«Ман номи Туро ба онҳо шиносондам»

«Ман номи Туро ба одамоне, ки аз ҷаҳон ба ман додӣ, маълум намудам... Ман номи Туро ба онҳо шиносондам ва боз мешиносонам» (ЮҲАННО 17:6, 26).

Маънои ин гуфтаҳо. Исо дар хизмат номи Худоро ба забон гирифта онро ба одамон шиносонид. Вақте Исо Навиштаҳоро мехонд, бешак номи Худоро талаффуз мекард (Луқо 4:16–21). Исо шогирдонашро таълим дод, ки чунин дуо гӯянд: «Эй Падар, номи ту муқаддас бод!» (Луқо 11:2).

Паҳн шудани хушхабар дар асри як. Петруси расул ба як марди пиронсол дар Ерусалим нақл карда буд, ки Худо аз байни миллатҳо «халқе ба номи худ» ҷамъ меорад (Корнома15:14). Расулон ва дигар шогирдони масеҳ мавъиза мекарданд, ки «ҳар кӣ номи Яҳуваро бихонад, наҷот меёбад» (Корнома 2:21; Румиён 10:13). Бояд гуфт, ки онҳо дар китобу мактубҳои худ номи Худоро менавиштанд. Барои мисол, дар «Тосефта», маҷмӯи қонунҳои яҳудӣ, ки соли 300-уми милодӣ тартиб дода шуда буд, дар бораи сӯзонда шудани дастнависҳои масеҳиён чунин гуфта мешавад: «Китобҳои нависандагони Инҷил ва миним [аз афташ гап дар бораи масеҳиёни яҳудӣ меравад] дар оташ сӯзонда мешуданд. Барои сӯзондани китобҳои онҳо... ва номи Худо, ки дар китобҳояшон истифода мешуд, иҷозат дода шуда буд».

Кӣ имрӯз хушхабарро паҳн мекунад? Дар яке аз нашрҳои Китоби Муқаддас, ки аз тарафи Созмони миллии калисоҳои Масеҳ дар ИМА эътироф шудааст, дар муқаддимааш гуфта мешавад: «Истифода бурдани ягон ном нисбати Худои яккаву ягона барои калисои масеҳӣ тамоман нораво аст, чунки дар олам дигар худоёне нестанд, ки Худои ҳақиқиро аз онҳо фарқ кардан лозим бошад. Ин одат аллакай пеш аз давраи месеҳият дар дини яҳудӣ аз байн рафта буд». Бинобар ин номи Худо бо калимаи «ХУДОВАНД» иваз карда шуд. Ба наздикӣ бошад, аз Ватикан ба коҳинони калисо чунин фармон фиристода шуд: «Ҳангоми сурудхонӣ ва дуогӯйӣ номи Худоро дар намуди тетраграматон ЙҲВҲ * низ истифода набаред ва ба забон наоред».

Кӣ имрӯз номи Худоро истифода мебарад ва дигаронро бо он шинос мекунад? Дар давлати Қирғизистон наврасе бо номи Сергей филмеро тамошо карда фаҳмид, ки номи Худо Яҳува аст. Баъд аз ин, ӯ муддати даҳ сол дигар ин номро дар ягон ҷо нашунид. Сипас, вақте Сергей ба Иёлоти Муттаҳида кӯчид, ду Шоҳиди Яҳува ба хонаи ӯ омада аз Китоби Муқаддас номи Худоро нишон доданд. Сергей хеле хурсанд буд, ки одамонеро вохӯрд, ки номи Яҳуваро истифода мебаранд. Ҷолиб аст, ки дар «Нашри сеюми Луғати байналмиллалии Вебстер» ибораи «Яҳува Худо» чунин шарҳ дода шудааст: «Худои таоло ва Худои яккаву ягонае, ки Шоҳидони Яҳува ибодат мекунанд».

[Поварақ]