“ንኣቦ ብስመይ ዝለመንኩምዎ ዘበለ ኺህበኩም እዩ።”​—ዮሃንስ 16:23።

ቃላት የሱስ ብንጹር ከም ዚሕብሮ፡ የሆዋ ብምስልታት፡ ብቕዱሳን፡ ብመላእኽቲ ወይ ብዝሞቱ ኣቦሓጎታት ኣቢልና ዘይኰነስ፡ ብስም የሱስ ክርስቶስ ኣቢልና ናብኡ ኽንጽሊ እዩ ዚደልየና። ብስም የሱስ ናብ ኣምላኽ ክንጽሊ ኸለና፡ ነቲ የሱስ ዘለዎ ኣገዳሲ ግደ ኸም እተገንዘብናዮ ኢና እነርኢ። የሱስ፡ “ብዘይካ ብኣይ፡ ሓደ እኳ ናብ ኣቦ ዚመጽእ የልቦን” ኢሉ እዩ።—ዮሃንስ 14:6።

“ልብኹም ኣብ ቅድሚኡ ኣፍስሱ።”​—መዝሙር 62:8።

ናብ የሆዋ ኽንጽሊ ኸለና፡ ልክዕ ከምቲ ንፈቃር ኣቦና እንዛረቦ ጌርና ኽንዛረቦ ኣሎና። ካብ መጽሓፍ እናኣንበብና ወይ ንዝሸምደድናዮ ቓላት እናደገምና ኣብ ክንዲ እንጽሊ፡ ንኣምላኽ ብኣኽብሮትን ካብ ልብን ክንዛረቦ ኣሎና።

“ከም ፍቓዱ ጌርና እንልምኖ ዘበለ ይሰምዓና እዩ።”​—1 ዮሃንስ 5:14።

የሆዋ ኣምላኽ እንታይ ከም ዚገብረልናን እንታይ ክንገብረሉ ኸም ዚደልየናን፡ ኣብ መጽሓፍ ቅዱስ ይነግረና እዩ። ጸሎትና ብኣምላኽ ተቐባልነት ምእንቲ ኺረክብ፡ “ከም ፍቓዱ ጌርና” ኽንጽሊ የድልየና። ነዚ ምእንቲ ኺሕግዘናን ንኣምላኽ ኣጸቢቕና ምእንቲ ኽንፈልጦን ከኣ መጽሓፍ ቅዱስ ከነጽንዕ የድልየና። ከምኡ እንተ ጌርና፡ ጸሎትና ንዕኡ ባህ ዜብል ኪኸውን እዩ።

ዜድልየካ ነገራት ክትረክብ ጸሊ። ከም ምግብን ክዳንን መጽለልን ዝኣመሰለ መዓልታዊ ዜድልየና ነገራት ምእንቲ ኽንረክብ፡ ናብ ኣምላኽ ክንጽሊ ንኽእል ኢና። ብዘይካዚ፡ ቅኑዕ ውሳነታት ንምግባር ዚሕግዝ ጥበብን ፈተናታት ንምጽዋር ዜኽእል ሓይልን ኪውሃበና ኽንጽሊ ንኽእል ኢና። እምነት ኪውሃበናን ሓጢኣትና ይቕረ ኺብሃለልናን ሓገዝ ኣምላኽ ክንረክብን ክንጽሊ ንኽእል ኢና።—ሉቃስ 11:3, 4, 13፣ ያእቆብ 1:5, 17።

ምእንቲ ኻልኦት ጸሊ። ፈቃራት ወለዲ፡ ደቆም ንሓድሕዶም ኪፋቐሩ ኸለዉ፡ ደስ እዩ ዚብሎም። የሆዋ እውን ብተመሳሳሊ፡ ኣብ ምድሪ ዘለዉ ደቁ ንሓድሕዶም ኪተሓላለዩ እዩ ዚደልዮም። ንመጻምድትናን ንደቅናን ንስድራ ቤትናን ንፈተውትናን ክንጽልየሎም ግቡእ እዩ። ወደ መዝሙር ያእቆብ፡ “ምእንቲ ሓድሕድኩም እውን ጸልዩ” ኢሉ ጽሒፉ ኣሎ።—ያእቆብ 5:16።

ኣመስግን። መጽሓፍ ቅዱስ ብዛዕባ ፈጣሪና፡ “ካብ ሰማይ ዝናምን ወቕቲ ፍርያትን እናሃበኩምን ብምግቢ እናኣጽገበኩምን ልብኹም ብሓጐስ እናመልአን ጽቡቕ ብምግባር፡ ርእሱ ብዘይ ምስክር ኣይሓደገን” ይብል። (ግብሪ ሃዋርያት 14:17) ብዛዕባ እቲ ዅሉ ኣምላኽ ዝገበረልና ኽንሓስብ ከለና፡ ብጸሎት ከነመስግኖ ንድረኽ ኢና። ብኣነባብራና እውን ኣመስገንቲ ምዃንና ኸነርኢ ኣሎና።—ቈሎሴ 3:15።

ሓድሓደ ግዜ፡ እቲ ብቕንዕና ዘቕረብናዮ ጸሎት፡ ብኡብኡ መልሲ ብዘይምርካቡ ተስፋ ንቘርጽ ንኸውን። እሞኸ፡ ኣምላኽ ብኣና ኸም ዘይግደስ ጌርና ኽንድምድም ይግባእዶ፧ ኣይግባእን። ብቐጻሊ ኽንጽሊ ኸም ዘሎና ዜጕልሕ ነዚ ዚስዕብ ተመክሮታት ርአ።

ኣብ መእተዊ ዓንቀጽ እዛ መጽሔት እዚኣ እተጠቕሰ ስቲቭ፡ “ብቐጻሊ እንተ ዘይጽሊ ነይረ፡ ህይወተይ ጽልሙት ምዀነ ነይሩ” ብምባል ይእመን። ኪቕየር ዝሓገዞ ደኣ እሞ እንታይ እዩ፧ መጽሓፍ ቅዱስ ኬጽንዕ ጀመረ እሞ፡ ኣድላይነት ጸሎትን ብቐጻሊ ኽጽሊ ኸም ዘለዎን ተማህረ። ስቲቭ ኣስዒቡ፡ “ስለቲ ኻብቶም ፍቑራት ፈተውተይ ዝረኸብክዎ ፍቕራዊ ደገፍ፡ ከመስግኖ ኢለ ናብ ኣምላኽ እጽሊ እየ። ካብ ቅድሚ ሕጂ ብዝያዳ ኸኣ ሕጉስ እየ” በለ።

እታ ጸሎታ ብኣምላኽ ኪስማዕ ዘይብቕዕቲ ዀይኑ ተሰሚዕዋ ዝነበረት ጀኒኸ፧ ንሳ ኸምዚ በለት፡ “ኣዝየ ምስ ተደቘስኩ፡ ንኣምላኽ ስለምንታይ ዘይብቕዕቲ ዀይኑ ኸም ዚስምዓኒ ኽርዳእ ኪሕግዘኒ ለሚነዮ።” እዚኸ ብኸመይ ሓጊዝዋ፧ “ንኣምላኽ ምዝራበይ ንርእሰይ ከምቲ ንሱ ዚርእየኒ ገይረ ኽርእያ፡ ማለት ልበይ እኳ እንተ ዀነነኒ፡ ንሱ ግና ኸም ዘይኵንነኒ ኽርዳእ ሓጊዙኒ እዩ። ከይሕለል እውን ሓጊዙኒ እዩ” ብምባል ገለጸት። ውጽኢቱኸ እንታይ እዩ ነይሩ፧ ኣስዒባ ኸምዚ በለት፦ “ጸሎት ንየሆዋ ኣምላኽ ትእዛዛቱ ኽሕሉ ኽጽዕር ከለኹ፡ ወትሩ ዚሕግዘኒ ናይ ሓቅን ፈቃርን ሓላይን ኣምላኽ፡ ኣቦ፡ ከምኡ እውን ፈታዊ ገይረ ኽርእዮ ሓጊዙኒ እዩ።”

ተመክሮ ኢሳበል እውን ንርአ። ምስ ጠነሰት፡ ሓካይማ ውሉዳ ኸቢድ ስንክልና ኸም ዚህልዎ ነገርዋ። ሽዑ ኣዝያ ሰንበደት። ገሊኦም ከኣ ነቲ ድቂ ኽትሰድዶ መኸርዋ። ኢሳበል፡ “ብሰንኪ እቲ ኣብ ልበይ ጸይረዮ ዝነበርኩ ኸቢድ ጓሂ፡ ከምዛ ዝመወት ኰይኑ እዩ ተሰሚዑኒ ነይሩ” በለት። ሽዑ፡ እንታይ እያ ገይራ፧ “ኣምላኽ ምእንቲ ኺድግፈኒ፡ ደጋጊመ ናብኡ ጸልየ” በለት። ድሕሪ ገለ ግዜ ኸኣ፡ ጀራርድ ወዳ ተወለደ፡ ስንኩል ከኣ እዩ ነይሩ። እሞኸ፡ ኢሳበል ኣምላኽ ንጸሎታ ኸም ዝመለሶ ዀይኑ ተሰሚዕዋዶ፧ እወ፡ ተሰሚዕዋ እዩ። ጸሎታ ብኸመይ እዩ ተመሊሱ፧ ኢሳበል ከምዚ ትብል፦ “እቲ ሕጂ ወዲ 14 ዓመት ኰይኑ ዘሎ ወደይ፡ ስንኩል እኳ እንተ ዀነ፡ ተሓጒሱ ብህይወት ኪነብር ክርእዮ ኸለኹ፡ ብሉጽ መልሲ ጸሎተይ ምዃኑ፡ እወ የሆዋ ኣምላኽ ዝሃበኒ ዝዓበየ በረኸት ከም ዝዀነ ተገንዚበ።”

ከምዚ ዝኣመሰለ ልባዊ ሓሳባት፡ ነቲ ሓደ ዘማሪ፡ “ንስኻ ግና፡ ኦ የሆዋ፡ ልማኖ ዓቃላት ትሰምዕ። ልቦም ተጽንዖ፡ ንዓታቶም ከኣ ተቕልበሎም” ዝበሎ ቓላት ከም እንሓስበሉ እዩ ዚገብረና። (መዝሙር 10:17) እዝስ፡ ብጸሎት ክንጸንዕ ዚድርኽ ከመይ ዝበለ ብቑዕ ምኽንያት ኰን እዩ!

ኣብ መጽሓፍ ቅዱስ፡ ሓያሎ ጸሎት የሱስ ተመዝጊቡ ኣሎ። እቲ ብብዙሓት ዚፍለጥ ከኣ እቲ ንደቀ መዛሙርቱ ዝመሃሮም ጸሎት እዩ። ካብኡኸ እንታይ ኢና እንምሃር፧