መልሲ እዛ ሕቶ እዚኣ፡ ነቲ ብዛዕባ ህይወት ዘሎና ኣመለኻኽታ ይጸልዎ እዩ።

ኣምላኽ ኣብ ዓለም እዚ ዅሉ ጽባቐ ፈጢሩ ኼብቅዕሲ፡ ህይወትና መከራ ኪኸውን ኢሉ ምፈጠረናዶ፧

ዓለማዊ ኣተሓሳስባ ዘለዎም ሰባት ብሰንኪ መከራ፡ ንባህርያት ኣምላኽ፡ ሕሉፍ ሓሊፎም እውን ንህልውና ኣምላኽ ኣብ ሕቶ የእትውዎ እዮም። መከራ ምህላዉ፡ (1) ኣምላኽ ንምውጋዱ ዓቕሚ ኸም ዘይብሉ፡ (2) ኣምላኽ ንመከራ ኼወግዶ ኸም ዘይደሊ፡ ወይ (3) ኣምላኽ ከም ዘየልቦ ዜርኢ ምዃኑ ይኣምኑ።

ግናኸ፡ እዚ ኣማራጺታት እዚ ጥራይ ድዩ ዘሎ፧

ኣምላኽ፡ መከራ ኽንረክብ ኣይኰነን ፈጢሩና።

ብህይወት ክንሕጐስ እዩ ዚደልየና።

“[ንሰባትሲ] ብህይወት ከለዉ ኻብ ምሕጓስን ጽቡቕ ካብ ምግባርን ዚሓይሽ ነገር ከም ዘይብሎም ደምደምኩ፣ ኵሉ ሰብ እውን ይብላዕን ይስተን፡ ብዅሉ ጻዕሩ ድማ ይተሓጐስ። እዚ ኸኣ ውህበት ኣምላኽ እዩ።”—መክብብ 3:12, 13።

ኣምላኽ ነቶም ቀዳሞት ክልተ ሰባት ፍጹም ዝዀነ ህይወት ሂቡ እዩ ኣጀሚርዎም።

ንሳቶም ኰነ ዘርኦም መከራ ኺረኽቡ ኣይሓለነን።

“ኣምላኽ ድማ፡ ‘ፍረዩን ተባዝሑን፡ ንምድሪ ኸኣ ምልእዋን ግዝእዋን’ . . . በሎም።”—ዘፍጥረት 1:28።

እቶም ቀዳሞት ክልተ ሰባት ካብ ኣምላኽ ኺፍለዩ ወሲኖም።

እዚ ድማ ኣብ ገዛእ ርእሶምን ኣብ ኵሎም ዘርኦምን ብዙሕ መከራ ኣምጺኡ።

“ከምቲ ብሓደ ሰብ ሓጢኣት ናብ ዓለም ዝኣተወ፡ ብሓጢኣት እውን ሞት፡ ኵላቶም ስለ ዝሓጥኡ ድማ ሞት ናብ ኵሉ ሰብ ሓሊፉ ኣሎ።”—ሮሜ 5:12። *

ኣምላኽ ካብ መሪሕነቱ ተፈሊና ብርእስና ኽንነብር ኣይኰነን ፈጢሩና።

ከምቲ ኣብ ትሕቲ ማይ ኽንነብር ዘይተፈጠርና፡ ገዛእ ርእስና ኽንገዝእ እውን ኣይተፈጠርናን።

“ዚመላለስ ሰብ . . . ስጕምቱ ኬቕንዕ ናቱ ኣይኰነን።”—ኤርምያስ 10:23።

ኣምላኽ፡ መከራ ኽንረክብ ኣይደልየናን እዩ።

ብእተኻእለ መጠን ካብ ጸገማት ሓራ ዄንና ኽንነብር እዩ ዚደልየና።

“ኣየ፡ ናብ ትእዛዛተይ ኣቕሊብካ እንተ ትኸውን! ሽዑ፡ ሰላምካ ኸም ፈለግ ምዀነ።”—ኢሳይያስ 48:18።