon nuipu keda emeret.
Ainyogoor
-
Anyoika bo nuebala Ebaibuli kanuikamunitos ajon?
-
Anu bo atiokisio nuelomunete kanuka akwamakinit aimat ajon?
-
Epone ani itodunia oni ebe iyongit oni aseuneta nuka luce nuikamunitos aimat arai bo amamut aimat ajon?
ISISIAU BOBO NUTA
Epone ani epedoriata atumunak aiswamaun aseuneta nuejok nuikamunitos aimat ajon?
Kisisiau nuipedori jo aswam kanu aipikor ationis naka aimat ajon.
“Kitikokina Kotoma Aimat Ajon” (Watchtower, Elap Losodit 1, 2010)
Ibusakinit kereka Ikristayon anerokin luce arereng kopone loka aretonokin agilasin?
“Aingiseta Kaneejaasi Ikasiomak” (Watchtower, Elap Loiyareit 15, 2007)
Kotoma akou naka akirot “Amasi Eong Noi Adepar Luce,” kisisiau epone loabu ediopetunganan kopedoria ajalakin aimat ajon.
“Ijulakini Ebaibuli Itunga” (Watchtower, Elap Loikanyet 1, 2012)
a Ngul lumam epedoritos aitikokin eipielane loka ajon, ekotokin kes aticepak ainerakin keda ipirioitin tetere edumunete aingarakinio. Ebakasi imurok luipu ebe ngul luejaatar keda ationis naka amamut aperor aimat ajon, ibusakinit aitaleor ajon cut.
