4 Мӯсо 25:1-18
25 Вақте Исроил дар Шиттим+ зиндагӣ мекард, мардум бо духтарони Мӯоб зино кардан гирифтанд.+
2 Занон мардумро даъват мекарданд, то ҳамроҳашон ба худоёни онҳо қурбонӣ биёранд.+ Мардум аз қурбониҳои онҳо хӯрда, ба худоёнашон саҷда намуданро сар карданд.+
3 Ҳамин тавр Исроил ба парастиши Баали Фаӯр+ ҳамроҳ шуд* ва хашми Яҳува бар Исроил аланга зад.
4 Яҳува ба Мӯсо гуфт: «Тамоми пешвоёни ин мардумро бигир ва онҳоро пеши назари Яҳува, дар рӯзи равшан*, биовез, то оташи хашми Яҳува бар Исроил хомӯш гардад».
5 Мӯсо ба доварони Исроил+ гуфт: «Ҳар яки шумо бояд одамони худро, ки ба парастиши Баали Фаӯр ҳамроҳ шудаанд*, бикушед».+
6 Дар ҳамин вақт яке аз исроилиён дар пеши назари Мӯсо ва тамоми мардум, ки назди даромадгоҳи хаймаи ҷомеъ мегиристанд, зани мидёниеро+ ба хаймагоҳ овард.
7 Ҳамин ки Финҳос,+ писари Элъозор, писари Ҳоруни коҳин, инро дид, дарҳол аз миёни мардум бархоста, найзаеро ба даст гирифт.
8 Сипас ӯ аз паси он марди исроилӣ ба хайма даромада, бар ҳар дуи онҳо найзаро халонид; ӯ он зани мӯобиро бар узвҳои ҷинсияш найза халонид. Он гоҳ вабое, ки бар сари исроилиён омада буд, бозистод.+
9 Онҳое, ки аз вабо мурданд, 24 000 нафар буданд.+
10 Сипас Яҳува ба Мӯсо гуфт:
11 «Финҳос,+ писари Элъозор, писари Ҳоруни коҳин, ғазаби маро аз мардуми Исроил дур кард, чунки ӯ аз хиёнат нисбати ман дар миёни исроилиён чашм напӯшид*.+ Вагарна ман, ки вафодории бекаму костро металабам,+ метавонистам исроилиёнро несту нобуд созам.
12 Аз ин рӯ бигӯ: “Ман бо ӯ аҳди сулҳ мебандам.
13 Ин барои ӯ ва барои насли ӯ+ аҳди коҳинии бардавом хоҳад буд, зеро ӯ аз хиёнат нисбати Худояш чашм напӯшид*+ ва ӯ барои мардуми Исроил товон дод”».
14 Номи он марди исроилие, ки ҳамроҳи зани мидёнӣ кушта шуд, Зимрӣ, писари Солу, буд. Ӯ сардори хонадони шимъӯниён буд.
15 Номи он зани мидёние, ки кушта шуд, Козбӣ буд. Падари вай Сур+ ном дошт ва ӯ сардори қабилае дар Мидён+ буд.
16 Яҳува баъдтар ба Мӯсо гуфт:
17 «Мидёниёнро ба ҳоли худ нагузоред ва онҳоро зарба занед,+
18 зеро онҳо макру ҳиларо ба кор бурда, шуморо дар масъалаи Фаӯр ба гуноҳ тела доданд+ ва бар саратон бало оварданд. Онҳо ҳамчунин ба воситаи Козбии духтари сардори қабилаи Мидён, ки дар рӯзи сар задани вабо аз сабаби масъалаи Фаӯр кушта шуд,+ шуморо ба гуноҳ тела доданд».
Поварақҳо
^ Ё «пайваст».
^ Дар матни асл «дар пеши офтоб».
^ Ё «пайвастаанд».
^ Ё «нагузошт, ки дар миёни исроилиён касеро ба ман баробар кунанд».
^ Ё «нагузошт, ки касеро ба Худояш баробар кунанд».
